Read Medumba Yérémia 32 Bible Online

Yérémia 32 - Medumba bible

Yérémia 32

¹Tshùaben tshob ntshob mi Yérémia, ndùse Sédékia mfen Yuda ghù ngu'njù gham num fen, Nébukanetsar ghù ngu'njù ntshob fom gham num fen nà.

²Ntshu ntsho mfen Babilon lo be kab mbu num Yérusalém ndù ngatshob ntshob Nsi Yérémia b'a ntshundà ndàtsha z'a ntùm ba' mfen Yuda là.

³Sédékia mfen Yuda lo ghù bo fùn i ndàtsha, a tshob yi ndù: Numk'o nke ntshob ndù Tshùaben tshob mbe: Me swèn sen tusô li mum mbu mfen Babilon, mbe ndù a nsi lo' i à?

⁴O tshwèt ntshob ndù: Sédékia mfen Yuda ke nsi tum ntshu ba Kaldéa, là, a nsi vù ntùm mbu mfen Babilon, a tshob nu yi se se, bo yi yente miag miag;

⁵mfen Babilon nsi lo' Sédékia nèn yi Babilon, a tswe bwe tà nkum ndùse me nsi kwimt'é là, Tshùaben bèn ntshobe, a be ze bin ma' ba Kaldéa ntsho là, mba bin ke nsi tshùa yube.

⁶Yérémia tshob ndù: Tshùaben lo tshob ntshob mi me ntshob ndù:

⁷Yen mbe Hanamél, nshum mfèl o Shallum nsi se' mbaṅ o tshob wù ndù: jun nà àm z'a be Anatot là, nummb'o ghù nebèn ndo' yàm ju.

⁸Hanamél nshum mfèl àm se' mbaṅ ntshundà àm mba Tshùaben tshob là, ntshob me ndù: Jun nà àm z'a be Anatot, ntùm ngô Benjamin nà, nummb'o bèn nku'ni nelo' màm ntsi'i, ngù nelo' yàm ju. Jun nà là me! Me lèn kua' ndù a b'a ntshob Tshùaben.

⁹Me jun nà Hanamél nshum mfèl àm, nà z'a be Anatot là. Me fi' nkàb silba ntshob sammbàa gham mfà yi.

¹⁰Me kite ṅwa'ni num yen nu li, nte màkwa bwe, ndo' ghakwénta, nèn mfi' silba num kilô.

¹¹Me lo' ṅwa'ni ze me jun nà yi là, ndo' ze bo te màkwa bwe là, ngù ndaṅndaṅ mba ntshù' tshwèt mbètte, bo mb'a be matnu là, mbèn ndo' mba ze bo tsho' là;

¹²me fà ṅwa'ni ze me jun nà yi là Baruk nshum Nérija, nshum Mashséja, mbwe Hanamél nshum mfèl àm, mba mbwe ghakwénta tse bo be ntshundà ndàtsha là.

¹³Me tshob Baruk mbwe bo ndù:

¹⁴Tshùaben tàndà ntsho, Nsi Israél tshob ndù: lo' tshen ṅwa'ni ze bo jun nà yi, ze bo te màkwa bwe bo ze bo tsho' là, njab njoṅ i fa ntùm ta' kab tsha'a, ndù a tswe ngelaṅ yàme.

¹⁵Nummbe Tshùaben tàndà ntsho, Nsi Israél tshob ndù: Bo nsi bèn jun mba', ba nà boa ntù ndu' ntùm yen ngô li.

¹⁶Ndùse me fà ṅwa'ni ze me jun nà yi Baruk nshum Nérija là, me le'te Tshùaben ntshob yi ntùm yàm le'te ndù:

¹⁷Ah! Tshùaben Nsi, a b'a wù bèn nabte kamànyam bo tsha'a, ntshùa à njam ngù' o ze ndùb bo bu o z'o nyit là. Mo' nu netshàm ke tse num yu bag i.

¹⁸O be ngù kondèn tà nkum num zwiaṅ ntsha' mbùm, nke nso ntsha tu bon num tse nukebwô tà tshobe. O b'a Nsi neta, mbe Nsi ngù', ndù lén so b'a Tshùaben tàndà ntsho.

¹⁹O b'a ndùb num ntage, ngù ngù' ntùm mfa'; miag mu num nga' num ngùninu bon benntùn, ndù o ghù mba we lo à mba ngùninu mi be yi là, mba ntàm mfa' mi lo' mbe yi là.

²⁰O lo ghù nsà boa nu netshàm ntùm ngô Egipto tà nse' nkum sènni, mba netèt Israél, mba netèt benntùn. O lo ghù lén so k'a ke' à be yi tà nkum sènni.

²¹O lo ghù yu nzwit mèn Israél tum Egipto, ngù ndùlal'a njam ba nsà boa nu netshàme, njam bu o ze neta z'o nyit num bo là, ndo' à neta fétwut ndùb.

²²O lo fà yen ngô li bo, ngô z'o na' nsaṅlaṅ bwe tà tshob ndù o nsi fà bo là, ngô ze mbùn be nswe' bwe bo ṅwa' là.

²³Bo lo se'e, ndo' la' ntùm ngô là, là ke yôg nke nju' nz'o, ke bèn nze tshob yu ntshù'. Bo ke' ghù ju z'o bètte ndù bo ghù là. A yen ngelaṅ nà z'o ghù tshen nge' là tsho yub là.

