Read Medumba Yérémia 17 Bible Online

Yérémia 17 - Medumba bible

Yérémia 17

¹Tshùaben *gi*tshob ndù: Bo lo' kekùt tùn kà nkite nukebwô Yuda yi. Bo lo' à kekùt tùn ndù a ta neshu mbèn nta ntshebt'é yi num tafèt ntù yube, num ndô ntômbwôg mube, ndùlala ndù bo ke nkwimte ndoṅla' mube,

²ndaṅndaṅ mba bo be nkwimte bon tshob là, a b'a be ndaṅndaṅ mba bo be nkwimte ntômbwôg mub là, nkwimte ntom nelàn ts'a mbaṅ ntù mi a te' num nkônga mi a ṅate là.

³M'a' swèn mbal àm z'a be mfe tu tômbo' là mba ntsha' là boa tshu tsho, tshunkàb tsho, boa njoṅ mbwe' fa ts'o be ntshùa bwe ngù nukebwô ntùm ngô o fa là.

⁴O nsi ghua' ntsi' mi me na' mfà wù là; me nsi lo' o ghù nkuan yi bu ghakeban tsho, ntùm dù' tsha' z'o ke' lèn nà; nummbe bin kwé'te mbwôg yantù àm, z'a nsi ke kù ke bi là.

⁵Tshùaben tshob ndù: njennge' b'a mèn z'a be njé'te num mèn nyiaṅtu là, mèn z'a tsho' ntù i num Tshùaben, ntsin tà ngùanesà là.

⁶A b'a mbatsi bo ghua' i kônkwa là, b'a ke bèn nju' tse ntshùa lamte yôg. A ke ntswe à kônkwa ze tsha' tse jum nà, tsha' tse ngwa be bwe, mènntùn ke be tswe bwe là.

⁷Mènfen b'a mèn z'a num njab ntù i num Tshùaben nà, mèn z'a be nywinte z'a nda' num Tshùaben nà.

⁸A b'a mba tù se bo bwe kaṅntse là, tù s'a be ntshag nga tse nze ntùm ntse là; ke dù' dum no, mb'a ke tshàm tse, mba mfu mi nsi b'a be nefite; dù' jum be nejum num ta' ngu'njù mb'a ke bwôg sàm ju, mb'a nsi ke yam z'a be neyame.

⁹Ntù mènntùn ṅatte ntshùa njoṅ i fa. A bag ntshùa mba ke lo. We z'a ghù nelèn ntù mènntùn à?

¹⁰Me Tshùaben, me be ntswe' ntun ntù mèn, ndèn bam se, ngù mba we lo à mba nzin mi lo' mbe yi là, ndaṅndaṅ mba mfa' mi lo' mbe yi là.

¹¹Mèn z'a be ndo' mfùm nzi yi là b'a mba saṅngab z'a ke' mbum mi a ke' bèn ma' là. A num mbe kum netèt yôg se ngua' yube, ndùse yôg se mi là, yen mèn nà tù' b'a mba ta' nkagni là.

¹²Tshùaben, o b'a diaṅkwa nku'ni, ndù yu ghamte b'a ngu'ngu'. O b'a yag mbwe'.

¹³Tshùaben, o b'a ze nenywinte Israél. Njoṅ benntùn fa tse bo ghua' o là nsi b'a ntùm tuswe. Tuswe nsi ko ben tse bo tsin ngùanesà mbaṅ o là, nummbe bo lo mbaṅ Tshùaben z'a be tumnsi ntse yôg là.

¹⁴Tshùaben, yat'àm, me nsi yate, yôg àm, me nsi yôge, nummb'o b'a màm nkuni.

¹⁵Tshù ba la' bag li, bo tshwèt nkua' ntshob ndù: Ntshob Tshùaben b'a yà? A se' l'à?

¹⁶Mba me là, me lo ju' ntshu o, ke gha nebe ngalôte yube. Tu wul àm ke na' mbèn mbètte lé'njù nge', tu wul o lèn ndùlala. Mo' ju lo ke tum ntshu àm ke be ndù tu wul o lène.

¹⁷A ke' bwô ndù o be ju fétwut me, nummb'o bèn mbe yàm ndàlem mum lé'njù nge'.

¹⁸A bwô ndù tuswe ko ghatsho' nku màm kebàn, ke b'a me. A bwô ndù nu tshùa yube, ke b'a me! Ghù ndù lé'njù nge' se' num bo, mbiagte yub ntùm tshubte nge'.

¹⁹Tshùaben tshob me ndù: Nèn ntsin num nzendà bon ngô, dù' ze fenfen Yuda be ntsho bwe, mbèn ntum bwe là, mba num tsemo' nzendà Yérusalém fa.

²⁰O nsi tshob bo ndù: Fenfen Yuda, ba Yuda boa njoṅ zin fa, tse bin be ntswe Yérusalém, nke ntshùa num tshen nzendà là, bin ju' ntshob Tshùaben.

²¹Tshù ju ze Tshùaben tshob li: Bin zete neket ba lèt ntshùa yi num ba nzendà ts'a Yérusalém nà. Yen nà lôt'a yôg sine.

²²Kà, bam nà neket lèt lé'njù Sabbat ntum yi ndà tsine. Kà bin fa' sàm fa'. Bin ghù lé'njù Sabbat tù' se nelàne, mba me na' ntshob tà tsin nà.

²³Là, bo lo ke kù' toṅ, ngù kekot yub sag, netshètte ndù kà bo ju', mba ndù kà bo bam bo tswite yube.

²⁴Tshùaben tshob ndù: A be ze bin ju' ntshu àm kua' nenùne, a be ze bin be ke ket lèt ntshùa yi num tse nzendà sen tusô li lé'njù Sabbat, a be ze bin ghù lé'njù se tù' se nelàne, bin ke fa' sàm fa' là,

²⁵mba fenfen boa bon mfen tse bo nsi tswete num diaṅkwa David, ko' num nkalig boa ba nyàmdiaṅe, bo boa tàndà ntsho tshobe, ba Yuda boa ba Yérusalém nà, nsi ke tsho num ba nzendà tusô. Bo nsi tswe ntùm sen tusô là matmat.

²⁶Bo nsi fe ntùm ntusô Yuda, ntùm dù' ts'a ghebte Yérusalém nà, num tse tsha' Benjamin, tômbo'o, num mbat mba Négéb se' ton ba nyàm, fà tshule'te, tshu bwôntù, tshu nelamte boa tshule'te tse nema' mbu ntùm ndà Tshùaben.

²⁷Là, a be ze bin ke' ju' ntshu neghù ndù lé'njù Sabbat tù' se nelàne, bo mba me to' zin neket ba lèt ntshùa yi num ba nzendà tusô lé'njù Sabbat là, mba me nsi te mbwôg num tshen nzendà là, a kù mba' mi a Yérusalém nà. Sàm mèn ke nsi ku'ni nebiagte mbwôg là.