Read Medumba Yérémia 28 Bible Online

Yérémia 28 - Medumba bible

Yérémia 28

¹A lo be num neto'te fen Sédékia, mfen Yuda, num mbatte ṅwù tàn ntùm mbatte ngu'njù kuà mba Hanania nshum Azzur, be ngatshob ntshob Nsi Gabaon nà, a se' Ndà Nsi, mbwe ghale'te mba mbwe bwoṅ benntùn, ntshob me ndù:

²Tshù mba Tshùaben tàndà ntsho, Nsi Israél tshob li: me be' kele' mfen Babilon.

³A tù' ngu'njù bàa, me ghù tshundà Ndà Nsi tse Nébukanetsar mfen Babilon na' ndo' nèn yi Babilon nà bèn mbèn njam yen dù' li.

⁴Tshùaben tshob ndù: Me nsi lo' Yékonia nshum Yoyakim, mfen Yuda boa njoṅ benntùn fa tse bo nèn bo ndà kuan Babilon ndù bo fe à Yuda là bèn yi njam. Nummbe m'a' be' kele' mfen Babilon.

⁵Là Yérémia ngatshob ntshob Nsi, bùnte Hanania ngatshob ntshob Nsi, mbwe ghale'te mba ngô fa tse bo be ntùm ndà Tshùaben nà ndù:

⁶Yérémia ngatshob ntshob Nsi tshob ndù: Amén! A bwô Tshùaben ghù ndùlala. Tshùaben zwiagte ntshob mi o tshob là, ngù ndù tshundà ndà Tshùaben boa njoṅ kuan ntsho fa fe Babilon mbèn njam yen dù' li.

⁷Nda' ndù a bwô o ju' ntshob mi me tshob wù mba njoṅ ngô fa là.

⁸Ba ghatshob ntshob Nsi tse bo bwôg tum mbwe àm mba mbwe o, fe tà mbwembwe là, lo ke ntshob nu ntsho, nge' bo keya' num ba ngô neta, boa nufen ndùbndùb;

⁹là ndùse ta' ngatshob ntshob Nsi tshob nu mfà num fite là, mba bo nsi lèn ndù a b'a kua' ngantum Tshùaben à ndùse yen nu z'a tshob bumte là.

¹⁰Ndùlala ngatshob ntshob Nsi Hanania sô kele' tô ngatshob ntshob Nsi Yérémia mbe'e.

¹¹Hanania tshob mbwe ngô ndù: Tshù mba Tshùaben tshob li: A ndaṅndaṅ mba me nsi be' kele' Nébukanetsar mfen Babilon num tô njoṅ ngôngô fa là. A tù' sènni ngu'njù bàa. Ngatshob ntshob Nsi Yérémia tum nène.

¹²A lo be ghubte mba ngatshob ntshob Nsi Hanania be' kele' tô ngatshob ntshob Nsi Yérémia là, Tshùaben tshob Yérémia ntùm ntshob mi ndù:

¹³Nèn ntshob Hanania ndù: Mb'o be' kele' tù là, o nsi ghù à kele' tùn num dù' i.

¹⁴Nummbe Tshùaben tàndà ntsho, Nsi Israél tshob ndù: Me ma' kele' tùn tô njoṅ tshen ngôngô là fa, ndù bo tù' kuan Nébukanetsar mfen Babilon. Bo nsi tù' kuan tse; me fà mba ba nyàm tshwèt yi.

¹⁵Ngatshob ntshob Nsi Yérémia tshob ngatshob ntshob Nsi Hanania ndù: Hanania, ju' mebwô mbe Tshùaben ke bèn ntum o. O tshwèt mfùte ngô bo nke ngua' wut yub.

¹⁶A ndùlala Tshùaben tshob ndù: Yen mbe m'a' ta' o num nsitsha'a; o nsi kwù kua' yen ngu'njù li; lèn ndù ntshob mu b'a ntshob tatu num miag Tshùaben.

¹⁷Hanania, ngatshob ntshob Nsi kwù be yen ngu'njù là, num mbatte maṅwù sammbàa.