Read Medumba Lévitiko 25 Bible Online

Lévitiko 25 - Medumba bible

Lévitiko 25

¹Tshùaben tshob Mosé num mbat Sinaï ndù:

²Tshob bon Israél ndù: Tsha' nsi fite ndùse bin nsi tsho ntùm ngô ze me fà bin nà. Yen nà b'a ta' Sabbat neghamte Tshùaben yi.

³O nsi ke ywit yu nà num ngu'njù ntôge, o nsi ke féte yu nà ntù ndu' num ngu'njù ntôge, bèn tsho' tshu.

⁴Là, mbatte ngu'njù sammbàa nsi b'a Sabbat, ngelaṅ z'a bwô ndù tsha' tswe fite là, Sabbat neghamte Tshùaben yi. O ke nsi ywit nà, ke féte yu nà ntù ndu' yen ngu'njù là.

⁵O ke nsi tsho' tshu ts'a fe à miag tshu ts'a na' ngwù nsi ndùs'o ke ntsho' tshu là, ke kàb ntàm ntù ndu' mi o ke' féte là. Nummbe yen ngu'njù là b'a ze tsha' fite yi là.

⁶Yen ngu'njù Sabbat là, tshu tse tsha' nsi fà là nsi b'a jujù o, ze ngafa' o ze mandum bo ze mènnzwi, ze ngafa' o z'o num mfà nkàb yi là, ze ngùn z'a be ntùm ndà o là,

⁷be ze nyàm bo ze nyàm tse bo num ntswe ntùm ngô o là. Yu ze tsha' nsi fà là b'a num jujù.

⁸O nsi siaṅ ngabnjù sammbàa ntùm ba ngu'njù, yoṅ sammbàa nze sammbàa num ngu'njù sammbàa. Yen nà nsi fà ngu'njù ntshob bwe'e ṅam nkuà.

⁹Num mbatte lé' gham ntùm mbatte ṅwù ṅam sammbàa, o nsi tô nta kua' neta; bin nsi tô nta ntùm ngô zin num lé'njù tamte fa.

¹⁰Bin nsi lo' mbatte ngu'njù ṅam ntàn mba ngu'njù nelàn nà, sô nkù tu njoṅ benntùn fa ntùm ngô. Yen nà nsi b'a ngu'njù tsiaṅte; mba we lo nsi bèn bèn ghù ze ju, mba zit mèn no bèn mbèn ntùm ze tunndà.

¹¹Mbatte ngu'njù ṅam ntàn a' b'a ze tsiaṅte bin. Bin ke nsi ywit ju, ke tsho' tshu ts'a bit num nà be yub tu là, ke kàb ntàm ntù ndu' mi bin ke' féte là num yen ngu'njù là.

¹²Nummb'a b'a ngu'njù tsiaṅte, mbwô ndù bin lo' ngu' là mba ze nelàn nà. Bin jù tshu ts'a tum ntùm nà zin nà.

¹³Mba we lo netèt bin bèn mbèn ngù ze ju ntùm yen ngu'njù tsiaṅte là.

¹⁴A be ze mèn ke njun mfèl i, ke neswèn yi lo là, mb'a bwô nenùn be ntùm ntàne.

¹⁵O nsi be jun mfèl o, siaṅ njoṅ ngu'njù ts'a tshùa fe mba ngu'njù tsiaṅte tôg là.

¹⁶Ntshu ntàn nsi ke ko' à kua' mba ngu'njù tshwèt nko' yi là. A be ze ngu'njù tshwèt nkôg là, mb'o a' ke nkôg ntshu ntàne, nummb'a ke nswèn njoṅ ngu'njù bo tsho' yi là wù.

¹⁷Kà sàm mèn netèt bin fùte mfèl i, a bwô ndù o bwôg Nsi o; nummbe me b'a Tshùaben Nsi o.

¹⁸Bin ze ntshù' màm, ntshùb ntag màm, ntamte njoṅ i fa nke nze; a nsi tshùa ndùlala bin tswe fite ntùm ngô.

¹⁹Tsha' ngô nsi fà ntàm mi, bin jù njwèle, ntswe bwe ntùm fite.

²⁰A be ze bin tshob ndù: Bag nsi jù à ke num mbatte ngu'njù sammbàa mba bag ke nsi ywit tshu ke bèn ntsho' l'à?

²¹Mba m'a' tam tse bin num mbatte ngu'njù ntôge, yen ngu'njù là fà jujù bin num ngu' tat.

²²Bin nsi ywit tshu num mbatte ngu'njù fome, jù njwèn tshu tà nèn nkum ntùm mbatte ngu'njù bwe'e; tà nèn nkum num tshu nswe, bin nsi ke nke' njù njwèn tshu.

²³Bo ke nsi swèn tsha' à matmat; nummbe ngô b'a yàm, bin be la' àm à mba ghùn nà, mb'a ba tswe ntùm la' là.

²⁴Bin nsi yab kàn nebèn nke njun tsha' ntùm ngô fa me nsi fà bin nà.

²⁵A be mfèl o bwoṅe, nswèn mo' bag tsha' tse là, mb'a be mo' mfèl i z'a ghù netshu' i là bèn njun ju ze mfèl i na' nswèn nà.

²⁶A be ze mèn ke' tum, be kua' tu wul i ghù ju netshu' tsha' tse yi là,

²⁷mb'a' siaṅ ngu'njù ts'a tôg là, ntô num ntshu ntàne, mfà nkàb num tshé' ngu'njù ts'a tù' là mèn z'a na' njun tsha' là, mbèn ntùm tsha' tse.

²⁸A be z'a ke' ghù ju netshu' tsha' tse yi là, mba mèn z'a ntùm bwe là a' tswe bwe tà nkum num ngu'njù tsiaṅte; ng'é nsi tum bwe num ngu'njù tsiaṅte ju bèn mbèn ngaju.

