Read Medumba Yérémia 13 Bible Online

Yérémia 13 - Medumba bible

Yérémia 13

¹Tshùaben tshob me ndù: Nèn njun ta' kob ndeb mebwô, ntaṅ tun o; là kà nyu' i ntùm ntse.

²Me jun kob, mba Tshùaben tshob me là, ntaṅ tun àm.

³Tshùaben bèn ntshob me mbatte yoṅ bàa ndù:

⁴Lo' kob s'o lo njune, s'a be tun o là, lo nsi nèn nze Efrat, ntsho bwe ndem kob là ntùm fé' ta' gholoṅ.

⁵Me nèn, ndem kob mbaṅ Efrat, ndaṅndaṅ mba Tshùaben na' ntshob me là.

⁶Tshùaben tshob me ndùse lé'njù yàm tôg là ndù: Lo nsi, nèn mbaṅ Efrat, ndo' kob se me na' ntshob ndù o lem bwe là.

⁷Me nèn mbaṅ Efrat, ndiag kob dù' ze me lem bwe là ndo'o; là, mbe yen kob là ndù a bagte, ke bèn nku'ni neghù sàm ju yi.

⁸Tshùaben tshob me ndù:

⁹Tshù mba Tshùaben tshob li: Tshù mba me nsi biagte ko'tewut Yuda là, biagte mà zi ko'tewut Yérusalém nà.

¹⁰Yen tshùagkèt nzwit mèn ni z'a be nga neju' ntshob màm, nke mbwe njam nkwatenu ntù i, nke ntam njam tsemo' nsi, num nefa' bo, mbèn nke ngwù nsi mbwe bo là, a bwô ndù a tù' b'a mba sen kob li, s'a ke' bèn nku'ni neghù sàm ju yi là!

¹¹Nummbe me lo taṅ tunndà Israél bo tunndà Yuda tun àm ndaṅndaṅ mba mén mandum be ntaṅ kob tun i là, Tshùaben bèn ntshobe. A na' mbe ndùlal'a ndù bo be yàm nzwit mèn, sàm lén, yàm ghamte, bo nkuni màm. Là bo lo ke ju' nz'àm.

¹²Tshùaben tshob Yérémia ndù: Tshob men ntshob li bo ndù: Tshù mba Tshùaben, Nsi Israél tshob li: Ndu' nsi dun ntùm njoṅ nkab fa: Bo nsi tshob wù ndù: Mba bag ke' lèn yag ndù ndu' nsi dun ntùm njoṅ nkab fa ké?

¹³Ndùlala tshob bo ndù: Tshùaben tshob ndù: Me nsi ghù ba la' dun ndu' ntùm yen ngô li: Fenfen tse bo tswe diaṅkwa David là, ghale'te, ba ghatshob ntshob Nsi boa njoṅ ba Yérusalém fa.

¹⁴Me nsi be'te yube, lo' tsemo' tam tsemo' yi. Lo' ba tà boa bon tam dù' ntshù'. Tshùaben bèn ntshobe. Me ke nsi faṅ sàm mèn, tshàmndèn ke bwe, kondèn ke bwe, sàm ju ke tshwèt ntshètt'àm ndù kà me biagte yube.

¹⁵Bin ju'u, bin kù' ntoṅ! Kà bin be ghako'tewut, nummbe Tshùaben tshwèt ntshob nu.

¹⁶Bin fà ghamte Tshùaben Nsi zin, k'a ngù njam nse'e, kà nku min mfa'te num mbat ts'a ntùm njam nà; bin nsi ke béb nelàne, a lo' i nkaṅ netshaṅ vùkob yi. A nsi lo' i kaṅ neta njam z'a sènte là yi.

¹⁷A be ze bin ke' ju' là, mba me nsi kua' ntùm tsham nu ko'tewut tsine; miag màm nsi fètte ntsenyà, nummbe bwoṅ nyàm Tshùaben nsi nèn ndà kuan.

¹⁸Tshùaben tshob Yérémia ndù: Tshob mfen bo màbwengub ndù: Bin tam tun zin nsi, nummbe kétmbùm se bin ke nkwi wut tsin yi là tum tu bin ngwù nsi.

¹⁹Bo fùn ntusô mi a mà ntèn nà, sàm mèn ke be z'a tsho' là. Njoṅ ba Yuda fa nèn ndà kuan. Bo lo' Yuda fa nèn yi ndà kuan.

²⁰Ba Yérusalém, bin bù' miag min ndôte: Ben tse bo tshwèt mfe tu nse' là. Bwoṅ nyàm ze bo na' mfà wù là b'a yà? Bwoṅ nyàm z'a be nkuni mu là b'a yà?

²¹Bin nsi tshob à mbe ke ndùs'a nsi so ntsha tu bin n'à? A be tu wut tsin na' mbèn ntswite yub netù' tàfa' tsho, netô o ndùlala là. Ya ke nsi kab mbu num bin, ndaṅndaṅ mba ze mènnzwi be ngù ndùs'a tshwèt ndùbte là ké?

²²A be bin tshob ntùm ntù bin ndù, yen nu li tsho yag à numke ké? A b'a mfànnu min mi a gha' mbu là bèn ngù kà tun kum sin ṅu'te, ntun nku min bèn njoṅ ntù' b'a njù be ndende.

²³Be mén Etiopia bate ngub i ké? Be nzwimàntô bwete nto'nto' mi a be num i là ké? Bin tse bin se ka ntùm nukebwô là ghù neghù mebwô à ndùke?

²⁴Tshùaben tshob ndù: Me nsi sate zin mba nyi'nga ze fetmbaṅ be nket nsate num kônkwa là.

²⁵Tshù zin ju là, tshù zin bag i ze me yab bin nà. A be ndùlal'a nummbe bin lo lag àm, njèn wut num ju z'a b'a tatte là.

²⁶Tu wul àm, me nsi bote kum sin ma' tu bin, ndùlala ndù me te zin tù tunntôg num miag benntùn.

²⁷Me yen njoṅ màndà tsin fa, njen nkua' mine, njen bagkèt kat tsin fa num nkônga mba ntùm tômbo'o. Njoṅ tshen tshùaya'nu là fa me yen. Nge' tu bin me Yérusalém. O nsi be ke lànte ntù o tà bèn kum à ndùke?