Read Medumba Yérémia 41 Bible Online

Yérémia 41 - Medumba bible

Yérémia 41

¹A lo be kum mbatte ṅwù sammbàa, Ismaél nshum Netania, nshum Elishama mèn ntùm nzwit fen, se' boa ben mfen tse ndùbndùb mba benntùn ntu gham mbaṅ Guedalia nshum Ashikam Mitspa. Bo jù tshaṅ boa Guedalia Mitspa.

²Ndùlala Ismaél lo nsi boa benntùn ntu gham tse bo be njam i là, ndo' ṅwi ngwat Guedalia nshum Ashikam, nshum Shafan yi. Bo zwi mèn ze mfen Babilon na' njab i ngomna ntùm ngô là.

³Ismaél zwite mba njoṅ ba Yuda fa tse bo be mbaṅ Guedalia Mitspa là, ba Kaldéa tse bo be bwe là boa bwoṅbwoṅ.

⁴A be num mbatte lé'njù bàa mba Ismaél zwi Guedalia, sàm mèn ke yoṅ ndèn nà, tsemo' benntùn ntu ṅam fom

⁵fe Sikém, Silo mba Samaria, nse'e, ndù bo kom tu yube, ma' ntsha nzwe, mbèn ntshebte mfaṅ num bo. Bo lo lo' tshule'te boa tshu nelamte nse', num nelo' ntsho yi ntùm ndà Tshùaben.

⁶Ismaél nshum Netania tum Mitspa nèn mbwe bo; a be zin nke nkua'a; ndùs'a bumte boa bo là, a tshob bo ndù: Bin se' mbaṅ Guedalia nshum Ashikam.

⁷Ndùse bo zin nkum netèt tusô là, Ismaél nshum Netania watte yube, ma' fe tshob ntùm tôntse. Ben tse bo be njam i là ywimt'é.

⁸Là ben gham tum netèt bo ntshob Ismaél ndù: kà zwite yage, nummbe bag ghù jujù tshwèt ze bag lem nà: ngefele, nsa, mfèt bo ṅwa'a. Ndùlal'a faṅ ke zwite yub boa fèt tshobe.

⁹Mfen Asa na' mbèn nkut tôntse se Ismaél lo' fe ben ts'a zwite yub mbaṅ Guedalia nzwiag yi là. Mfen Asa na' nkut tôntse l'a ndùs'a ke mbwôg Baesha mfen Israél là. A sen tôntse là se Ismaél nshun Netania lo' fe ben nzwiag yi là.

¹⁰Ismaél lo' njoṅ benntùn fa tse bo tù' Mitspa là ngù ghandàtsha yi, ngonngon boa tshé' ngô a tù'ù, Nebuzaradan tà ghabéb dù' fà yub Guedalia nshum Ashikam nà. Ismaél nshum Netania nèn bo ndà kuan. A be nèn ntshùa ntùm ngô ba Ammon.

¹¹Ndùse tshô kebwô ze Ismaél nshum Netania na' ngù tum njù là, Yoshanan nshum Karéash boa njoṅ kamkam fa tse bo be mbaṅ i là,

¹²tse'te njoṅ tshob ben fa num nekam Ismaél nshum Netania ntsho. Bo kot'é mbaṅ ntse ndùb Gabaon.

¹³Ndùse ben tse Ismaél ke nèn bo yen Yoshanan nshum Karéash là, mà tsiaṅte ndùb ko' ntù bo.

¹⁴Yen bwoṅ benntùn nà Ismaél lo' Mitspa nke nèn yi là kaṅ njam num i, nèn ntam njam Yoshanan nshum Karéash.

¹⁵Mba tà ndùlala, Ismaél nshum Netania tswe ndo' benntùn fom nja' nèn boa bo ngô Ammon.

¹⁶Ndùlala Yoshanan nshum Karéash boa tà ba soyé tse bo be njam i là lo' tshé' ben tse bo ke' ntùn, Ismaél nshum Netania nke nèn bo ndùs'a zwi Guedalia nshum Ashikam nà: Ba soyé, bènnzwi, bon, ba njabmfenkune, ndo' yub fa mbèn yi Gabaon.

¹⁷Bo tsho tshwèt ntsho, nzin nkum num ba' ghatshùanze z'a Kimham mbaṅ Bétléhém nà, kà ndo bwe nkù nèn Egipto.

¹⁸Bo nèn ndùlala nke mbwôg à ba Kaldéa, nummbe Ismaél nshum Netania lo zwi Guedalia nshum Ashikam ze mfen Babilon na' njab i ngomna ntùm ngô là.