Read Medumba Yérémia 38 Bible Online

Yérémia 38 - Medumba bible

Yérémia 38

¹Shefatia nshum Mathan, Guedalia nshum Pashur, Yukal nshum Shélémia bo Pashur nshum Malkiya, ju' ntshob mi Yérémia na' nke ntshob ngô fa là. A lo tshob ndù:

²Tshù mba Tshùaben tshob li: Mèn z'a nsi tù' ntùm tusô là nsi kwù ṅwi, kwù nziku' ke keya' lo; là mèn z'a nsi tum nèn yèn wul i ba Kaldéa là nsi yôg tse. Yôg se nsi be ze ntsha' ntsho, a yôge.

³Tshù mba Tshùaben tshob li: Sen tusô li nsi vù ntùm mbu mfen Babilon, a lo' i.

⁴Kamkam tshob mfen ndù: A bwô nezwi yen lèn mènntùn ni. Nummb'a ke nkag à be nyu'nku num ba soyé tse bo ntùm sen tusô li là mba mum ngô, ndùs'a tshwèt ntshob lèn tshen tshô li là; yen mènntùn ni ke tshwèt ndiag sàm mebwô num yen ngô li. A ke ndiag à be ndù nge' tsho mum ngô.

⁵Mfen Sédékia bùnte ndù: Tshù i là ntùm mbu mine; nummbe mfen ke' ghù nelèn ntsham zin.

⁶Ndùlala bo lo' Yérémia, nèn ma' ntùm tôntse Malkiya nshum mfen. Sen tôntse là na' mb'a ntshundà ndàtsha. Bo lo' ba mvèt ntshag Yérémia yi ntùm bwe. Ntse lo ke be ntùm tôntse; là netob lo be bwe. Yérémia tsiag ntùm netob.

⁷Ebéd-Melék ze Etiopia, njabmfenkun z'a be ndà mfen nà ju' mbe bo ma' Yérémia ntùm tôntse. A lo be be ndù mfen tswe num nzendà Benjamin.

⁸Ebéd-Melék tum ndà mfen, ntèt mfen ntshob yi ndù:

⁹Mfen àm, wù tshùaben àm, tshen ben ni ghù à kebwô, mba bo fa' num ngatshob ntshob Nsi Yérémia ndù, ma' i ntùm tôntse là. A nsi kwù nziku' dù' z'a be là, nummbe tag ke' bèn mbe tusô.

¹⁰Mfen tshob Ebéd-Melék ze Etiopia ndù: Lo' benntùn ntu ṅam ntat bin à bo nèn nsô Yérémia ngatshob ntshob Nsi ntùm tôntse, k'a kwù.

¹¹Ebéd-Melék lo' benntùn ntu ṅam ntat, ndo nèn boa bo ntùm ndà mfen, ntùm mo' dù' bam dù' tshunkàb. A lo' ba ntsha nzwe boa nga nzwe, ntshag ma' Yérémia ntùm tôntse boa ba mvèt.

¹²Ebéd-Melék ze Etiopia tshob Yérémia ndù: lo' ntsha nzwe boa nga nzwe njab bam nkekag mu kà ntaṅ mvèt bwe. Yérémia ghù ndùlala.

¹³Bo lo' ba mvèt nsoṅ Yérémia yi tôntse, nsô i ma' njam njù. Yérémia tswe ntshundà ndàtsha.

¹⁴Mfen Sédékia tum bo tsiaṅ ngatshob ntshob Nsi Yérémia, a se' mbaṅ i num mbatte nzendà tat nelo' ntsho yi ndà Tshùaben. Mfen tshob Yérémia ndù: Me ghù ta' ju nebètt'o, kà lemt'àm sàm nu.

¹⁵Yérémia bùnte Sédékia ndù: A be ze me tshob wù là mb'o ke zwi àm ké? Me fà ntag wù mb'o ke kô neju'u.

¹⁶Mfen Sédékia nu ngu Yérémia njam tsham ntshob ndù: Tshùaben z'a fà yôg be là b'a ntùn! Me ke nsi zwi o, ke bèn nswèn o mum mbu ben tse bo tshwèt nya' tu o là.

¹⁷Ndùlala Yérémia tshob Sédékia ndù: Tshù mba Tshùaben, Nsi tàndà ntsho, Nsi Israél tshob li: A be z'o nèn njèn wul o kamkam mfen Babilon nà, mb'o nsi yôg tsho, bo ke bèn nte mbwôg num sen tusô li. Mb'o nsi yôge, wù bin yu tunndà.

¹⁸Là, a be z'o ke' fà wul o kamkam mfen Yérusalém yu tu là, mba sen tusô li nsi vù ntùm mbu ba Kaldéa, bo lo' mbwôg nton i yi; tu wul o ke nsi ntum mum mbu mube.

¹⁹Mfen Sédékia tshob Yérémia ndù: Me tshwèt mbwôg ba Yuda tse bo tam njam ba Kaldéa là. Me tshwèt mbwôg neswèn àm bo, bo tshabt'àm.

²⁰Yérémia bùnte ndù: bo ke nsi swèn o bo. Ju' à nze Tshùaben num nu ze me tshob wù là; o nsi tswe mebwô bèn yôg tu wul o.

²¹Là, a be z'o gha netum nà, mba tshù ju ze Tshùaben la'te me li:

²²Bo nsi lo' njoṅ bènnzwi fa tse bo be mbe ntùm ndà mfen Yuda là nèn fà kamkam mfen Babilon, bènnzwi ke ntshob ndù: ben tse bo ke ntswi nkùn fite wù là fùt'o, nko' num tu o. Là ndonni ze nku mu tsiag ntùm netob là, bo kù o tshobe.

²³Bo nsi lo' zwi tsho fa boa bon tsho nèn fà ba Kaldéa; tu wul o ke nsi tum mum mbu mube, bu mfen Babilon nsi ghom o, sen tusô li kù mbwôge.

²⁴Sédékia tshob Yérémia ndù: Kà sàm mèn lèn nu num tshen tshô là; o ke nsi kwù.

²⁵A be ze kamkam ju' mbe be tshobte, nse' ntshob wù ndù: Soṅ yag ju z'o tshob mfen nà bo mb'a tshob wù là ke lemte yag sàm ju, bag ke nsi zwi o là,

²⁶o bùnte bo ndù: Me le'te mfen ndù k'a tshag àm ntùm ndà Yonatan, mbwôg ndù kà me tsho bwe nkwù.

²⁷Njoṅ kamkam fa se' mbaṅ Yérémia mbètt'é nu. A bùnte bo à ndaṅndaṅ mba mfen tshob yi là. Ndùlala bo mi ntswe ndù kam, nsô wut yub ntume, nummbe yen nu là lo ke lo' la'.

²⁸Yérémia tswe ntshundà ndàtsha tà nkum lé'njù Yérusalém vù ntùm mbu ghakeban nà.