Read Medumba Yérémia 20 Bible Online

Yérémia 20 - Medumba bible

Yérémia 20

¹Pashur, nshum Immer, ngale'te, mbèn mbe ngalôte ze ndùb ntùm ndà Tshùaben, ju' mba Yérémia tshwèt ntshob tshen tshu là ntùm ntshob Nsi là.

²Pashur lab ngatshob ntshob Nsi Yérémia, ngù bo ma' i ntùm ndàtsha z'a be mbaṅ nzendà Benjamin, mfe tu, ntùm ndà Tshùaben nà.

³Njù làn a sô i, ndùlala Yérémia tshob yi ndù: A ke' b'a lén Pashur là se Tshùaben fà wù là, a fà à lén Magor-Misabib wù (yen nà b'a ndù fétwut num njoṅ dù' fa).

⁴Nummbe Tshùaben tshob ndù: M'a' lo' o ngù tunu bwôg yi num kua' yu tu wut, mba num shun tsho. Ghakeban tshob nsi lo' ṅwi biagte yub yi be kua' num miag mu. M'a' swèn njoṅ ba Yuda fa ntùm mbu mfen Babilon. A nsi nèn bo Babilon, tsho bwe zwite yub ṅwi.

⁵M'a' swèn tshunkàb sen tusô li, njoṅ tshu fa ts'a fa' là, njoṅ tshu tanjoṅ fa ts'a lé' là, njoṅ tshunkàb fenfen Yuda fa ntùm mbu ghakeban tshobe. Bo nsi lag njoṅ i fa mba ntsha' ntsho là, ket njoṅ i fa nèn yi Babilon.

⁶Wù Pashur, boa njoṅ ben fa tse bo be ntswe ndà o là, bin à bo nsi nèn ndà kuan Babilon. O nsi kwù bwe, bo tshoṅ o bwe, wù bin à shun tsho, tshen nà ts'o na' ntshob ntshob tatte bo là.

⁷Tshùaben, o lo tagt'àm, me faṅ ndù o tagt'àm. O lo tshùb àm, kà nte ku tu àm. Me ke ntù' b'a ju tshabte mba sit lé'njù lo. Njoṅ benntùn fa num ntshabt'àm.

⁸Nummb'a be mbwô ndù me kua' neta njoṅ ngelaṅ fa me tshwèt ntshob nu là. A num mbwô ndù me kua' num nu nefètte lem bo nefétte. Ntshob Tshùaben ke mbe m'a' nu tuswe bo komzwi mba sit lé'njù lo.

⁹A be ze me tshob ndù me ke bèn nekwat'é, me ke bèn ntshob nu num lén se là, mba mo' ju nsi ke be ntùm ntù àm mba mbwôg z'a tshwèt nkù là, ndù yen ju là lem tà ntùm mvôg màm. Me be nkagtùn nefènt'é, là ke ku'ni tshàm.

¹⁰Nummbe me be nju' nkwate kebwô benntùn yàme, fétwut z'a diaṅ dù' mbum nà, bo nke tshob ndù: Bin bot'é, bag bin nsi bot'é! Njoṅ benntùn fa tse bag à bo na' mbe ntshu ntshù' là tshwèt ndôte mbe ze me vù nsi là; nke ntshob ndù: A be z'a faṅ bo fùt'é là, mba bag nsi kab mbu num i, yagte mba' num i.

¹¹Nda' ndù Tshùaben ze bag yi be là b'a kua' neta sa'nde'e. A ndùlala, ghatsho' nku màm kebàn ke nsi tshùa àm, bo nsi tiag vù nsi. Yub nevù nsi ma' yub ntùm tuswe. Yen nà nsi b'a tuswe matmat, ze ke lagte.

¹²Tshùaben tàndà ntsho, wù z'o be ndiag ntun num mèn netsine, wù z'o be ntswe' ntun, ndèn bam mèn bo ntù i là, be me yen yagte mba' z'o ghù num bo là ké? Nummbe me yab yàm nu à ntùm mbu mu.

¹³Bin yob kwi Tshùaben, bin nyàmt'é! Nummb'a be ntshu' zwiag njennge' ntùm mbu ghatshùagntù.

¹⁴Ndon tu lé'njù se bo bwe àm bwe là. A bwô ndù lé'njù se màa bwe àm bwe là, tù' lé'njù ndon, mbwoṅ mbotni.

¹⁵Ndon tu mèn z'a soṅ tàa yen tshô là là. A lo ghù tsiaṅte dun ntù tàa. A tshob tàa ndù: Bo bwe mén mandum wù.

¹⁶A bwô ndù yen mèn nà tù' à mba ntusô mi Tshùaben na' nsate, ke ghù kondèn nà. A bwô ndù a ju' nekua' nkebnjù, nju' nkua' ntsho mbwôgtshù.

¹⁷Ke na' ngù me ke kwù tshàm bam màa à? Numke bam se na' ntù' be ke tù' sàm fi à? A na' ntù' be ke lé' àm zwe' i matmat numke?

¹⁸Me na' ntum bam à numke? Neke njen ntobni boa nge'. Mba ndù tshàm lé'njù ke ntôg à be ntùm tuswe ké?