Read Medumba Yérémia 50 Bible Online

Yérémia 50 - Medumba bible

Yérémia 50

¹Tshù ntshob mi Tshùaben tshùa num ntshu ngatshob ntshob Nsi Yérémia, ntshob num Babilon, mum ngô ba Kaldéa li:

²Bin tswi yen nkùn ni netèt ngôngô; bin tshag yen nkùn nà! Bin te ta' keki tù; bin soṅ yen nkùn nà! Kà bin lem sàm ju num bwe; bin tshob ndù: Tshù Babilon nà ze bo lo' i là. Bebun Bel vù ntùm tuswe, bebun Merodak là ze ngakeban be't'é là; tuswe ghom tshen neto tse là fa; bo be'te tshen neto là fa,

³nummbe mo' nzwit mèn tshwèt mfe tu nke nse' num i, a nsi lo' ze ngô ghù kônkwa ze mènntùn ke bwe là yi. Nyàm boa benntùn nsi kù yen dù' là bi nsi.

⁴Tshùaben tshob ndù: Ntùm tshen lé'njù là, num yen ngelaṅ nà, bon Israél boa bon Yuda nsi bèn njam ku ntshù'; bo nsi be zin ke nkua'a, bo nsi diag Tshùaben Nsi yub.

⁵Bo nsi bètte nze Sion, kaṅ wut yub ke lôte bwe, nke ntshob ndù: Bin se'e, bin tshùa njam kàn s'a tswe matmat là ndat wut tsin num Tshùaben. Kà bin zi ndag sen kàn nà sàm lé'njù.

⁶Yàm nzwit mèn na' mb'a bwoṅ mbwe ts'a bi là; ghabéb yub lo ghua' yube, ngù bo nke ntsha num ba mbale; tshen mbwe là lo ke nèn num ba mbale, num nkônga, nke ndag sob kin.

⁷Njoṅ benntùn fa tse bo à bo ke mbumte là lo ke mfèt yube; ghakeban tshob nke ntshob ndù: Nukebwô ke tse nsi, nummbe bo ghù nukebwô num Tshùaben, z'a be kua' yub ndàlem, Tshùaben ze tà tshob ke nywinte num i là.

⁸Ba Israél, kuan, bin kù ntum Babilon, bin tum ntùm ngô ba Kaldéa, bin be mba ba fot là mbwe bwoṅ nyàm.

⁹Tshù, m'a' kamte ngô ndùbndùb num Babilon. Tshen ngô là nsi fe à tu. Bo nsi bumte ma' i ntsho, kà lo' i; nkét mub b'a mi tonte ngama' ntsho, z'a ke' be bèn njam mbu ndaṅ nà.

¹⁰Tshùaben tshob ndù: Bo nsi lag ntsha' Kaldéa. Njoṅ ben fa tse bo lag ntsha' i là nsi ywèle.

¹¹Bin ba Babilon tse bin na' ndag ntsha' ntsi' màm nà, bin be tsin à ntùm tsiaṅte bo ṅwate. Ṅ, bin tam nde ntùm nenà mba metshab mfô là. Bin kua' mba nyàmdiaṅ tse bo kam tùntu là.

¹²Nda' ndù tuswe ghom mà zin. Wut mènnzwi z'a bwe zin nà féle, tuswe ko i; tshù i là z'a tù' miagte ngô netèt ngôngô là. A b'a ta' kônkwa, ta' tsha' ndù a jum, ngage.

¹³A tshùa njam yantù Tshùaben ntù' fam, ze mèn ke bèn ntswe bwe là. A nsi tù' b'a nda' ta' fam. Njoṅ benntùn fa tse bo nsi tshùa mbaṅ Babilon nà nsi b'a ntùm tshàm, ke tôte fin num nkenko' mi.

¹⁴Bin njoṅ ghama' nkét fa, bin lo nsi ntsin ntsho njam Babilon. Bin ma' nkét num i, kà bin faṅ ta' két, nummbe Babilon ghù nukebwô num Tshùaben.

