Read Medumba Yérémia 27 Bible Online

Yérémia 27 - Medumba bible

Yérémia 27

¹A lo be num neto'te fen Sédékia nshum Yosias, mfen Yuda, Tshùaben tshob men ntshob li Yérémia:

²Tshùaben tshob me ndù: Nabte ba nkù boa nkele'e, nso njoṅ i fa tô o.

³Yen nà mbe tshùa o tum njoṅ i fa mfen Edom, mfen Moab, mfen Ammon, mfen Tiro bo mfen Sidon. O nsi tum njoṅ i fa à ghanze tse bo se' mbaṅ Sédékia, mfen Yuda, mà Yérusalém nà.

⁴O nsi tswi yen nkùn ni bo, bo tsho tshob tàfa' tshob ndù: Tshù mba Tshùaben tàndà ntsho, Nsi Israél tshob li: Bin tshob tàfa' tsin ndù:

⁵A b'a me na' mbèn ndo' mba' neta bu àm nabte tsha' boa benntùn mba ba nyàm tse bo be num nsitsha' là yi. Me num mfà i mèn ze ntù àm kô i là.

⁶Ndonni me swèn njoṅ tshen ngô là fa Nébukanetsar mfen Babilon, ngafa' àm; me fà mba ba nyàm tshwèt yi ndù bo ke mfa' yi.

⁷Njoṅ tshen ngô là fa nsi tù' kuan tse, mba tse nshum i, mba tse nshum nshum i, tà nkum ndùse ze ngô ze nsi tù' nkuan ngôngô yàme, boa fenfen ndùbndùb là.

⁸Tshùaben tshob ndù: Me nsi so ntsha tu ngô ke nufen no z'a nsi gha nefa' Nébukanetsar mfen Babilon, nga neket se kele' tô i là. Me nsi lo' a ṅwi, nziku' bo keya' so ntsha yi tu bo, tà nkum ndùse bu i nsi biagte yub fa là.

⁹A ndùlala, kà bin ju' ju ze ghatshob ntshob Nsi tsine, ghaka tsin tshwèt ntshob là. Nummbe bo be ntshob ndù: Bin ke nsi zi be kuan mfen Babilon.

¹⁰Nummbe bo ke ntshob a tatte bin, neghù ndù me tshag zin nesà bin bi ngô zine, me ta' zin bin nèn mbite.

¹¹Là ngô z'a ben tu i nsi ket kele' mfen Babilon tô i, bam nebe nkuan nà, me nsi faṅ i ntùm ze ngô, a ke ndù' i, nke ntswe bwe. Tshùaben bèn ntshobe.

¹²Me bèn ntshob nu mba Sédékia, mfen Yuda, ntshob yi be mba ntshù', ntshob ndù: Bin ben tu tsin nsi, mbam neket se kele' mfen Babilon. Bin fa' yi, mfa' mba ze ngô. A nsi tshùa ndùlala bin yôge.

¹³Numk'o nkô neswèn wul o bo ngô o ntshùag ṅwi, nziku' bo keya' à? Tshùaben lo tshob yen nu là num mba zit ngô lo z'a ke nsi kô netù' nkuan mfen Babilon nà.

¹⁴Kà bin ju' ntshob ba ghatshob ntshob Nsi tse bo be ntshob bin ndù: Bin ke nsi be kuan mfen Babilon nà. Nummb'a b'a tatte là ze bo tshwèt ntshob bin nà.

¹⁵Me ke bèn ntum yube. Bo ke ntshob à tatte num lén sàm. Me nsi ta' zine, bin bi bin à ba ghatshob ntshob Nsi tsine. Tshùaben bèn ntshobe.

¹⁶Me kaṅ wul àm, ntshob ghale'te mba ngô ndù: Kà bin ju' ntshob ba ghatshob ntshob Nsi tse bo tshwèt ntshob ndù: Tshù, a tù' mén nda'nda' bo ket tshundà ndà Tshùaben Babilon mbèn yi njam nà. A b'a tatte là ze bo tshwèt ntshob là.

¹⁷Kà bin ju' ntshu yube. Bin fà wut nsi mbwe mfen Babilon njôge. Bin ghù sen tusô li tù' kônkwa numke?

¹⁸A be ze bo b'a kua' tse ghatshob ntshob Nsi Tshùaben, ndù ywèt tse num num bo là, bo zin kam mbaṅ Tshùaben tàndà ntsho, ndù kà bo lo' tshu ts'a tù' Ndà Nsi, ntshwèt mfen Yuda mba mà Yérusalém nà nèn yi Babilon.

¹⁹Nummbe Tshùaben tàndà ntsho tshob num ba ntom, num dibantse, num bon miag ntse boa tsemo' tshundà ts'a tù' ntùm sen tusô li,

²⁰tse Nébukanetsar mfen Babilon na' mbe ke lo' ndùs'a ke ndo' Yékonia nshum Yoyakim mfen Yuda Yérusalém nèn yi Babilon boa njoṅ kamkam Yuda mba tse Yérusalém nà;

²¹tshù ju ze Tshùaben tàndà ntsho, Nsi Israél tshob num tshu ts'a tù' Ndà Nsi, ntshwèt mfen Yuda mba Yérusalém nà li:

²²Bo nsi lo' yub nèn yi ndà kuan Babilon, bo ghô bwe tà nkum ndùse me nsi diag yube, sô njoṅ i fa ko' yi bèn yi yen dù' li là. Tshùaben bèn ntshobe.