Read Medumba Yérémia 3 Bible Online

Yérémia 3 - Medumba bible

Yérémia 3

¹Tshùaben tshob me Yérémia ntùm ntshob mi ndù: A be ze ta' mandum sô nzwi i, mènnzwi nèn ngù mo' ndu là, mb'a be mbwe ndu i bèn ndo' i ké? A be ndùlala mba ngô ke' sagte neshu ké? Tu wul o, b'o bèn nse' me, ndùs'o kat bin à màndà tsho là ké?

²Bù' miag mu tà mfe tù njene: A zit dù' z'o na' mbe ke kat bwe à! O lo ke ntsin num manze mba Nkasa be ntsin num kônkwa là. O tshùa njam kal o bo tshùagntù o, nsagte ngô.

³A lo tshùa num bwe mbaṅ ke lo, njwèt mbaṅ ke be, ke tshùm nsi; là, mba ndùlala o la't'a be tatu kattù mènnzwi, tuswe ke ko o tsho.

⁴Ndonni, o tshwèt ntsiaṅ àm tàan! O na' mb'a nshun àm ndùse me ke' nshum nà.

⁵O be ngô ntùm nukebwô nke ntshob ndù: Ndù a' ke nja à be ntù njoṅ ndù ké? Ndù a' lé' yantù i à ngu'ngu' ké?

⁶A lo be num ze ngelaṅ mfen Yosias, Tshùaben tshob me ndù: O yen ju ze ngatatu Israél ghù là ké? A nèn mba num zit nesà mbat lo, nèn mba bam sit tù fi lo, nkat bwe.

⁷Me lo tshob ndù: A nsi bèn njam, se' tèl àm ndùs'a nsi ghù tshen nukebwô là là. Là, a ke' bèn njam. Ngon màab Yuda, ngatatte yen i.

⁸Mba mba me na' nsô Israél ngatatu, mb'a tshwèt ngù màndà, kà mfà ze ṅwa'ni nefagte nandà là, me yen mbe ngon màab Yuda, ngatatte ke' ghù tse lèn bwôg ntù i. Mba yi bèn nèn ze tshwèt kal à be ndaṅndaṅ.

⁹A tshùa njam tshu'te z'a be ngù kal i là, nsagte ngô fa. A ghù màndà bo loṅ, mba bo tù.

¹⁰Mba ndùlala ngon màab, ngatatte, ke' bèn njam ntèl àm njoṅ ntù i fa. A ke ndo' à fùte ntsho àm yi. Tshùaben bèn ntshobe.

¹¹Tshùaben bèn ntshob me Yérémia ndù: Be lôte mebwô mba ngatatu Israél nsi b'a mbu' mbwe ngatatte Yuda.

¹²Nèn nze tu, nkua' ntshob men ntshob li ndù: Bin bèn njam me ba Israél ghatatu. Tshùaben bèn ntshobe. Me ke nsi bèn tshù kebwô num bin, nummbe me b'a ngakondèn. Tshùaben bèn ntshobe. Yantù àm ke nsi ghô matmat.

¹³Lèn nda' yu nukebwô. Lèn mb'o lo nèn bag bag njam tse nsi ba tum, bam mba sit tù fi lo. Lèn mb'o lo ke ju' yàm nze. Tshùaben bèn ntshobe.

¹⁴Bin bèn njam me bon, bin ghatatu; Tshùaben bèn ntshobe. Tshù, me b'a zin tàfa'. Me nsi sôte zine: Mo' ntùm ta' tusô, tse bàa ntùm ta' tunndà, lo' zin nèn yi Sion.

¹⁵Me nsi fà ghatshagte zin à mb'a ko' ntù àm nà. Bo nsi tshagte zin à ntùm mebwô bo zenu.

¹⁶Tshùaben tshob ndù: Ndùse bin nsi sine, yàm ntùm ngô là, num tshen lé'njù là, bo ke nsi bèn kwat'é; bo ke nsi bèn kwimt'é; bo ke nsi bèn be netèt bin, mbe ndù bo ke bèn nabte tse semo'o.

¹⁷Bo nsi ke tsiaṅ Yérusalém diaṅkwa Tshùaben num yen ngelaṅ nà. Njoṅ ngôngô fa nsi kùmte Yérusalém num lén Tshùaben, ke bèn nke mbwe nkwatenu ntù yub ts'a ke' bwô là.

¹⁸Tunndà Yuda nsi zin bo tunndà Israél num sen lé'njù là. Bo nsi tamte fe tu se'e, se' ntùm ngô ze me na' mfà tà tsin nà.

¹⁹Me lo ke ntshob ndù: A ke lèn dù' mebwô ze me nsi fà wù netèt bon tshàm à! A ke lèn mebwô tsha', ke lèn ntsi' ntùn mi me nsi fà wù netèt ngôngô à! Me lo ke ntshob ndù: O nsi tsiaṅ àm ndù tàan! Ke bèn ntam àm mvèn o.

²⁰Là, bin lo be ghatatte num miag màm me tunndà Israél, ndaṅndaṅ mba mènnzwi be mbe ngatatte num miag ndu i là. Tshùaben bèn ntshob ndùlala.

²¹Bo tshwèt nju' nekua' mfe num nkônga. Bon Israél bèn nke ntam keshù', mbèn nke ma' mbu. Bo bagte yub manze, ndag Tshùaben, Nsi yub.

²²Bon tatu, bin bèn njam ntèl àm, me nsi lagte tatu tsine. Tshù bag li bag se' tèl o là, nummb'o b'a Tshùaben, Nsi yag.

²³Ṅ, tshu'te z'a tshwèt mfe num nkônga boa mbat là b'a fùte; kua' nenùne, yôg Israél b'a ntùm mbu Tshùaben Nsi yag.

²⁴Bagkèt neto lo biagte ntàm fa' tà tshage, mbwe tshob boa nyàmna' tshobe, nshumnshum tshob boa ngonngon tshob fe ndùse bag na' mbe bônke' là.

²⁵Ndùlala, a bwô be nô nsi ntùm tuswe, ndù yen nukebwô be là tù' ze be belangé. Nummbe be lo ghù nukebwô num Tshùaben Nsi be, be mba tà be, fe ndùse be na' mbe bônke' là tà nkum sènni. Be lo ke ju' ntshu Tshùaben Nsi be.