Read Medumba Yérémia 10 Bible Online

Yérémia 10 - Medumba bible

Yérémia 10

¹Bin ju' ntshob mi Tshùaben tshwèt ntshob bin nà me tunndà Israél!

²Tshù mba Tshùaben tshob li: Kà bin fi'te ngôngô, nzin num yub manze. Kà bin bwôg nkeki mi a mfe kamànyam nà. Nummbe ngôngô num mbwôg yube.

³Nummbe tse matnu ntumntum b'a ko'tewut. Bo num nkeb tù ntùm fèn, bu ngafa' lo' njàm mfa' yi num bwe.

⁴Bo num ndo' silba bo gol njo' i yi, ndo' ntùn boa ghama nkwim i yi num neghù ndù k'a nyi'te.

⁵Tshen nsi là b'a mba mbwoṅ ju z'a zi là, ke ke ntshobe. Bo num nket yube, nummbe bo ke' ku'ni nezine. Kà bin bwôg yube, nummbe bo ke' ku'ni neghù nukebwô, ke bèn ngù neta neghù numebwô.

⁶Tshùaben, sàm mènntùn z'a be mba wù là ke' be. O b'a ndùb, lén so tshùa njam neta o mbe se ndùb.

⁷Mfen ngôngô, we z'a ke nsi bwôg à? Mèn z'a bwô nebwôg i là b'a wù. Nummbe sàm mènntùn z'a be mba wù là ke' be netèt njoṅ ghazenu ngôngô, mba ntùm njoṅ tshob nufen fa.

⁸Njoṅ yub fa b'a tshen, mbe kagni. Yub nesiaṅte b'a ko'tewut, a b'a tù ntshwèn.

⁹Bo tshwèt ndo' nkub silba Tarsis nse' yi, nke ndo' gol z'a fe Ufaz là nse' yi. Ngafa' bo bu ngave lo' yub mfa' fa' yi. Tse nzwe tshen nsi là b'a nto'nto' nenàfi bo meba. Njoṅ i fa b'a fa' kum ghave.

¹⁰Là, Tshùaben b'a Nsi kua' nenùne. A b'a Nsi z'a tswe ntùn nà, mbe mfen z'a tswe matmat là. Yantù i be ngù tsha' nyi'te. Ngôngô ke' be fènte tshùagntù i.

¹¹Bin nsi tshob bo ndù: Tshen nsi là tse bo ke' bèn nabte kamànyam bo tsha' là nsi mi nsitsha'a, tun bam kamànyam.

¹²A lo lo' neta i nabte tsha' yi, ndo' zenu i nte njù yi nsi. A lo lo' ze nesiaṅte nyitte kamànyam yi.

¹³Ntse be mbe ju' nz'é mfe kamànyam nke ntshu'u. A be ngù ndot nke ndo num ntôg tsha'a. A be ngù mbeba'mbaṅ bo mbaṅ be. A num nsô fetmbaṅ ntùm tse nta.

¹⁴Mba zit mèn no be ntshùa njam ze nesiaṅte ntù' tshen. Mba zit ngave lo tuswe be nko i num neto i z'a kom nà. Nummbe tshen neto là b'a tse tatte, mbe ndù zwiag ke' be num bo.

¹⁵Bo b'a tshu banban, mb'a fa' tatte. Bo nsi bite fa ndùse keb ntsha nsi te nsi là.

¹⁶Là, mèn z'a be mi ntsi' Yakob là ke' b'a ndùlala. A b'a yi na' mbèn nabte njoṅ tshu fa. Israél b'a kua' ze nzwit mèn. Lén se b'a Tshùaben tàndà ntsho.

¹⁷Ba Yérusalém, bin tse bin b'a ntùm nge' là, bin lo' tshu tsin nèn yi.

¹⁸Nummbe tshù mba Tshùaben tshob li: Yen yoṅ i li me nsi ma' ba la' tà ngùanesà mba bo num ma' loṅ num shùmte là. Me nsi mem yub bag bag, ndù ngakeban kab mbu num bo.

¹⁹Ghayennge' mba bag là, bo be'te yage, mfaṅ yag tshwèt nja neshu. Là bag, bag tshob ndù: A nu li z'a tsho yag là. Bag a' fènt'é.

²⁰Tshag ntàb sate. Njoṅ tshag mvèt fa kebte. Nshumnshum tshag kù yage, bo ke' bèn mbe. Bag ke' bèn ngù ts'a b'a taṅte tshag ntàb bag là, ts'a b'a nabte mag mba' bag là.

²¹Ghatshagte na' mb'a tshen, bo lo ke diag Tshùaben. A ndùlala bèn ngù kà bo ke sin, kà nyàm tshob fa nsate mbi.

²²Tshù mo' tshu'te là be tshwèt nju' là. A b'a mo' tshu'te ndùb z'a fe tu là. A nsi lo' ntusô Yuda kaṅ kônkwa yi, kaṅ ngab ba mbù tshwèt yi.

²³Me lèn me Tshùaben, ze manze mènntùn ke' ke ndôt'a yi, ndèn ndù mèn be mbe zin ke bèn nke ntshagte nku mi.

²⁴Tshùaben so ntsha tu bag, là, lo' a nenùn nso yi, ke b'a ntùm yantù o, mbwôg ndù k'o biagt'àm me tù' ju banban.

²⁵Sa tshùagntù o num ngôngô tse bo ke' lèn o là, num ntumntum tse bo ke' be tsiaṅ lén so là. Nummbe bo tshwèt mi Yakob, nke mi i, nke mbiagt'é. Bo tshwèt nsate dù'ntswe i.