Read Medumba Yérémia 1 Bible Online

Yérémia 1 - Medumba bible

Yérémia 1

¹Ntshob Yérémia, nshum Hilkija mo' mèn netèt ghale'te mà Anatot, ntùm ngô Benjamin.

²Tshùaben lo tshob ntshob mi me Yérémia num ze ngelaṅ Yosias, nshum Ammon, mfen Yuda. A lo be be ndù a tswe num fen ngu'njù ntshob tat gham.

³Tshùaben bèn ntshob ntshob mi me Yérémia mba num ze ngelaṅ Yoyakim nshum Yosias, mfen Yuda, tà nèn nkum miagte ngu'njù ntshob ntshù' gham, mba Sédékia nshum Yosias be mfen Yuda là. A be be ndùlala tà nèn nkum ndùse bo lo' ba Yérusalém nèn yi ndà kuan num mbatte ṅwù tàn nà.

⁴Tshùaben tshob me Yérémia ntùm ntshob mi ndù:

⁵Me lo be bom o bam màan ndù m'a lèn o. O lo be tum bam i ndù m'a tsho' o, njab o ngatshob ntshob Nsi ngôngô.

⁶Me bùnte ndù: Tshùaben Nsi, yen mbe me ke' lèn netshobe, nummbe me b'a mônke'.

⁷Tshùaben tshob me ndù: Kà tshob ndù o b'a mônke'. Nummb'o nsi nèn mbwe njoṅ benntùn fa, dù' ze me nsi tum o là, tsho bwe tshob mba ke lo ze me nsi tshob wù là.

⁸Kà bwôg yube, nummbe bag wù bèn mbe, mbe ndù m'a' ke njôg o. Tshùaben bèn ntshobe.

⁹Tshùaben tshag bu i, ndo' nkwag ntshu àm yi, ntshob me ndù: Tshù, me yab ntshob màm ntshu o.

¹⁰Yene, me fà ngù' wù num ngôngô, num nufen nzenze, ndù o temte dù', ndù' kà njwile, ndù o kamte dù', ntswe', kà nkule.

¹¹Tshùaben tshob me ntùm ntshob mi ndù: Ke z'o tshwèt njen Yérémia? Me bùnte ndù: Me tshwèt njen ta' kaṅ tshom.

¹²Tshùaben tshob me ndù: O yen kua' mebwô; nummbe me be nzi tshùalo num ntshob màm, num nezwiagte ju z'a tshob là.

¹³Tshùaben tshob me mbatte yoṅ bàa ntùm ntshob mi ndù: Ke z'o tshwèt njen à? Me bùnte ndù: Me tshwèt njen mo' kab nedume, ndù ntse tshwèt mbùnte ntùm bwe nze tu.

¹⁴Tshùaben tshob me ndù: Nge' nsi bùn à tu kà sa num njoṅ benntùn fa tse bo ntùm ngô là;

¹⁵nummbe m'a' tsiaṅ njoṅ ntumntum fa tse bo ghù nufen ts'a be tu là; Tshùaben bèn ntshobe. Bo nsi se' njoṅ yub fa, mba zit lo te se diaṅ nsém Yérusalém, mbaṅ tse kàbngô, ndiaṅ mbume, mba mbaṅ njoṅ mi ntusô Yuda fa.

¹⁶Me nsi keb ntsha, so ntsha tu bo, num tshùagntù yube, nummbe bo ghua' àm, mfà tshu nelamte tsemo' nsi, ngwù nsi mbwe fa' mbu mube.

¹⁷Mba wù là, taṅ kob so, ndo nsi ntshob ju ze me nsi tshob wù là bo. Kà vètte mbwe bo, mbwôg ndù kà me ghù o vètte mbwe bo.

¹⁸Tshù, me yab o sènni mum ngô fa mba ta' tusô neta là, mba ta' ntom tùne, mba ta' kumba' tùn meba là. Me lo' o ngù kôg zwe' yi num fenfen Yuda, kamkam tse, ghale'te tse mba mum ngô fa.

¹⁹Bo nsi ma' o ntsho, là bo ke nsi tshùa o; nummbe bag wù bèn mbe, ndù me nsi yôg o. Tshùaben bèn ntshobe.