Read Medumba Yérémia 39 Bible Online

Yérémia 39 - Medumba bible

Yérémia 39

¹Sédékia mfen Yuda lo be ghù ngu'njù bwe'e num fen, a be ntùm ṅwù gham Nébukanetsar mfen Babilon, se' bo njoṅ ze ntshu ntsho fa mbwe Yérusalém, nkab mbu num i.

²Sédékia lo ghù num fen ngu'njù ntshob ntshù' gham, a be mum lé'njù bwe'e ntùm ṅwù kuà, bo tsham fa num tusô nto;

³njoṅ kamkam mfen Babilon fa fà wut ntùm ngô, nèn nkab mbu num nzendà z'a netèt là: A na' mb'a Nergal-Sharetser, Samgar-Nébo, Sarsekim, kam ba njabmfenkune, Nergal-Sharetser nkam ghalèn nsa boa tsemo' kamkam mfen Babilon fa.

⁴Ndùse Sédékia mfen Yuda boa njoṅ soyé fa yoṅ njen yub là, bo kù, ntum tusô tèttswe' ntshùa num manze nka' mfen, num nzendà z'a netèt kumba' bàa là, ntum ngwù num ntshagnze z'a nèn tômbo' là.

⁵Là ntshu ntsho ba Kaldéa yab njam bo, nkote Sédékia ntùm ntômbo' mi a be Yériko là. Bo lo' i nèn yi mbaṅ Nébukanetsar mfen Babilon Dibla ntùm ngô Hamat. Ndùse bo keb ntsha i là,

⁶mfen Babilon ghù bo watte nshumnshum Sédékia Dibla, be kua' num miag mi; mfen Babilon ghù bo watte kamkam Yuda fa.

⁷A ghù bo to miag Sédékia, ngù bo lo' tshan nkul i yi, ndo' i nèn yi Babilon.

⁸Ba Kaldéa ton ba' mfen, nton mba' ngô, nsate njoṅ kàbngô Yérusalém fa.

⁹Nebuzaradan tà ghabéb dù' lo' tshé' benntùn tse bo ghô tusô là, tse bo tam njam i là, mba tshé' ngô nèn yi ndà kuan Babilon.

¹⁰Là Nebuzaradan tà ghabéb dù' faṅ bon ndô benntùn ntùm ngô, tshen nà tse bo bwoṅe, ju ke be nsi là. A fà ntù ndu' boa ba nà bo.

¹¹Nébukanetsar mfen Babilon lo tshob Nebuzaradan tà ghabéb dù' num Yérémia ndù:

¹²Lo' i nke ndôt'é; kà ghù sàm nukebwô num i; ghù mba ke lo yi a mb'a nsi bètt'o là.

¹³Nebuzaradan tà ghabéb dù', Nebushazban tà ba njabmfenkune, Nergal-Sharetser tà ghalèn nsa boa njoṅ kamkam mfen Babilon fa

¹⁴tum bo nèn ndo' Yérémia ntshundà ndàtsha, bo fà i Guedalia nshum Ashikam, nshum Shafan ndù a lo' i nèn yi ntùm ze ndà. A tswe netèt ngô ndùlala.

¹⁵Tshùaben lo tshob Yérémia ndùse bo na' mfùn i ntshundà ndàtsha là ndù:

¹⁶Nèn ntshob Ebéd-Melék ze Etiopia ndù: tshù mba Tshùaben tàndà ntsho Nsi Israél tshob li: yen mbe m'a' ghù tshu tse me na' njù' num sen tusô li là se'. A ke nsi b'a numebwô, là ze kebwô. Tshen tshu là nsi tum mbwe o sen lé'njù là.

¹⁷Tshùaben tshob ndù: Me nsi tshu' o num sen lé'njù là, o be ke vù ntùm mbu benntùn ts'o tshwèt mbwôg yub là.

¹⁸Me nsi yôg o, o ke nsi vù num ntshùag ṅwi; yôg so nsi b'a yu ntsha' ntsho, nummb'o yab ntù num àm. Tshùaben bèn ntshobe.