Read Medumba Yérémia 12 Bible Online

Yérémia 12 - Medumba bible

Yérémia 12

¹Yérémia tshob Tshùaben ndù: O b'a mèn netsin neshu k'a ke bwô ndù bag wù fiaṅte nu. Mba tà ndùlala m'a' bètt'o ju num yu netsho'te: Numke ghamfùm nke njôg mebwô njoṅ yub fa à?

²O lo bwe yube, bo taṅ nga, nku'u, njam ntàme. O be mbe num nkub ntshu mube, là, mb'a ngùanesà ntù bo.

³Là, wù Tshùaben lèn àm, o be njen àm, ntswe' ntun num ntù àm z'a b'a mbaṅ o là. Sô yub mba njùmbwe tse bo nsi watte là. Nabte yub mum lé'njù nezwite.

⁴Ngô nsi be nsivù tà kum à ndùke? Nenà z'a tshwèt là nsi jum tà kum à ndùke? A tshùa num tshùagntù yube, benntùn tse bo tshwèt ntswe bwe là, nyàm boa nsaṅ nsi kwùte, nummbe bo num ntshob ndù: Tshùaben ke nsi yen yag nemiagte.

⁵Tshùaben bètte Yérémia ndù: A be z'o tam nze bin ghazin nku, bo ghù o bot là, mb'o nsi zwe bin à nyàmdiaṅ à ndùke? A be z'o ke ntswe ke bwôg à nda' ntùm ngô ze fite be bwe là, mb'o nsi ghù à ndùke num nkaṅntse Yordan mi a b'a fèn n'à?

⁶Nummbe mba kua' fèt tsho tse bo tunndà tàan nà ze ntsham o. Mba bo tshwèt nto ku' njam o. Kà fà wul o bo, mba ndùse bo nsi tshob ntshob ntùn wù là.

⁷Tshùaben tshob ndù: Me lo ghua' tunndà àm, me lo yèn ntsi' màm nsi. Me lo swèn i ntùm mbu ghakeban tse; a b'a ju ze ntù àm kô neshu là.

⁸Ntsi' màm na' ntù' m'a mba ta' ngwayit z'a ntùm fèn nà. A lo lo nsi, nke ntshu' àm tse. A ndùlala ze me ghù nkembàn num i là.

⁹Ntsi' màm tù' b'a mba sa'mbu' ntshobntshob là ké, kà nsaṅ neghom ngab ndiaṅ i mbum ndù à? Bin nèn nkùmte njoṅ nyàm tshwèt fa, ndo' yub nse' yi dù' ghamte.

¹⁰Ghabéb mbwe yàm lo bagte nkùa àm, nyiaṅte tsha' tshàm nku, ndo' tsha' tshàm ts'a bwô ntshùate là ngù mo' kuni kônkwa yi.

¹¹Bo lo' i ngù kônkwa yi. Tshù i l'à b'a nsivù num miag màm, ndù bo sat'é là. Ngô fa b'a ntùm zwe, là, sàm mèn ke' tshàm num nge' i.

¹²Bo tshwèt njen ghalag dù' nke mfe ntshùa kônkwa nke nse'e, nummbe ṅwi Tshùaben tshwèt mbiagte ngô, neto' mo' taṅ nkum num mo'o. Sàm mèn ke nsi yôge.

¹³Bo lo ywit nsa, ndonni bo tshwèt ntsho' njô. Bo lo lab wut yub à kua' banban. Nu tshu tse bo tsho' là bag yube, nummbe tshùagntù Tshùaben b'a tonkèl i.

¹⁴Tshù nu ze Tshùaben tshob num tshàm ba ndùla' tse kebwô, tse bo tshwèt nkam ntsi' mi me na' mfà yàm nzwit mèn Israél li: M'a' tsho' yub ntùm ngô yube, m'a' sô tunndà Yuda netèt bo.

¹⁵Là, ndùse me nsi sô yub là, me nsi bèn ko ndèn mube. Me nsi lo' mba we lo bèn yi ntùm mi ntsi'i, lo' mba we lo bèn yi ntùm ze ngô.

¹⁶A be ze bo zi'te tse manze yàm nzwit mèn, nke ndo' lén sàm nsaṅlaṅ yi, ntshob ndù Tshùaben b'a ntùn, ndaṅndaṅ mba tu wut tshob na' nzi'te yàm nzwit mèn nelo' lén Baal nsaṅlaṅ yi là, mb'a nsi tshùa ndùlala bo be ntùm fu' netèt yàm nzwit mèn.

¹⁷A be ze bo ke' ju' là, mba me nsi sate lèn yen ngô là, mba me nsi sat'é, biagt'é a bi. Tshùaben bèn ntshob ndùlala.