¹⁵Bin bu' ngoṅ ntsho njoṅ bag bag fa. Babilon nyit mbu mi, ntun mba' mi tshwèt nkôge; mi nkummba' vùte nsi. Nummb'a b'a yagte mba' Tshùaben. Bin yagte mba' num i. Bin ghù num Babilon mb'a na' ngù ze là.

¹⁶Bin biagte ngaywit ju Babilon, mbiagte mèn z'a tshùb ṅwi nekeb nsa yi ndù netsho' tshu là. A bwô ndù mba we lo kaṅ wul i ndôte ze nzwit mèn, mba we lo kù nèn mum ze ngô, mbwe ṅwi z'a tshwèt nsate dù' là.

¹⁷Israél b'a ta' mbwe z'a bi, ndù ba ngwayit bèn nta' i là. Mbwe mèn z'a fèl i là b'a mfen Asiria. Mbatte mèn bàa b'a Nébukanetsar mfen Babilon, a be' z'a mvôg mi.

¹⁸A ndùlala Tshùaben tàndà ntsho, Nsi Israél tshob ndù: Me nsi so ntsha tu mfen Babilon bo ze ngô, mba me na' nso ntsha tu mfen Asiria là.

¹⁹Me nsi lo' Israél bèn yi ze dù'ntswe. A nsi kém tse nyàm num Karmél bo Basan. Ntù i nsi ywèt num mbat Efraim bo Galad.

²⁰Num tshen lé'njù là, num yen ngelaṅ nà, bo nsi diag mfànnu Israél be ke yen, diag nukebwô Yuda, a be ke bèn mbe. Nummbe me nsi lagte tshé' i ze me nsi faṅ nà. Tshùaben bèn ntshobe.

²¹Tshùaben tshob ndù: Ko' nèn mum ngô z'a ghù tshubte tatu là, ko' nèn num ba la' tse, nso ntsha num bo! Ghù njoṅ i fa kua' ndaṅndaṅ mba me tshob wù là!

²²Ngoṅ ntsho lo' la' ntùm ngô, nesate dù' ya' nka'.

²³Tshù, bo keb i, bo be' hama njoṅ njù nsitsha' fa! Bo sate Babilon netèt ngôngô.

²⁴Babilon, me lo bùn o nkù, o vù ntùm bwe, ke be ndù o lène. A lo fiag num o, ngom o, nummb'o lo kam Tshùaben zwe'.

²⁵Tshùaben tsho' ndà tshu ntsho, nsô tshu ntsho yantù i bwe. Sen nà b'a fa' Tshùaben tàndà ntsho, ntùm ngô ba Kaldéa.

²⁶Bin tsho njoṅ dù' fa Babilon, bin tsho ntùm nkandà mi, bin ghù mfèt mi mba mfèt nenà là. Bin sate Babilon! Kà sàm ju bèn ntù' num i.

²⁷Bin zwite njoṅ soyé tshob fa mba mfot mfô là, bin watte yube. Nge' tu bo là, nummbe sob lé'njù ku'u, yub ngelaṅ nevù ntsha.

²⁸Bin ju' nkua' ghakùla' tse bo tshwèt ntum Babilon nà nju'u. Bo ke ntswi à nkùn yagte mba' Tshùaben Nsi be. A nke njagt'a mba' i.

²⁹Njoṅ zin fa tse bin be ndù' ngoṅkét là, bin tsiaṅ ghama' nkét. Bin lam Babilon mbume, kà bin bam sàm mèn tume. Bin ghù yi ndaṅndaṅ mba mfa' mi be là. Bin ghù yi kua' mba tu wul i na' ngù ze là. Nummb'a lo lo' ka'te mbù' tu i yi nsi num Tshùaben ze Mèn Nelàn Israél.

³⁰A ndùlala tse ghuan benntùn nsi vùte num ba manze. Njoṅ tse ghama' ntsho fa nsi bi num sen lé'njù là. Tshùaben bèn ntshobe.

