Read Medumba Yérémia 43 Bible Online

Yérémia 43 - Medumba bible

Yérémia 43

¹Ngô ju' ntshob fa mi Tshùaben Nsi yub na' mfà Yérémia ndù a tshob bo là. Nummbe Tshùaben Nsi yub lo tshob njoṅ men ntshob là ndù a tshob bo.

²Azaria nshum Hoshaya, Yokanan nshum Karéash boa njoṅ tshen ghako'tewut là fa tshob Yérémia ndù: a b'a ba tatte là ts'o tshwèt ntshob là. Tshùaben Nsi yag ke' tum o ndù o tshob mbe kà bag nèn ntswe Egipto.

³Là, a b'a Baruk nshum Nérija bèn nke ntènt'o num bag, a tshùa ndùlala nswèn yag mum mbu ba Kaldéa bo zwite yage, ke nelo' yag nèn yi ndà kuan Babilon no.

⁴Yokanan nshum Karéash, njoṅ tà ba soyé fa, ngô fa, ke ju' ntshu Tshùaben z'a na' ntshob ndù bo ghô ntùm ngô Yuda là.

⁵Yokanan nshum Karéash, njoṅ tà ba soyé fa lo' tshé' ba Yuda bo na' nsate ntùm njoṅ ngôngô fa, mbèn mbèn njam nse' netswe Yuda là,

⁶bandum, bènnzwi, bon, ngonngon mfen boa njoṅ benntùn fa tse Nebuzaradan tà ghabéb dù' faṅ boa Guedalia nshum Ashikam, nshum Shafan nà, mba ngatshob ntshob Nsi Yérémia bo Baruk nshum Nérija nèn yi.

⁷Bo nèn boa bo ntùm ngô Egipto, nummbe bo lo ke ju' ntshu Tshùaben. Bo zin nkum Takbanès.

⁸Tshùaben tshob ntshob mi Yérémia Takbanès ndù:

⁹Lo' ndoṅ nemotte ndem num miag ba Yuda bam netob nebom tsha' yi z'a be nze netsho yi ntshwèt Faraon z'a Takbanès là.

¹⁰Yen nà mbe tôg o tshob bo ndù: Tshù mba Tshùaben tàndà ntsho, Nsi Israél tshob li: M'a' tum bo diag ngafa' àm Nébukanetsar mfen Babilon, me te diaṅkwa se num men ndoṅ me lem nà. A nsi nyitte ngub i num bwe.

¹¹A nsi se' lab ngô Egipto: Zwite ben bo be ghavù là, lo' kuan nèn yi ndà kuan, ben bo kwù ṅwi là kwù ṅwi.

¹²Me nsi ton mba' tse nsi Egipto; Nébukanetsar nsi ton yube, a nsi lo' ba neto nèn yi ndà kuan. A nsi lo' ntsha' Egipto à ndaṅndaṅ mba ngabéb mbwe num ntswitte ntshèt num kummbaṅ se là, bèn tum tse kua' fite.

¹³A nsi be'te ba neto Bét-Shemesh ntùm ngô Egipto, ton mba' tse nsi Egipto fa.