²⁹A be ze mèn swèn ta' ba' netswe bwe ntùm tusô se bo kut ntsham ntsiag là, mb'a ghù nebèn ntshu' ba' i ndùse tamngu' ke' yoṅ ntôg là. Neta ze ntshù' bam yi num netshu' ba' là ke ntswe à tamngu'.

³⁰Là, a be ze bo ke' tshu' ba' là ntùm tusô bo kut ntsham ntsiag kà tamngu' nse' là, mba yen ba' là ghô ze mèn z'a jun nà bo nzwil i matmat. A ke nsi tum bwe num ngu'njù tsiaṅte.

³¹Mba' mi a ntùm ntusô mi bo ke' kut ntsham ntsiag là, bo nsi lo' yub à mba tsha' là; bo ghù netshu' yube, nga jun nsi tum bwe num ngu'njù tsiaṅte.

³²Mbe se' mba ntusô ben Lévi boa mba' mi bo nsi ghù bwe là, ben Lévi ku' neke ntshu' yub njoṅ ndù fa.

³³Mèn a jun ba' ben Lévi là mb'a nsi tum bwe num ngu'njù tsiaṅte, tum mba tusô s'a jun ba' bwe là; yen nà b'a nummbe mba' mi a ntùm ntusô ben Lévi là b'a yub ju netèt bon Israél.

³⁴Be bo ke swèn nà ts'a be mbaṅ ntusô ben Lévi ndam yub mbum nà; nummb'a bo bèn ngù tshen nà là matmat.

³⁵A be ze mfèl o bwoṅe, mbu mi yub a vù mbwe o là, mb'a bètte ndù o tomt'é. O nsi ghù be ndaṅndaṅ num ngùn z'a ntùm ngô là, ndù a fà bu yi netswe bin yi.

³⁶O ke nsi kwé bin yi, ke kubt'é; o nsi bwôg Nsi o, bin mfèl o tswe.

³⁷O ke nsi fo nkàb yi bo bin, ke bèn ntswe' jujù ts'o ghù là bo kubte.

³⁸Me b'a Tshùaben Nsi o, ze me na' nsô zin ngô Egipto, num nefà ngô Kanaan bin, mbèn mbe Nsi zin nà.

³⁹A be ze mfèl o bwoṅ mbaṅ o, nswèn wul i wù là, mb'a ke' bwô ndù o ghù a fa' à mba ta' nkuan nà.

⁴⁰A nsi be la' o à mba ngafa' là, mba mèn z'a ke tswe à bwe là; a nsi fa' wù tà kum num ngu'njù tsiaṅte.

⁴¹Yen ngelaṅ nà, a nsi tum la' o boa bon tse bèn ntùm ze tunndà, num tse tsha' tà tse.

⁴²Nummbe bo b'a ghafa' tshàm tse me na' nsô yub ngô Egipto là. Bo ke nsi swèn yub mba bo num nswèn ba kuan nà.

⁴³O ke nsi lo' neta kà tô i yi, là, o nsi bwôg Nsi o.

⁴⁴O nsi jun nkuan ze mandum bo ze mènnzwi à ntùm ngô ts'a lam zin mbum nà. A tshen ben ni bèn mbe kua' tsho kuan ts'o bèn ngù yub là.

⁴⁵Bin ghù nejun bon ba ghùn tse bo nsi tswe netèt bin nà, mba bon tse tunndà tshob nsi bwe ntùm ngô zin nà. Tshen ben nà nsi be zin ju.

⁴⁶Bo nsi tù' ntsi' mum mbu bon tsin ndùse bin nsi tôg là, be yub ju. Tshen ben nà nsi tù' kuan matmat. Là, mbe se' mba fèt tsin bon Israél là, kà sàm mèn netèt bin lo' neta ntô mfèl i yi.

⁴⁷A be ze ngùn te la' o, ntù' nga nkàb, mfèl o ghù njo bo yi, nswèn wul i nga nkàb ke njùndà i lo là,

⁴⁸mb'a be mfèl o tshu' wul i. Be mba mo' mèn netèt fèt tse tshu' i.

⁴⁹Mo' tàab ke nshum mo' tàab lo ghù netshu' i, ke mo' mfèl i lo. A be z'a fà bu yi là, mb'a ghù netshu' wul i ze tu.

⁵⁰Bo yi nsi be ntshu ntshù' siaṅ fe ngu'njù z'a jun i là tà kum num ngu'njù tsiaṅte; nkàb z'a nsi bèn fà mèn z'a jun i là nsi lôt'a num ngu'njù ts'a tù' là. Bo nsi yé't'a num njoṅ nkàb fa' ngafa' num tamngu' kà keb njoṅ nu fa.

⁵¹A be ze njoṅ ngu'njù ts'a tù' nekum num ngu'njù tsiaṅte yàm neshu là, mb'a bwô ndù a tô mo' njoṅ bag nkàb i ze tu, num netshu' wul i yi;

⁵²a be z'a ke' ntù' yàm nà, mba bo a' siaṅ, a fà njoṅ nkàb z'a tù' là, z'a ku' kua' njoṅ i là.

⁵³Bo nsi lo' i mba ngafa' ze bo lo' i yen ngu'njù là là. Be bo ke ma'ni i num miag mu.

⁵⁴A be ze mèn ke' tum ntshu' i num sàm mat mba ntshù' là, mb'a nsi tum num ngu'njù tsiaṅte, tum à boa bon tse fa.

⁵⁵Nummbe bon Israél b'a kua' ghafa' tshàm. Bo b'a ghafa' tshàm tse me na' nsô yub Egipto là. Me b'a Tshùaben Nsi zin.