Read Medumba Yérémia 44 Bible Online

Yérémia 44 - Medumba bible

Yérémia 44

¹Tshùaben tshob ntshob mi Yérémia num njoṅ ba Yuda fa tse bo ke ntswe Egipto, Migdol, Takbanès, Nof mba Patros là ntshob ndù:

²tshù mba Tshùaben tàndà ntsho, Nsi Israél tshob li: bin lo yen nge' fa tse me na' ngù a tsho Yérusalém boa ntusô Yuda fa là. Men ntusô là ke' be fam tà nkum sènni, mèn ke be tswe bwe.

³Yen nà fa b'a num nukebwô ze bo ghù, ndo' nkam yantù àm yi là. Bo lo fà tshu nelamte, mfa' tse nsi ba tum tse bo ke' lèn yube, bo, bin mba tà tsin nà.

⁴Me lo tum njoṅ ghafa' tshàm ghatshob ntshob Nsi bin fa. Me lo tum yub fe nkebnjù ndù bo tshob bin ndù kà bin bèn ngù tshen tshùaya'nu là tse me gha là.

⁵Là, bo lo ke ju', ke kù' ntoṅ; bo ke' kag nze kebwô, ke tsin neke mfà tshu nelamte tsemo' nsi.

⁶Yantù àm bo tshùagntù àm lo kam nsa, nkù ntusô Yuda boa tse manze Yérusalém fa. Bo ke' a fam bo kônkwa mba bin tshwèt njen sènni là.

⁷Ndonni Tshùaben tàndà ntsho, Nsi Israél tshob ndù: numke bin nke mfa' kebwô num tu wut tsin ndù à? Bin tshwèt ngù bo mbiagte bandum, bènnzwi, bon boa bonfi netèt Yuda; bin kô ndù kà sàm mèn yôg num bin ké?

⁸Numke bin nke ntshùa njam mfa' mbu min nke nkamte yantù àm, nke mfà tshu nelamte tsemo' nsi ntùm ngô Egipto dù' ze bin na' nse' tswe bwe à? A tshùa ndùlala bin ghù bo biagte zine, bin tù' ju ndon bo ju tuswe netèt ngôngô fa num nsitsha'a.

⁹Bin lag kebwô tse tà tsin ghù, tse fenfen Yuda ghù, tse zwi tshob ghù, tse tu wut tsin bin à zwi tsin ghù ntùm ngô Yuda num manze ts'a Yérusalém nà ké?

¹⁰Tà nse' nkum sènni bo ke' ben tu yub nsi, ke bwôg. Bo ke' ze ntshù' àm boa nkàn màm mi me na' njab mbwe bo mba mbwe tà tshob là.

¹¹A ndùlala Tshùaben tàndà ntsho, Nsi Israél tshob ndù: ndonni me kaṅ mvèn àm ntam zin yi. M'a' ghù nukebwô num bin, mbiagte ngô Yuda fa.

¹²Me nsi lo' tshé' ba Yuda tse bo kaṅ wut yub nèn tswe Egipto là. Njoṅ yub fa nsi vùte, njoṅ yub fa nsi vùte Egipto; ṅwi nsi biagte yube, nziku' biagte yube, neto' num mônke' nkum num ndùb; bo nsi kwù ṅwi bo nziku'u. Bo nsi tù' nu fétwut, nu bwôg, nu ndon bo nu tuswe.

¹³Me nsi so ntsha tu ben bo tswe Egipto là mba me na' nso ntsha tu Yérusalém, njam ṅwi, nziku' bo keya' là.

¹⁴Sàm mèn ke nsi tum kù netèt tshé' ba Yuda tse bo se' ntswe Egipto boa nkwate nebèn Yuda, dù' bo bèn te bwe là. Nummbe sàm mèn ke nsi bèn njam k'a ke nda' ndô tse tse bo nsi tum ntshu vùkob là.

¹⁵Njoṅ bandum fa tse bo lèn ndù zwi tshob tshwèt mfà tshu nelamte nsi ba tum nà, njoṅ bènnzwi fa tse bo tse'te bwe ndù bo yàm nà, boa benntùn fa tse bo ke ntswe ngô Patros là bùnte ntshob Yérémia ndù:

¹⁶Bag ke bam sàm nu num ju z'o tshob bag num lén Tshùaben nà.

