Read Medumba Yérémia 26 Bible Online

Yérémia 26 - Medumba bible

Yérémia 26

¹Ndùse se fen Yoyakim, nshum Yosias, mfen Yuda ke nto'te là, Tshùaben tshùa num ntshu Yérémia ntshob men ntshob li, ntshob ndù:

²Tshù mba Tshùaben tshob li: Tsin bam ntshundà ndà Tshùaben; kwimte njoṅ ntshob fa me tshob wù là ben tse bo tshwèt ntumte ntùm ntusô Yuda, nse' nete nkekwi' mub nsi ntùm ndà àm, me Tshùaben nà; kà sébte ju num bwe.

³Be mo' ndù bo ju' ntshu o, mba we lo kag manze kebwô nsi, me tshùa ndùlala nga neghù nukebwô ze me na' njù' neghù num bo, num nu ngùninu mub mi tshùagntù là.

⁴Ndùlala o nsi tshob bo ndù: Tshù mba Tshùaben tshob li: A be ze bin ke' ju' ntshu àm, a be ze bin ke' ze ntshù' màm, mi me yab mbwe bin nà;

⁵a be ze bin ke' tshùb ntshob ba ghatshob ntshob Nsi, ghafa' tshàm tse me tum bin, tse me na' ntum fe mbwe ke tsin netum yub bin, là bin ke ju' ntshu yub là,

⁶mba me nsi ghù num yen ba' li mba me na' ngù num njwèn Ndà Nsi ze me na' nsate Silo là; ngù num sen tusô li kà nzwit benntùn fa num nsitsha' nke ndo' nso ndon yi là.

⁷Tshù, ghale'te boa ba ghatshob ntshob Nsi, mba ngô lo ju' mba Yérémia tshwèt ntshob men ntshob li ntùm ndà Tshùaben nà.

⁸A yoṅ mbe miagte netshob ju ze Tshùaben tshob ndù a tshob ngô là, ghale'te, ba ghatshob ntshob Nsi bo bwoṅ benntùn kab mbu num i, nke ntshob ndù: Bo zwi i!

⁹Numk'o nke ntshob lèn men ntshob li num lén Tshùaben à? O tshwèt ntshob mbe yen ba' li nsi b'a mba ze Silo, nke ntshob mbe sen tusô li nsi tù' fam, sàm mèn be ke bèn ntswe bwe. Ndùlala bwoṅ benntùn tse'te mbaṅ Yérémia ntùm ndà Tshùaben.

¹⁰Kamkam Yuda be ju' yen tshô là, ndo mà ndà mfen nko' nèn ndà Tshùaben, ntswete num nzendà ndà Tshùaben, z'a b'a nzendà nswe là.

¹¹Ndùlala ghale'te boa ba ghatshob ntshob Nsi tshob kamkam bo bwoṅ benntùn ndù: A vùkob bèn mbot yen mèn ni, nummb'a tshob kebwô num sen tusô li; kua' tu wut zin bèn ndo' ntoṅ min nju' yi.

¹²Là Yérémia tshob njoṅ kamkam fa bo ngô ndù: A b'a Tshùaben bèn ntum àm me tshob tshu tse bin ju' là num yen ba' li bo sen tusô li.

¹³Ndùlal'a bwô bin bate nzin min bo zin mat neghù. Bin ju' nze Tshùaben Nsi zin, ndù a gha neghù nukebwô z'a jù' neghù num bin nà.

¹⁴Tu wul àm, me b'a mum mbu mine. Bin nsi ghù num àm mba bin kô là, mb'a nsi bwô zin nà.

¹⁵Là bin lèn ndù a be ze bin zwi àm nà, bin lèn kua' mebwô mbe bin ket lem mbu' ndam wut tsin yi, ndam sen tusô li boa ba la' tse yi; nummb'a b'a kua' Tshùaben bèn ntum àm bin, ndù me se' ntshob men ntshob là.

¹⁶Kamkam bo ngô fa tshob ghale'te boa ba ghatshob ntshob Nsi ndù: Vùkob ke' bot yen mèn ni. Nummb'a tshob nu be à num lén Tshùaben Nsi be.

¹⁷Tsemo' ywèn benntùn ntùm ngô lo nsi, ntshob njoṅ ngô fa z'a bumte nsi là ndù:

¹⁸Mika ze Moréshet lo ke ntshob ntshob Nsi num ze ngelaṅ Ezékia, mfen Yuda, nke ntshob ngô Yuda ndù: Tshù mba Tshùaben tàndà ntsho tshob li: Bo nsi dù' Sion mba ta' nà là. Yérusalém nsi tù' à ta' fèt ndoṅ. Mbat ndà Tshùaben nsi tù' neta fèn.

¹⁹Ezékia mfen Yuda bo ngô Yuda lo zwi i ké? Ezékia lo ke bwôg Tshùaben ké? Bo lo ke ma' à mbu yi ké? A lo be ndùlala k'a gha nebèn ngù nukebwô z'a jù' neghù num bo là. Ndù ze be tu wut nsi tsho ntùm lèn yen mà nukebwô ndùb li ké?

²⁰Mba mo' mèn lo bèn nke ntshob nu num lén Tshùaben: A na' mb'a Uria nshum Shemaéya, ze Kiriot-Jearim. Mba yi lo tshob nu num sen tusô li bo yen ngô li, ntshob à be kua' ndaṅndaṅ mba Yérémia là, mbèn ntshob be kua' nu ntshù'.

²¹Mfen Yoyakim, njoṅ tse neta benntùn fa, njoṅ tse kamkam fa ju' men ntshob là. Mfen lo ke ndiag nezwi i. Uria ju' yen nu là, mbwôg nkù nèn Egipto.

²²Mfen Yoyakim tum benntùn Egipto, Elnatan nshum Akbor. A tum i boa benntùn Egipto.

²³Bo ghom Uria Egipto ntum yi nèn mfà mfen Yoyakim, a wal i, ma' fe i num ntufi bon ngô.

²⁴Mba tà ndùlala ze mba' Ashikam nshum Shafan kabte Yérémia, ntshètt'é, ke bam ndù bo swèn Yérémia ngô, bo zwi i.