Read Medumba Yérémia 22 Bible Online

Yérémia 22 - Medumba bible

Yérémia 22

¹Tshùaben tshob me ndù: Swe' nèn ntshwèt mfen Yuda, ntshob men ntshob li bwe ndù:

²Wù mfen Yuda, z'o be num diaṅkwa David là, wù bin ben tsho, mba ngô, bin tse bin be ntshùa num tshen nzendà din nà, bin ju' ntshob Tshùaben.

³Tshù ju ze Tshùaben tshob li: Bin ghù nu ndaṅndaṅ bo nunetsine, bin tshu' mèn bo tshwèt mfétt'é là bu ngafétt'é. Kà bin kag yantù ntù ngùn, ke fam i. Ke ghù ndùlala num ménntse ke mfôg mènnzwi lo; kà bin lo' lem ba mbu' ndàm yen dù' li yi.

⁴Nummb'a be ze bin tshùb men ntshob li là, mba fenfen tse bo tswe num diaṅkwa David là, nsi tshùa num ba nzendà yen ba' li tsho bwe. Bo nsi be tsho bwe ndù bo ko' ntùm nkalige, num ba nyàmdiaṅe, bo, ghafa', mba ngô.

⁵Là, a be ze bin ke' tshùb men ntshob li là, mba me lo' tu wul àm nsaṅlaṅ bwe ntshob ndù yen ba' li nsi tù' fam. Tshùaben bèn ntshobe.

⁶Nummbe Tshùaben tshob num tunndà mfen Yuda ndù: O be m'a mba Galad, mba tshaṅ tu Liban nà. Là, mba tà ndùlala me tshob nsaṅlaṅ bwe ndù me nsi lo' o ghù kônkwa yi, o tù' fam.

⁷Me nabte ghasate dù' num o, mba zit lo boa tse tshu fa' bu i. Bo nsi vù num o, be'te mbwô mbwô ntom sédra tsho fa, ma' ntùm mbwôge.

⁸Ngôngô nsi tshùa mbaṅ sen tusô là, ke bètte bo bo ndù: Numke Tshùaben ngù num sen mà tusô ndùb li ndù à?

⁹Bo nsi bùnte ndù: A b'a nummbe ba la' tse lo ghua' kàn Tshùaben Nsi yub, nke ngwù nsi mbwe tsemo' nsi, nke mfa' bo.

¹⁰Yérémia tshob ndù: Kà bin làn mèn z'a kwù là, kà bin lab wut tsin num i. Bin làne, ndàn à mèn z'a tshwèt nèn nà, nummb'a ke nsi bèn se'e, a ke nsi bèn yen ko' ze ngô bo bwe i bwe là.

¹¹Nummbe Tshùaben tshob à ndùlala num Shallum nshum Yosias, mfen Yuda, z'a ke tô num ze dù' tàab là. A nsi tum yen dù' li ke bèn nzi mbèn bwe.

¹²Là, a nsi kwù ndà kuan dù' ze bo lo' i nèn yi bwe là, ke bèn nzi nte lag num ze ngô.

¹³Njennge' b'a mèn z'a tshwèt mbe kut ba' i, ke ke ngù nunetsine, nke ndo' mfùm nkebte nto'ndà mi yi là. A be ngù mfèl i fa', a ke fà ntsho'fa' yi, ke fà ze nkàbfa' yi.

¹⁴A be nke ntshob ndù: M'a' kut ta' ba' ndùb, nkebte nto' mi a zi; ngù ntôndà mi ghu', ndo' mfé sédra nkabte yi, ndo' la meba nse' njoṅ i fa yi.

¹⁵O kwate mb'o be mfen à nummb'o kô sédra ntshùate là ké? Mba tàan lo ke njù mbèn nu, là nke ngù nunetsin bo nu ndaṅndaṅ, ndùlala mba ze ke lo nke ngwù lag.

¹⁶A lo ke ngù nunetsin mbwoṅ bo njennge', njoṅ i fa nke ntôg mebwô. A ke b'a nelèn àm nà ké? Tshùaben bèn ntshobe.

¹⁷Là, o ghù miag bo ntù à nda' nelo' nzwiagte ghe't'o yi, mfètte lem mbu' yi, nelo' mfétte yi bo nelo' mfètte lem yi.

¹⁸A ndùlala tshù ju ze Tshùaben tshob num Yoyakim nshum Yosias, mfen Yuda li: Bo ke nsi làn i tshob ndù: Wé, mfèl àm ze mandum! Wé, mfèl àm ze mènnzwi! Wé, tshùaben! Wé, mfen diba.

¹⁹Bo nsi tshoṅ i mba bo num ntshoṅ kekwèn nà. Bo nsi soṅ fe i ma' njam ba nzendà Yérusalém.

²⁰Ko' nèn num Liban nkua'a. Tshag nz'o tù num Basan. Tsin tu Abarim nkua'a! Nummbe bo nyiaṅte njoṅ màndà tsho fa nku.

²¹Me lo tshob nu wù ngelaṅ z'o na' mbe ntùm fu' là. Là, o nke ntshob ndù: Me ke nsi ju'u. Tshù mb'o ke ngù fe ndùs'o be mônke' là. O lo ke ju' ntshu àm.

²²Njoṅ tsho ghabéb mbwe fa, fetmbaṅ nsi ket yube. Njoṅ màndà tsho fa nsi nèn ndà kuan. O nsi b'a ntùm tuswe, tuswe ghom o, num njoṅ nukebwô o fa.

²³Wù z'o be ntswe num Liban, nte nkàn o ntùm sédra là, o nsi tsham zwe à ndùke ndùse ba ya nsi kab mbu num o l'à? Tshen ya là nsi fute tse mènnzwi be ngù ndùs'a tshwèt ndùbte là.

²⁴Tshùaben tshob Yékonia nshum Yoyakim mfen Yuda ndù: Me nu ngu wù ndù a be z'o b'a mba kwa bu àm ze zwim nà, mba me nsi sô o.

²⁵Me nsi swèn o ben tse bo tshwèt nya' tu o là, ben ts'o be mvètte mbwe bo là, swèn o Nébukanetsar mfen Babilon boa ba Kaldéa.

²⁶Me nsi ma' o bin màan z'a bwe o là ntùm ngô ze bo ke' bwe zin à bwe là. Bin nsi kwù à bwe.

²⁷Bin nsi bèn ntùm ngô ze bin kwate nebèn bwe là.

²⁸Yérémia bètte ndù: Ndù yen Yékonia là b'a kab newage, z'a tsit là ké? Ndù a b'a ju ze njoṅ i ke bwe là ké? Numke bo ngua' yube, yi bo nzwil i, ma' yub ntùm ngô ze bo ke' lèn n'à?

²⁹Tsha', tsha', tsha', a bwô ndù o ju' ntshob Tshùaben.

³⁰Tshù mba Tshùaben tshob li: Bin kite lén yen mèn ni a mb'a ke' ghù bon nà, mba mèn yen nà ze lé'njù yôg ke nsi lamte num i là. Nummbe sàm mèn ke nsi tum ze nzwit tswe num diaṅkwa David tô mum ngô Yuda.