²⁴Tshù, bo tshwèt nkut dù' ngebte ngô yi, a b'a bu nkum mbàa; bo nsi swèn ngô mbu ba Kaldéa tse bo tshwèt nkab mbu num i là. Bo nsi lo' ṅwi, nziku' bo keya' tshùa i yi. Tshù ju z'o na' ntshob là z'a bumte là, tu wul o yen.

²⁵Mba tà ndùlala wù Tshùaben Nsi tshwèt ntshob mbe me lo' silba njun yen nà li yi mbwe ghakwénta. Tu wul o yen mba ngô vù ntùm mbu ba Kaldéa là.

²⁶Tshùaben tshob ntshob mi Yérémia, ntshob ndù:

²⁷me b'a kua' Tshùaben, Nsi njoṅ benntùn fa. Mo' ju bwe z'a be me nke ntshàm nà ké?

²⁸A ndùlala Tshùaben tshob ndù: Me swèn sen tusô li mum mbu ba Kaldéa, mbu Nébukanetsar mfen Babilon. A nsi lo' ngô.

²⁹Ba Kaldéa kam sen tusô li ntsho, bo nsi tsho bwe; bo nsi te mbwôg bwe, a kù i boa mba' mi bo na' ntsin num tu bwe, ton tshu nelamte Baal, ma' ndu' tsemo' nsi, nelo' nkamte yantù àm yi là.

³⁰Nummbe bon Israél boa bon Yuda ke ngù yub à be nda' nukebwô num miag màm fe ndùse bo ke' nguanmèn nà. Bon Israél be ntshùa njam mfa' mbu mub nke nkamt'a be yantù àm. Tshùaben bèn ntshobe.

³¹Tshù, sen tusô li ke mbù't'a be yantù àm bo tshùagntù àm fe lé'njù se bo kul i là tà nkum sènni. A ndùlala, me kô nesô i num miag màm,

³²num njoṅ nukebwô ze bon Israél boa bon Yuda ghù nelo' nkamte yantù àm yi là. Ke b'a nda' bo, bo mba fenfen tshobe, kamkam tshobe, ghale'te tshob boa ghatshob ntshob Nsi tshobe, ben bo Yuda là boa tse bo be Yérusalém nà.

³³Bo lo lo' mvèn yub ntam àm yi, ke lôt'àm tshobe; bo lo tswite yube, ntswite yub fe nkebnjù, là bo ke kù' ntoṅ nju' num netshùb ju ze bo zi'te là.

³⁴Bo lo se ka boa tshùaya'nu tshob ntùm ndà ze bo be ntsiaṅ lén sàm bwe là, ndùlala ndù bo sagt'é.

³⁵Bo lo kut ba mbwe' Baal ntùm tômbo' Ben-Hinnom, num neke nton nshumnshum tshob boa ngonngon tshob bwe. Me lo ke tshob yen nu là bo, yen nà ke to' se' me ntùm nkwate ndù be bo ghù tshen kebwô là, ngù Yuda ghù nukebwô.

³⁶Wù Yérémia, o lo tshob mbe sen tusô là nsi vù ntùm mbu mfen Babilon, a lo' ṅwi, nziku' bo keya' mbiagt'é yi. Là ndonni tshù ju ze me Tshùaben, Nsi Israél tshob li:

³⁷Me nsi tse'te yub ntùm njoṅ ngô fa tse me tshùa njam yantù àm, tshùagntù àm bo tonkèt yantù àm ntshag yub bwe là. Me nsi lo' yub bèn yi yen dù' li, ghù bo tswe bwe ntùm fite.

³⁸Bo nsi be yàm nzwit mèn, me be yub Nsi.

³⁹Me nsi fà ntù ntshù' bo nze ntshù' bo. A nsi tshùa ndùlala bo ke mbwôg àm njoṅ ndù fa, num sob fu' mba se bon tshobe.

⁴⁰Bag à bo nsi wat kàn s'a tswe matmat là. Me ke nsi bèn sô wul àm num bo, m'a' ke ngù numebwô bo. M'a' yab bwôg àm ntù bo, ndùlala ndù kà bo bèn nke nkù àm nekùù.

⁴¹Me nsi tsiaṅte neke ngù numebwô bo, bèn te yub kua' ntùm yen ngô li, njoṅ ngô ntù àm fa mba njoṅ sàm zwiag fa.

⁴²Nummbe Tshùaben tshob ndù: Ndaṅndaṅ mba me na' ngù tshen nge' ndùb li tsho num yen nzwit mèn ni là, be ndaṅndaṅ, me nsi ghù fu' se me bù bo là se'e.

⁴³Mba mba wù Yérémia na' ntshob ndù yen ngô li nsi vù ntùm mbu ba Kaldéa, tù' kônkwa, dù' benntùn ke ba nyàm no ke' be bwe là, me Tshùaben tshob wù ndù bo nsi jun ba nà ntùm yen ngô li.

⁴⁴Bo nsi lo' silba jun ba tshen nà là yi, kite ṅwa'ni tse bo jun ba nà yi là, te màkwa bwe, tsiaṅ ghakwénta nsi. A nsi be ndùlal'a ntùm ngô Benjamin, boa dù' ts'a ghebte Yérusalém nà, ntùm ntusô Yuda, ntùm ntusô mi a ntèn nà. Nummbe me nsi lo' kuan tshob bèn yi njam. Tshùaben bèn ntshobe.