Read Medumba Yérémia 40 Bible Online

Yérémia 40 - Medumba bible

Yérémia 40

¹Men ni b'a ntshob mi Tshùaben tshob Yérémia ndùse Nebuzaradan tà ghabéb dù' na' nkag i Rama là. A lo be tum bo lo' Yérémia ndù bo kul i tshan netèt kuan ntsho tse bo lo' Yérusalém mba Yuda nèn yi Babilon nà.

²Nebuzaradan tà ghabéb dù' tum bo nèn ndiag Yérémia, a tshob yi ndù: Tshùaben Nsi o, lo jù' tshen nge' li num yen dù' li;

³Tshùaben zwiagte ju z'a jù' là, ngù a bumte. Tshen tshu là tsho zin à nummbe bin ghù nukebwô Tshùaben, ke kô tsin neju' nz'é.

⁴Ndonni me tshu' o num ntshan mi o ghù mum mbu mu là sènni; a be z'o kô ndù be nèn Babilon nà, o se', me nsi tomt'o; a be z'a ke' bwô o nenèn Babilon nà, kà se'; tshù ngô fa là mbwe o, mba yà lo ze nu tse bwô o, o kô nenèn bwe là o nèn.

⁵Mb'a lèt wut nebùnte là, a bèn ntshob yi ndù: A b'o kô nebèn njam ntèt Guedalia nshum Ashikam, nshum Shafan ze mfen Babilon yab i num ntusô Yuda là ntswe bin yi mba ngô; ntag ndùlal'o nèn mba yà lo z'a bwô o nenèn nà. Tà ghabéb dù' fà ba jujù yi, boa nda', ndé't'é.

⁶Yérémia nèn mbaṅ Guedalia nshum Ashikam Mitspa. A tswe bo yi netèt benntùn tse bo tù' ntùm ngô là.

⁷Njoṅ tà soyé fa tse bo be tshwèt là ju' boa ben tshob ndù mfen Babilon yab Guedalia nshum Ashikam ngomna ntùm ngô, mfà bandum, bènnzwi, bon, boa bwoṅbwoṅ tse bo tù' ntùm ngô, bo ke lo' yub nèn yi ndà kuan Babilon nà yi.

⁸Ndùlala bo nèn mbaṅ Guedalia Mitspa. Bo na' mb'a: Ismaél nshum Netania, Yoshanan bo Yonatan, nshum Karéash, Séraja, nshum Tanumèt, nshumnshum Efai ze Netofa bo Yézania, nshum Maaka bo boa ben tshobe.

⁹Guedalia nshum Ashikam, nshum Shafan nu ngu bo boa ben tshobe, ntshob ndù: Kà bin bwôg nefa' ba Kaldéa; bin ghô ntùm ngô, nke mfa' mfen Babilon. A nsi tshùa ndùlala bin be mebwô.

¹⁰Tshù, m'a' tswe a Mitspa, num neke mbwe ba Kaldéa tse bo nsi se' mbaṅ be là; mba bin nà, bin kàb ntàm tù ndu', nkàb ntàm tù njwèt mbaṅ, ngwat mba, naṅ mfèt mi ntùm ntshaṅ mine, ntswe ntùm ntusô mi bin be bwe ndonni là.

¹¹Njoṅ ba Yuda fa lo be ngô Moab, ju ba Ammon, ntùm ngô Edom, mba ntùm njoṅ ngô fa. Bo ju' ndù mfen Babilon lo faṅ tshé' ba Yuda, njab Guedalia nshum Ashikam, nshum Shafan, a be yub ngomna.

¹²Njoṅ ba Yuda fa fete ntùm dù' tse bo tete bwe là nèn ntùm ngô Yuda, mbaṅ Guedalia Mitspa; bo kàb ntàm tù ndu' kua' yàme, boa ntàm tù njwèt mbaṅ.

¹³Yoshanan nshum Karéash boa njoṅ tà ba soyé fa tse bo be tshwèt là se' mbaṅ Guedalia Mitspa ntshob yi ndù:

¹⁴O lèn mbe Baalis mfen Ammon yab Ismaél nshum Netania nezwi o ké? Là Guedalia nshum Ashikam ke bam ju bo tshob là.

¹⁵Yoshanan nshum Karéash tshob Guedalia njam tsham Mitspa ndù: bam me nèn nzwi Ismaél nshum Netania. Mèn ke nsi lène. B'o bam ndù a zwi o à numke? A be ndùlala mba ba Yuda tse bo kùmte mbaṅ o là nsi sate, tshé' ba Yuda sat'a numke?

¹⁶Guedalia nshum Ashikam bùnte Yoshanan nshum Karéash ndù: Kà ghù ndùlala; nummbe ju z'o tshwèt ntshob là b'a tatte.