Read Medumba Yérémia 15 Bible Online

Yérémia 15 - Medumba bible

Yérémia 15

¹Ndùlala Tshùaben tshob me ndù: A be ze be Mosé bo Samuél se' mbwe àm nà, mba ntù àm ke nsi bèn yab num yen nzwit mèn nà. Ta' yub num miag màm bo nène.

²A be ze bo bètt'o dù' bo nsi nèn bwe là, o tshob bo ndù me Tshùaben tshob ndù: Mèn a kwù keya' là nsi kwù keya'! Mèn a kwù ṅwi là nsi kwù ṅwi! Mèn a kwù nziku' là nsi kwù nziku'! Mèn a nèn ndà kuan nà nèn ndà kuan.

³Tshùaben tshob ndù: Me nsi fà nge' bo kuà: ṅwi num newatte yube; mbù num nesoṅ yub nsi; nsaṅ boa nyàm ts'a num tsha' là, num nefèt yub bo nesé'te yube.

⁴Me nsi lo' yub ghù tunu fétwut yi num miag njoṅ nufen fa ts'a nsitsha' là. A be ndùlal'a num Manasé nshum Ezékia, mfen Yuda, num njoṅ tshu fa ts'a ghù Yérusalém nà.

⁵We z'a nsi tshàm ndèn mu Yérusalém? We z'a nsi tshàm num o à? We z'a nsi kaṅ bèn njam se' bètte yu tshô à?

⁶Tshùaben tshob ndù: O lo ghua' àm, o lo lo' mvèn o ntam àm yi; a ndùlala, me nyit bu àm num o, num nebiagt'o, nummbe m'a lagte wù kà mbole.

⁷Me nsi lo' ke'te ke'te yub yi tà kum tôg ngô. Me ke' bèn nefà bon yàm nzwit mèn, me biagt'é. A ke' bate nzin mi.

⁸Fôg bènnzwi nsi yàm tshùa nkwango' mi a dibantse là; me nsi lo' ngasate dù' se' yi num mà ménnshum nka mbwôgtshù, me nsi ghù nge' bo fétwut tsho num bo.

⁹Mènnzwi z'a bwe bon bandum sammbàa là yub, zwiag se ke ntù' netsine. Se lagnyam bi à mbwôgtshù. A b'a ntùm tuswe, ntùm nenywine. Me nsi fà ju z'a tù' netèt bo là ṅwi ghakeban tshobe. Tshùaben bèn ntshob ndùlala.

¹⁰Njennge' mba me là me màa, nummb'o lo bwe àm, ndù me be tunu ntanta bo tantshu ntùm njoṅ ngô fa. Me ke tshwèt nkùa mèn njo, mèn ke ke nkùa àm njo, mba tà ndùlala, njoṅ benntùn fa be nso ndon tu àm.

¹¹Tshùaben tshob ndù: Ṅ, m'a' tomt'o num yu mebwô; a kua' nenùn mbe m'a' tènte ngakeban o k'a ma' mbu wù, num ngelaṅ nge' bo ngùtni.

¹²Be tùn be' tùn s'a fe tu là bo tùn meba ké?

¹³Tsho tshu boa tshunkàb tsho, m'a' ma' njoṅ i fa, bo lag ntsha' yi banban num njoṅ nukebwô fa ts'o ghù ntùm njoṅ yu ngô fa là.

¹⁴Me nsi ghù ghakeban tsho lo' njoṅ i fa nèn yi ntùm ngô z'o ke' lèn nà. Nummbe mo' mbwôg tshwèt nkù ntùm yantù àm, mbe ndù a nsi kù num o.

¹⁵Tshùaben, o lène, kwimt'àm, lôt'àm. Yagte mba' àm num ghama'ni àm, kà sô yantù o; lèn mbe me ke mfènte yen tute li à num tu o.

¹⁶Me lo kwé ntshob mu, njoṅ mi njoṅ i fa; ntshob mu be mfà tsiaṅte ntù àm, bo nkôni yàme. Nummbe bo be ntsiaṅ àm lén so me Tshùaben, Nsi tàndà ntsho.

¹⁷Me ke' be tswe netèt ghatshabte, nke ṅwate bag à bo. Bu o num ntshagt'àm, nte àm njam, nummb'o lo ghù zwe dun ntù àm.

¹⁸Numke yàm nge' mbe ke ghù ndù i, keko' sàm be se ke tùn, nke nga fu negha à? Ndù o nsi be m'a mba ntse tatte, ntse mi be mèn ke yab ntù i num bwe là ké?

¹⁹A ndùlala Tshùaben tshob ndù: A be z'o kaṅ ntù o, a be ze me ghù o bèn njam nà, mb'o nsi tsin num yàm ntshufa'. A be z'o ghù ju ntùn tum ntùm ju banban nà, mb'o nsi b'a mba yàm ntshu là. A b'a bo bèn se' tèl o, ke b'a ndù o bèn nèn tèt yube.

²⁰Tshùaben tshob ndù: Me nsi te o mbwe yen nzwit mèn ni mba kàbngô tùn meba là. Bo nsi kam o, là ke ku'ni nenyi't'o, nummbe me nsi be mbaṅ o, tshètt'o, tshu' o.

²¹Me nsi yôg o mum mbu ghatshùagntù, tshu' o num ze mba' ghafètte lem.