Read Medumba Yérémia 42 Bible Online

Yérémia 42 - Medumba bible

Yérémia 42

¹Njoṅ tà ba soyé fa, Yoshanan nshum Karéash, Yézania nshum Hoshaya bo njoṅ ngô fa, neto' num mônke' nkum num ndùb nèn,

²ntshob ngatshob ntshob Nsi Yérémia ndù: A bwô ndù o ju' mba bag bètt'o là. Le'te Tshùaben Nsi o num tu bag tse bag ke' ntùn nà. Tshù bag lo yàme, ndonni bag tù' b'a metsil i, mba kua' yu tu wut tshwèt njene.

³A bwô Tshùaben Nsi o la'te manze bag zin bwe là bag, mbèn nsoṅ yag mb'a bwô ndù bag ghù là.

⁴Ngatshob ntshob Nsi Yérémia tshob bo ndù: Me ju', m'a' le'te Tshùaben Nsi zin mba bin bètte là, nsoṅ zin ju ze Tshùaben nsi bùnte là ke lemte zin sàm ju.

⁵Bo tshob Yérémia ndù: A bwô ndù Tshùaben bèn ntù' be nkwénta ze nenùne, ndù bag nsi ghù mba ke lo ze Tshùaben Nsi nsi tshob wù ndù o tshob bag là.

⁶K'a b'a numebwô ke ze kebwô lo, mba bag nsi ju' ntshu Tshùaben Nsi o ze bag tshwèt ntum o mbwe i là, ndù a tshùa ndùlala bag be mebwô, a be ze bag ju' ntshu Nsi o là.

⁷Lé'njù gham lo be tôg Tshùaben tshob ntshob mi Yérémia.

⁸Yérémia tsiaṅ Yoshanan nshum Karéash, njoṅ tà ba soyé tse bo à bo be là, ngô fa neto' num mônke' nkum num ndùb.

⁹A tshob bo ndù: Tshù mba Tshùaben, Nsi Israél ze bin tum àm mbaṅ i, ndù me le't'é num zin tu tshob li:

¹⁰A be ze bin tswe ntùm yen ngô li là, mba me nsi te zin bwe, ke sate zine, mba me nsi ywit zin bwe ke bèn ntsho' zine; nummbe me nywin num nukebwô ze me na' ngù bin nà.

¹¹Kà bin vètte num mfen Babilon ze bin tshwèt mbwôg i là; kà bin bwôg i, nummbe me nsi be bag bin yôg zine, tshu' zin bu i. Tshùaben bèn ntshobe.

¹²Me nsi fà ntù kondèn yi num bin; a nsi ko ndèn mine, faṅ bin tswe ntùm ngô zine.

¹³Là, a be ze bin ke' ju' ntshu Tshùaben Nsi zin, ntshob ndù:

¹⁴Bag ke nsi tswe ntùm yen ngô li, nga bag nsi nèn Egipto, dù' bag ke nsi yen ntsho, dù' bag ke nsi ju' nze nta ntsho, dù' bag ke nsi bwoṅ jujù, tswe à kua' yen dù' là là,

¹⁵mb'a bwô ndù bin ju' ntshob Tshùaben ni me tshé' ba Yuda! Tshù ntshob mi Tshùaben tàndà ntsho, Nsi Israél tshob li:

¹⁶A be ze bin kaṅ se zin nèn Egipto là, a be ze bin tswe bwe là, mba ṅwi ze bin tshwèt mbwôg là nsi yab mbu num bin ntùm ngô Egipto, mba nziku' ze bin tshwèt mbwôg là nsi lat num bin Egipto, bin kwùte bwe.

¹⁷Njoṅ benntùn fa tse bo nsi kaṅ se yub nèn Egipto, tswe bwe là, nsi kwù ṅwi, kwù nziku'u, ke keya' lo. Sàm mèn ke nsi tum bwe kù mbwe nge' tse me nsi ghù a se' num bo là.

¹⁸Nummbe tshù mba Tshùaben tàndà ntsho, Nsi Israél tshob li: Ndaṅndaṅ mba yantù àm bo tshùagntù àm na' nkam nsa num ba Yérusalém nà, be ndaṅndaṅ tshùagntù àm nsi kam sa num bin, a be ze bin nèn Egipto là. Bin nsi tù' nu fétwut, nu bwôg, nu neso ndon bo nu tuswe, be ke bèn nzi njen dù' li lag sine.

¹⁹Tshé' ba Yuda, tshù ju ze Tshùaben tshob bin ni: Kà bin nèn Egipto. Bin lèn sènni ndù me to' zine.

²⁰Bin ke mfùt'a wut tsin zin tu, nummbe bin lo tum àm mbaṅ Tshùaben Nsi zin, ntshob ndù: le'te Tshùaben Nsi yag num yag tu, nsoṅ yag lèn ju ze Tshùaben Nsi yag tshob là, bag nsi ghù mb'a tshob là.

²¹Sènni me tshob mb'a tshob là bin; là bin ke' ju' nze Tshùaben Nsi zin, ke ju' ju z'a tshob ndù me tshob bin nà.

²²Ndonni a bwô bin lèn ndù bin nsi kwù ṅwi, kwù nziku' ke keya' lo ntùm dù' bin tshwèt nkô nenèn tswe bwe là.