Read Medumba Yérémia 11 Bible Online

Yérémia 11 - Medumba bible

Yérémia 11

¹Tshù ntshob mi Tshùaben na' ntshob Yérémia li:

²Ju' ntshob sen kàn ni, nèn ntshob ba Yuda boa ba Yérusalém.

³Tshob bo ndù: Tshù mba Tshùaben, Nsi Israél tshob li: Ngandon b'a mèn z'a ke' tshùb ntshob sen kàn ni,

⁴se me na' mfà tà tsine, mum lé'njù se me na' nsô yub Egipto, ntùm ndà mbwôg tàlàm nà. Me lo tshob ndù: Bin ju' nz'àm, ngù mba ke lo ze me nsi tshob bin nà, ndùlala ndù bin be yàm nzwit mèn, tu wul àm be Nsi zin.

⁵A be ndùlala mba m'a' zwiagte nka'ni mi me na' nka' tà tsine, ndù me nsi fà ngô ze mbùn be nswe' bwe bo ṅwa' là bo, mba bin tshwèt njen sènni là. Me bùnte ndù: Amén, ṅ me Tshùaben!

⁶Tshùaben tshob me ndù: Tshob njoṅ men ntshob là fa ntùm ntusô Yuda, mba num tse manze Yérusalém, nke ntshob ndù: Bin ju' ntshob sen kàn ni, nke nze men ntshob là.

⁷Nummbe me lo te bu num tà tsin fe lé'njù se me na' nsô yub Egipto là tà nse' nkum sènni. Me lo ke nte bu num bo njoṅ nkebnjù fa nke ntshob ndù: Bin ju' nz'àm!

⁸Là, bo lo ju' ke kù' ntoṅ; mba we lo tam à njam nkwatenu ntù i ze kebwô; ndùlala me lo ghù ntshob sen kàn ni bumte num bo, kàn se me na' mfà ndù bo ke nze, bo ke nze tshob là.

⁹Tshùaben tshob me ndù: Ba Yuda boa ba Yérusalém tsin tsham netèt bo.

¹⁰Bo bèn njam ntùm mfànnu mbwe tà tshob tse bo na' nga neju' ntshob màm nà. Bo tam njam tsemo' nsi, nke mfa' bo. Tunndà Israél bo tunndà Yuda bagte kàn sàm se bag à tà tshob na' ngwat là.

¹¹A ndùlala, Tshùaben tshob ndù: M'a' ghù nge' tsho yube. Nge' tse be bo ke tshu' wut yub bu bo là. Me ke nsi bùnte ndùse bo nsi kua' tsiaṅ àm nà.

¹²Ntusô ba Yuda boa ba Yérusalém nsi nèn mbaṅ nsi tse bo ke mfà ju nelamte bo là tsiaṅ lén sobe. Là, bo ke nsi yôg yub num nge' yub.

¹³Nummb'o ghù nsi à njoṅ mb'o ghù ntusô là me Yuda. Bin kù' mbom ntômbwôg ba neto à ndaṅndaṅ mba Yérusalém kù' ngù ba manze là. Bin ke nton tshu nelamte Baal à bwe.

¹⁴Mbe se' mba wù Yérémia là, kà ma' mbu num ze nu yen nzwit mèn nà. Kà le'te ke bèn mbu' mbu. Nummbe me ke nsi ju' ju ze bo tshob là, ndùse bo nsi tsiaṅ lén sàm num nu nge' yub là.

¹⁵Ke ze yàm nzwit mèn me num nkô i nsi ghù ntùm ndà àm à? Nu nefètte lem be ntôg bwe neshu ndù a bèn ngù. Mbàb ze bo lo' ngamte Nsi yi là nsi ghù o tum ntshu nge' ké? O ke njob ngu' à ndùs'o ghù nukebwô là.

¹⁶Tshùaben lo tswi lén so tù mfèt nete'e se ntàm mi bwô là. Là, Nsi a' tshùa njam tshu'te ndùb nte mbwôg num mfu mu, nkaṅ mu kù fafa.

¹⁷Tshùaben tàndà ntsho z'a na' mbwe wù tù mfèt là lo te tunndà Israél bo Yuda, ndo' nge' nse' yi num bo. A be ndùlal'a num tshùagntù ghatshagte yube. Nummbe bo lo fà labinda Baal, ndo' nkamte yantù Tshùaben yi.

¹⁸Tshùaben lo soṅ àm, me lèn, o lo ghù me lèn ngùninu mub me Tshùaben. O lo ghù me lèn ngùninu mube.

¹⁹Me na' mbe netèt bo à mba mén njùmbwe ze bo tshwèt nèn wat là. Me lo ke lèn ndù bo tsin tsham num àm ntùm nkwate kebwô, nke ntshob ndù: Bo biagte tù bo tàm se. Bo sô i num tsha' ben tse bo be ntùn nà, ndù kà bo bèn nekwimte lén se.

²⁰Nda' ndù Tshùaben tàndà ntsho b'a ngatsho'te ze netsine. A be ntswe ntùn, ndèn bam mèn bo ntù i. Me nsi yen yagte mba' z'a nsi tsho num bo là. Nummbe me yab njoṅ nu fa mum mbu mi.

²¹Ba Anatot tshwèt nya' tu àm, nke ntshob ndù kà me tshob ntshob Tshùaben, ntag ndùlala mba bo a' zwi àm. A ndùlala Tshùaben tam bu i num bo ntshob ndù:

²²Me nsi so ntsha tu bo. Tshob ghuan benntùn nsi kwùt'a num ṅwi. Nshumnshum tshob boa ngonngon tshob nsi kwù à nziku'.

²³Sàm mèn ke nsi tum bwe, nummbe me nsi ghù nge' tsho ben Anatot, num ngu'njù ze me nsi so ntsha tu bo là.