Read Medumba Yérémia 48 Bible Online

Yérémia 48 - Medumba bible

Yérémia 48

¹Num Moab. Tshù mba Tshùaben tàndà ntsho, Nsi Israél tshob li: nge' tu tusô Nébo là, nummbe bo sat'é! Tuswe ko Kiriot-Jearim, nummbe bo lo' i! Tuswe ghom Misgal nummbe bo be't'é.

²Nkuni Moab ke' bèn mbe. Bo tshwèt nsiaṅte mba bo biagt'é là Hesbon nke ntshob ndù: Be nène, be biagt'é netèt ngôngô! Madmén, bo nsi sate mba wù yu; tshù ṅwi là z'a yab njam o là.

³Nkua' benntùn tshwèt ntum Koronaim; a b'a nesate dù', a b'a nge' ndùb.

⁴Tshù Moab là ze bo be't'é là, bônke' tshwèt nkua'a.

⁵Bo tshwèt mbe ko' Luhit nke ntam keshù', nke mbe swe' Koronaim nke nkua' à zwezwe, nke ntshob ndù:

⁶bin kù, bin yôg tu wut tsine, ngù mba mèn ze bo ghua' i kônkwa là!

⁷Mba ba Moab na' njab ntù à num neto tshob boa tshunkàb tshob là, bo nsi lo' mba bo yub. Ngakeban nsi lo' Kemosh, bebun zin nèn yi ndà kuan boa ghafa' tse, mba kamkam tse.

⁸Ngasate dù' nsi tsho mba ntùm sit tusô lo, sàm tusô ke nsi tum ntshu i. Bo nsi sate tômbo'o, sate lekete' mba Tshùaben na' ntshob là.

⁹Bin fà mbàb Moab a fùt yi! Ntusô mi nsi tù' kônkwa, benntùn be ke bèn netswe bwe.

¹⁰Ndon tu mèn z'a lo' wag kà mfa' fa' Tshùaben yi là. Ndon tu mèn z'a ke' lo' ze ṅwi ntsho tshwèt nezwite benntùn nà.

¹¹Moab lo tswe tse fite fe ndùs'a be nshum nà. A lo ke nô ts'a ndù kam mba ndu' là. Bo lo ke ke nsô i ntùm mo' ntu' naṅ ntùm mo'; a lo ke nèn tse ndà kuan. A ndùlala mbwô mi ke' à be mbe mi, ndamte mi ke' bate tse.

¹²A ndùlala lé'njù tshwèt nse'e, tse me nsi tum benntùn bo se' nsô i ntùm mo' ntu' bèn yi ntùm mo' là. Tshùaben bèn ntshobe. Bo nsi sôte njoṅ ntu' tse fa k'a tù' à banban. Bo nsi ghù ntu' ngub tse fagte fafa.

¹³Tuswe nsi ko Moab num Kemosh, mba tuswe na' nko Israél num Bétél z'a ke njab ntù num i là.

¹⁴Be bin tshob ndù bin b'a ba neta nduku, soyé tse bo nabte wut nele' ntsho l'a ndùke?

¹⁵Tshù Moab là bo sat'é là, nzembwôg tshwèt nko' ntùm ntusô mi, bo watte neta benntùn tse bo be netèt ze nguanmèn nà. A b'a mfen ze lén se be Tshùaben tàndà ntsho là bèn ntshobe.

¹⁶Ze nevù Moab yà se'e; nge' i tshwèt nse' à be ndende.

¹⁷Bin tse ba ndùla', tse bin lèn lén se là làn i, nke ntshob ndù: Bo be' sen kôg fen neta li, sen kôg fen nekuni li à ndùke?

¹⁸Tum ntùm nkuni mu, ntswe num tsha' njum, me ba Dibon, bin tse bin be ntswe nsen ni là. Nummbe ngasate Moab tshwèt nko' nse' num bin. A sate tsin kàbngô fa.

¹⁹Tsin num manze ndôte me mènnzwi z'a be ntswe Aroer. Bètte mèn z'a tshwèt nkù là, z'a fiag ntum nà. Bètt'é nu z'a tum nà.

²⁰Tuswe ko Moab, nummbe bo be' i. Bin tsham zwe, nke nkua'a. Bin tshag nkùn nkaṅ ntse Arnon ndù bo sate Moab.

²¹Nevù ntsha se' mum ngô tômbo'o, num Holon, num Jahats, num Méfaat,

²²num Dibon, num Nébo, num Bét-Diblataim,

²³num Kiriot-Jearim, num Bét-Gamul, num Bét-Meon,

²⁴num Kiriot, num Botsra, num njoṅ ntusô fa mi a ntùm ngô Moab là, ntusô mi a be nesà mba mi a ghebte là.

²⁵Bo lab ze neta Moab mbe'e, bo be' ndaṅ bu i. Tshùaben bèn ntshobe.