³¹Babilon ngako'tewut, me tam bu àm num o, nummbe so lé'njù te nsi, yu ngelaṅ nevù ntsha ku'u. Tshùaben tàndà ntsho bèn ntshobe.

³²Ngako'tewut nsi tiage, tam nsi. Sàm mèn ke nsi tum bù' i; me nsi te mbwôg num ntusô mi, a kù njoṅ dù' fa ndam mbume.

³³Tshù mba Tshùaben tàndà ntsho tshob li: Bo tamte bon Israél boa bon Yuda nke mfét yube. Njoṅ benntùn fa tse bo bwe ndo' yub nèn yi ndà kuan nà ke' yoṅ nkag yube, bo tshwèt nga nekag yube.

³⁴Nda' ndù ngatshu' yub b'a mèn neta, yi ze lén se be Tshùaben tàndà ntsho là. A nsi tshètte yub njam, ghù mbétni be ntùm ngô. A nsi ghù ba Babilon vètte.

³⁵Tshùaben tshob ndù: Ṅwi lo nsi num ba Kaldéa, num ba Babilon, num kamkam tse boa tse ghazenu.

³⁶Ṅwi lo nsi num ba ghatshob ntshob Nsi tse tatte; bo tù' b'a mba ba kagni là. Ṅwi lo nsi num tse neta nduku, kà bwôg ghom yube.

³⁷Ṅwi lo nsi num nyàmdiaṅ tse boa nkalig mi, ndo num njoṅ tshaṅ benntùn tse bo be netèl i là. A bwô ndù bo tù' b'a mba bènnzwi là. Ṅwi lo nsi num tshunkàb tse, bo lag njoṅ i fa.

³⁸Dù' jumte num mi ntse, ntse mi jumte fa, nummb'a b'a ngô ba neto, neto tshob kag bà tu bo.

³⁹A ndùlala nyàm kônkwa boa mbù tshwèt nsi tswe bwe, mènntùn be ke bèn ntswe bwe. Babilon ke nsi zi bèn be ta' nzwit mèn.

⁴⁰Tshùaben tshob ndù: Bo ke nsi zi bèn tswe bwe, a ke nsi bèn be dù'ntswe sàm mènntùn. A nsi b'a mba Sodom bo Gomora boa ntusô mi a ghebte, mi Tshùaben na' nsate là.

⁴¹Tshù ta' nzwit mèn nà z'a tshwèt mfe tu nke nse' là. Mo' ngô ndùb boa fenfen neta lo nsi num ntôg tsha'a.

⁴²Bo ghù ngoṅkét bo kô. Bo be ntshùag kà nja' nka', ke ghù kondèn. Nze yub ke ntshu' à mba ze dibantse là. Bo ko' num ba nyàmdiaṅe, nke mbébte nema' ntsho mba ta' mènntùn ntshù' là. Bo ke mbébte nema' a wù me ngon Babilon.

⁴³Mfen Babilon ju' tshô, mbu mi bot, nge' tshùb i, lèn ya ze mènnzwi be ngù ndùs'a tshwèt mbwe là.

⁴⁴Tshù, bo ke nko' num nkaṅ ntse Yordan mi ka't'a mba ta' ngwayit là, num nenèn num dù'ntswe ze neta. Me Tshùaben nsi yoṅ yub à kua' ndende, te mèn ze me tsho' i là bwe. Tshù, we z'a be ndaṅndaṅ mba m'a? We z'a nsi soṅ àm mba me nsi ghù à? A zit mfen z'a nsi tsin mbwe àm à?

⁴⁵A ndùlala, bin ju' mba Tshùaben tàmte num Babilon nà, boa ntàmtenu mi a ghù mum ngô ba Kaldéa là. Kua' nenùn bo nsi soṅte yub à mba fenyu' mbwe là.

⁴⁶Tshu'te mba bo lo' Babilon nà ghù tsha' nyi'te. Bo ju' mo' nkua' netèt ngôngô.