Read Medumba Yérémia 33 Bible Online

Yérémia 33 - Medumba bible

Yérémia 33

¹Tshùaben bèn ntshob ntshob mi Yérémia num mbatte yoṅ bàa, ndùs'a ke' ntshundà ndàtsha dù' ze bo fùn i bwe là ndù:

²Tshùaben z'a ghù tshen tshu là, Tshùaben z'a tàmte tshen tshu mbèn ngù a bumte, yi ze lén se b'a Tshùaben nà tshob ndù:

³Bin tsiaṅ lén sàm, me nsi bùnte; me nsi soṅ tshu ndùbndùb, tshu ts'a lemte là, ts'o ke' lèn nà.

⁴Nummbe Tshùaben Nsi, Nsi Israél tshob num mba' sen tusô li boa mba' fenfen Yuda mi bo nsi lo' kàbngô bo ṅwi kamte yi,

⁵ndùse bo nsi nèn le' ba Kaldéa ntsho là ndù: Fe ben tse me nsi zwite yub ntùm tonkèt yantù àm nà nsi dun ntùm men mba' là. A nsi tshùa njam nukebwô yub me tsho' lag sàm num sen tusô là.

⁶M'a' kut nkeko' mube, njate yube. M'a' ghù bo tswe ntùm fu' ndùb, ntswe ntùm fite.

⁷M'a' lo' tse kuan Yuda boa tse Israél mbèn yi njam. M'a' tete yub à be kua' mba bo be mbwembwe là.

⁸Me nsi sôg yub num njoṅ nukebwô fa bo ghù me là. M'a' lagte njoṅ mfànnu fa mi bo na' mfàne, ntshùa bwe nta tu me là.

⁹Sen tusô là nsi fà tsiaṅte me, fà ghamte bo nku'ni me netèt njoṅ ngôngô fa num nsitsha'a. Nummbe bo nsi ju' numebwô ze me nsi ghù tshàm ben nà; ngôngô nsi tshàme, nu tshùa i num njoṅ fu' fa se me nsi fà là, mba mba me nsi ghù bo sine, ntshote là.

¹⁰Tshùaben tshob ndù: Num yen dù' li ngô be ntshob ndù a b'a kônkwa, benntùn ke ba nyàm no ke bwe, ntùm ntusô Yuda boa tse manze Yérusalém ts'a sate, mèn ke bèn nke ntswe bwe, sàm nyàm ke ke ndiaṅ bwe là, bo nsi bèn ju'

¹¹tshu'te tsiaṅte, nkwi ṅwate, ju' nze ndungon bo ze nzwingùn, ju' tshu'te ben tse bo nsi yob kwi là. Bo nsi ke tshob ndù: Bin ghamte Tshùaben tàndà ntsho, nummb'a b'a mbwô mèn, kondèn i nke ntswe matmat! Nze ben tse bo ke mfà tshule'te tse nenyàmte là be ntùm ndà Tshùaben. Nummbe me nsi lo' kuan ngô bèn yi njam, tete yub mb'a be mbwembwe là. Tshùaben bèn ntshob ndùlala.

¹²Tshùaben tàndà ntsho tshob ndù: Nkin mbwe nsi mbèn mbe, dù' ze ghatshagte mbwe nsi ghù mbwe tshob fèt là, ntùm yen dù' li z'a be kônkwa, benntùn ke ba nyàm ke be bwe là, mba ntùm ntusô mi fa.

¹³Tshùaben tshob ndù: Ba mbwe nsi bèn tshùa ntùm ntusô mbale, ntùm ntusô bu'to'o, ntùm mi à ntèn nà, ntùm ngô Benjamin boa dù' ts'a ghebte Yérusalém nà, mba ntùm ntusô Yuda. Bo nsi be tshùa b'a ntùm mbu ngasiaṅte yube.

¹⁴Tshùaben tshob ndù: Tsemo' lé'njù bwe nse'e, tse me nsi ghù ntshob ntùn mi me na' ntshob num tunndà Israél bo tunndà Yuda bumte là.

¹⁵Num tshen lé'njù là, num yen ngelaṅ nà, me nsi ghù ta' nzwit netsin tum num David. A nsi ghù nunetsin bo nu ndaṅndaṅ ntùm ngô.

¹⁶Num tshen lé'njù là, Yuda nsi yôg tse, Yérusalém tswe ntùm fite, lo tswi lén se ndù: Tshùaben b'a yag nunetsine.

¹⁷Tshù mba Tshùaben tshob li: David ke nsi bwoṅ ta' njùndà num diaṅkwa tunndà Israél.

¹⁸Ghafà tshule'te, ben Lévi ke nsi bwoṅ jùndà mbwe àm, tse bo nsi ton ba nyàm, ton tshu nelamte boa tshule'te, ke ma' bo' njoṅ lé'njù fa là.

¹⁹Tshùaben tshob ntshob mi Yérémia, ntshob ndù:

²⁰Tshùaben tshob ndù: A be ze be bin bagte kàn sàm bo mbwôgtshù, mbagte kàn sàm bo tèttswe', kà mbwôgtshù bo tèttswe' ke bèn mbe num yub ngelaṅ i là,

²¹mba kàn sàm bag David ngafa' àm nsi bagte, k'a ke ghù nshum i z'a nsi tswe num diaṅkwa se là, mba kàn sàm bag à ben Lévi, ghafà tshule'te, tse bo num mfa' me là nsi bagte.

²²Ndaṅndaṅ mb'a be mèn ke siaṅ ntshu ntsho mfe kamànyam, ke fi' nkwango' mi a dibantse là, be ndaṅndaṅ me nsi ghù nzwit David ngafa' àm yàme, bo ze ben Lévi tse bo num mfa' num yàm ntshufa' là.

²³Tshùaben tshob ntshob mi Yérémia ntshob ndù:

²⁴O ke' ju' mba tshen ben nà tshwèt ntshob là ké? Bo be ntshob ndù: Tunndà bàa tse Tshùaben na' ntsho' yub là, a ghua' yube. Tshù mba bo be ngwag yàm nzwit mèn yi là. A be ntshùa ndùlala bo ke bèn ndo' i mba ta' ngô là.

²⁵Ndùlala Tshùaben tshob ndù: A be ze me ke' wat kàn bag mbwôgtshù mba tèttswe', ke bèn njab ntshù' mi a mfe kamànyam mba num nsitsha' là,

²⁶mba me nsi ghua' nzwit Yakob bo ze David ngafa' àm, ke bèn nelo' ben tse bo nsi tô là ntùm ze nzwit, ntùm nzwit Abraham, Isak mba Yakob. Nummbe me nsi lo' kuan tshob bèn yi njam, bèn ghù kondèn num bo.