Read Medumba Yérémia 34 Bible Online

Yérémia 34 - Medumba bible

Yérémia 34

¹A lo be ndùse Nébukanetsar mfen Babilon nke nde' Yérusalém boa ntusô mi a mbaṅ i là ntsho. Mfen na' mb'a boa ze ntshu ntsho fa, njoṅ nufen fa tse bo be nsitsha'a, mbe nte' yi là mba njoṅ ngôngô fa. Yen ngelaṅ nà Tshùaben tshob Yérémia ntùm ntshob mi ndù:

²Tshù mba Tshùaben, Nsi Israél tshob yi li: Nèn ntshob Sédékia mfen Yuda ndù me Tshùaben tshob yi ndù me nsi swèn sen tusô li ntùm mbu mfen Babilon a ton i mbwôge.

³Tu wul o ke nsi tum ntshu i, là bo nsi swèn o yi, bin yi yente se se Babilon, mbèn ntshobte se se, nummb'o nsi nèn Babilon.

⁴Sédékia mfen Yuda, nda' ndù a bwô o ju' ntshob Tshùaben! Tshù mba Tshùaben tshob num o li: Tu wul o ke nsi kwù à ṅwi.

⁵O nsi kwù à ntùm fite; ndaṅndaṅ mba bo na' nton ba labinda tà tsho mbwe fenfen tse bo be mbwe o là, be ndaṅndaṅ bo nsi bèn ton mba wù yu, ke làn o tshob ndù: Wé! tshùaben! A b'a nummbe me tshob men ntshob là. Tshùaben bèn ntshobe.

⁶Ngatshob ntshob Nsi Yérémia tshob njoṅ men ntshob là fa Sédékia mfen Yuda, ntshob yi à Yérusalém.

⁷Ntshu ntsho mfen Babilon le' Yérusalém ntsho boa njoṅ memo' ntusô Yuda fa, nde' Lakis bo Azéka, nummb'a na' mb'a ntusô Yuda mi a ke' netèt mi bo kut ntsiag là.

⁸Tshùaben tshob ntshob mi Yérémia. A na' mb'a ndùse Sédékia wat kàn bo njoṅ ngô Yérusalém fa netswi nkùn ndù:

⁹Mba we lo kag tse kuan, ke tse bandum ke tse bènnzwi lo là. Bo lo nabte ndù kà mèn bèn mbam ndù mfèl i ze Yuda be nkuan yi.

¹⁰Njoṅ kamkam fa mba ngô bo bam yen nu li, ntsho ntùm newat kàn nà, bam mbe mba we lo nsi kag ze nkuan, ke ze mandum, ke ze mènnzwi lo, ke bèn nebam a mfa' kuan. Bo be ntshu ntshù', nkag yube.

¹¹Là, a be ghubte bo bate nkwate. Bo bèn ndo' kuan tse bandum boa tse bènnzwi tse bo kag yub là, nànte yub ndù bo bèn mbe kuan, nke mfa' bo.

¹²Ndùlala Tshùaben tshob ntshob mi Yérémia, ntshob ndù:

¹³Tshù mba Tshùaben, Nsi Israél tshob li: Me lo wat kàn bag à tà tsin lé'njù me na' nsô yub Egipto ndà kuan nà, ntshob bo ndù:

¹⁴A mbe tshùa ngu'njù sammbàa mba we lo netèt bin kag mfèl i mèn Yuda z'a jun à nejun nà. A bwô ndù a fa' kuan wù ngu'njù ntôge, a be num ngu'njù sammbàa o kag i. Là tà tsin lo ke ju' ntshu àm, ke kù' ntoṅ num ntshob màm.

¹⁵Là bin, bin lo' ntù zin nèn tsham yi, ngù numebwô num miag màm sènni, ntswi nkùn ndù mba we lo kag mfèl i z'a be nkuan nà; bin lo wat kàn mbwe àm, ntùm ndà ze bo be ntsiaṅ lén sàm bwe là.

¹⁶Là, bin lo bèn mbèn tuntun mbagte lén sàm; mba we lo netèt bin bèn ndo' kuan ts'a kag yub là, tse bandum boa tse bènnzwi, nànte yub ndù bo bèn nke mfa' kuan bin.

¹⁷A ndùlala, Tshùaben tshob ndù: Bin lo ke ju' ntshu àm, ndùse bin na' ntswi nkùn ndù mba we lo kag mfèl i, nkag ze la' bo là. Ndonni tu wul àm tam bu num bin. Me Tshùaben tum ṅwi num bin, ntum nziku' bo keya' num bin. Me nsi lo' zin kaṅ ju fétwut yi mbwe njoṅ nufen fa nsitsha'a.

¹⁸M'a' swèn ben tse bo bagte kàn sàm, ke ze tshu tse bo na' njù' ndùse bo wat kàn mbwe àm, nkeb ta' fot mfô nkam mbàa, ntôg netèt bwe là.

¹⁹Me nsi swèn kamkam Yuda boa tse Yérusalém, ba njabmfenkune, ghafà tshule'te mba njoṅ ngô fa tse bo tôg netèt nkam fot mfô mbàa là.

²⁰Me nsi swèn yub ntùm mbu ghakeban tshobe, ntùm mbu ben tse bo tshwèt nya' tu yub là. Fe tshob nsi be jujù nsaṅ mi a mfe kamànyam nà boa nyàm tse bo nsitsha' là.

²¹Me nsi swèn Sédékia mfen Yuda boa kamkam tse ntùm mbu ghakeban tshobe, ntùm mbu ben bo tshwèt nya' tu yub là, ntùm mbu ntshu ntsho mfen Babilon z'a tsin tà ngùanesà num bin nà.

²²Tshù, me nsi tshob nu bo, lo' yub yab njam sen tusô li; bo nsi kam i ntsho, lo' i, ton i mbwôge. Me nsi ghù mi ntusô Yuda tù' fam, mènntùn be ke be bwe.