¹⁷Là bag nsi ghù a ju z'a tum ntshu bag là: Nefà tshu nelamte màbwengub kamànyam, ma' ba ndu' yi, mba bag na' ngù bag à tà tshage, fenfen tshag boa kamkam tshag ntùm ntusô Yuda mba num manze ts'a Yérusalém nà. Bag lo ghù bàn kua' yàme; bag lo b'a ntùm fu', ke lèn tshag ju ze bo tsiaṅ nge' là.

¹⁸Tshù fe ndùse bag tsin nefà tshu nelamte mba neke ma' ba ndu' màbwengub kamànyam nà, bag to' nebwoṅ njoṅ i fa, nke nkwù ṅwi bo nziku'u.

¹⁹Mbèn mbe, ngelaṅ bag ke mfà tshu nelamte màbwengub kamànyam, nke ma' ba ndu' yi là, mb'a ke b'a mba du tshag kô là ké? Bag be mbe nabte makela' neghamt'é yi bo nema' ba ndu' yi bo lèn ju bwe.

²⁰Ndùlala Yérémia tshob ngô: bandum, bènnzwi boa njoṅ benntùn fa tse bo bùnte yen mal i là là ndù:

²¹Tshùaben ke' kwimte ké, a ke' kwimte tshu nelamte tse bin na' nton ntùm ntusô Yuda mba num manze ts'a Yérusalém nà ké? Bin, tà tsine, fenfen tsine, kamkam tsin mba benntùn tse bo ntùm ngô là na' mbèn ngù ndùlala.

²²Tshùaben lo ke fènte yàme, num ngùninu min mi tshùagntù, num tshùaya'nu tsin tse bin ghù là; ndonni ngô zin tù' b'a fam, mbe kônkwa, ntù' ju neso ndon yi mba bin tshwèt njen sènni là.

²³Tshen nge' li tsho zin mba bin tshwèt njen sènni l'a nummbe bin lo ton tshu nelamte, ngù nukebwô yi num Tshùaben, ke kô neju' nze Tshùaben, ke ze ntshù' i, ntag mi boa nkàn mi.

²⁴Yérémia bèn ntshob ngô boa njoṅ bènnzwi fa ndù: njoṅ zin fa ba Yuda fa tse bin be Egipto là, bin ju' ntshob Tshùaben!

²⁵Tshù mba Tshùaben tàndà ntsho, Nsi Israél tshob li: bin bin à zwi tsin lo tshob nu ntshu zine, ndo' mbu min nzwiagte ju bin tshob là yi. Bin tshob ndù: Bag kô nezwiagte nka'ni mi bag na' ngù là, nefà tshu nelamte màbwengub kamànyam bo nema' ba ndu' yi. Ndonni bin zwiagte min nka'ni, ngù ju bin na' njù' là.

²⁶Là, bin ba Yuda tse bin be Egipto là ju' ntshob Tshùaben. Tshùaben tshob ndù: Me lo' lén sàm se ndùb tshob saṅlaṅ yi ndù ntshu sàm ze Yuda ke nsi bèn tsiaṅ lén sàm ntùm ngô Egipto tshob ndù: Tshùaben Nsi b'a ntùn.

²⁷M'a' zi tshùalo num bo neghù nukebwô bo, ke b'a numebwô; njoṅ ba Yuda fa tse bo be Egipto là nsi kwù ṅwi bo nziku'u, tà nkum ndùse bo nsi biagte yub fa là.

²⁸Metsit bwoṅ i ze bo nsi tum ntshu ṅwi là nsi fe Egipto bèn njam Yuda. Là njoṅ tshé' ba Yuda, njoṅ benntùn fa tse bo se' netswe Egipto là nsi yene, a be ze màm ntshob ke mub lo nsi bèn bumte là.

²⁹Tshùaben tshob ndù: Me nsi la'te lèn z'a nsi ghù bin lèn ndù me nsi so ntsha tu bin yen dù' li là. A nsi tshùa ndùlala bin lèn ndù ntshob màm nsi bumte num bin, nge' tsho zine.

³⁰Nummbe Tshùaben tshob ndù: Me nsi swèn Faraon Hofra mfen Egipto mum mbu ghakeban tse, mum mbu ben tse bo tshwèt nya' tu i là. Me lo ghù be ndaṅndaṅ num Sédékia mfen Yuda, nswèn i mum mbu Nébukanetsar mfen Babilon, ngakeban i z'a na' nke nya' tu i là.