²⁶Bin ghù ba Moab bum ndu', nummbe bo bù' tu yub nsi num Tshùaben! Ba Moab yaṅte wut yub ntùm fi ze bo ywi' là. Mba bo yub tù' ju netshabte.

²⁷Mba Israél lo ke tù' ju netshabte bin zin ké? Bo na' ngom i à netèt tshô ké kà bin nke mbe tsi lén se nke nyi'te tu zin à?

²⁸Ba Moab, bin yèn ntusô nsi, nkù nèn ntswe ntùm ba ngabndoṅ. Bin be mba ba bwoṅtambia' tse bo num nte nkàn yub à num ba ngabndoṅ nà.

²⁹Bag lèn ko'tewut ba Moab, ko'te wut yub z'a gha' mbu là, ndèn ka'te yub, yub ta'te, ndèn ka'te ze bin ghù ntù bin ndù a gha' mbu là.

³⁰Tshùaben tshob ndù: me lèn mba bo be njen wut yub là ntshùate, ndèn tshob tshô tse banban boa mfa' mub mi banban.

³¹A ndùlala ze me tshwèt ntsham zwe num Moab là, me tshwèt ntsham zwe num Moab fa. Bo tshwèt mfém num ba Kir-Hérès.

³²Ntù ndu' Sibma, me tshwèt ndàn num o ntshùa Yaezer; nkaṅ mu lo nèn tà ntôgte dibantse, nèn kà nkum dibantse Yaezer. Ngasate dù' vù ntùm tshu tsho ts'a tswe là mba num ntù ndu' mi bo tshwèt nkàb là.

³³Tsiaṅte bo fite bi mà tshwèt, mba ntùm ngô Moab. Me ghù ndu' zwimte ntùm ba ntshaṅ mi a bwe là. Bo tshwèt mbèn ndo' à tsiaṅte mfa' yi tshab. Nkua' ntsho bèn mbe, ke bèn mb'a nkua' tsiaṅte.

³⁴Nkua' mi a fe Hesbon nà nèn tà nkum Eléalé; bo tshwèt ngù bo nju' nze yub tà nkum Jahats, neto' Tsoar tà nkum Koronaim, tà nkum Eglat-Shelishija; nummbe mba ntse mi a be Nimrim nà sate fafa.

³⁵Tshùaben tshob ndù: M'a' biagte Moab bo mba we lo z'a be nko' nèn ntùm mba' ba mbwe' nke nton tshu nelamte ze nsi là.

³⁶Ntù ke njol à mba mandô là num Moab. Ntù àm ke njol à mba mandô là num ba Kir-Hérès. Nummbe njoṅ tshu mebwô fa tse bo tse'te là bi.

³⁷Nummbe bo kom njoṅ tu fa, nkebte njoṅ nyiaṅ ntshu fa, bo tshebte mfaṅ num njoṅ mbu mub fa, ntaṅte nke'mbàm tun bo.

³⁸Nda' nekua' bèn mbe ntumba' Moab boa tse nsém. Nummbe me tsit Moab mba kab z'a ke' ghù njoṅ i là. Tshùaben bèn ntshobe.

³⁹Tshù mba bo be' i njene! Bin tsham zwe. Moab tshwèt nkaṅ mvèn i ntùm tuswe! Moab tù' à ju tshabte bo fétwut num ben tse bo diaṅ i mbum nà.

⁴⁰Nummbe tshù mba Tshùaben tshob li: Tshù ngakeban nà z'a fùt mba sa'mbu' là, a nyitte mbàb mi num Moab.

⁴¹Bo be' Kiriot. Bo ket tse kàbngô fa nèn yi. Ntù tse sa'nde' Moab, be sen lé'njù l'a mba ntù ta' mènnzwi z'a tshwèt ndùbte là.

⁴²Bo nsi biagte Moab, a ke nsi bèn be ta' tumngô. Nummb'a bù' tu i nsi num Tshùaben.

⁴³Tshùaben tshob ndù: Bwôg, gheme, nkù num num o me ze Moab.

⁴⁴Mèn z'a nsi kù mbwe mbwôg là nsi vù ntùm gheme, mèn z'a tum ntùm ghem nà nkù nsi ghom i. Nummbe me ghù ngu'njù nevù ntsha se' num i, mba num Moab. Tshùaben bèn ntshobe.

⁴⁵Ghakùla' tsin bam netshaṅ Hesbon, ndù bo bot; là mo' bwôg kam Hesbon, mo' lambwôg tum netèt Sion. A tshwèt nkù ngaṅngaṅ Moab, nke nkù num tu nshumnshum tshu'te.

⁴⁶Ndon tu o là me Moab. Ben bo num ngamte bebun Kemosh là bi, nummbe bo nèn nshumnshum tshob ndà kuan, ngonngon tshob tù' kuan.

⁴⁷Là me nsi lo' kuan Moab bèn yi njam num mo' ngelaṅ, Tshùaben bèn ntshobe. Tshù mba bo nsi tsho'te Moab là.