Read Medumba Yérémia 51 Bible Online

Yérémia 51 - Medumba bible

Yérémia 51

¹Tshùaben tshob ndù: M'a' kam mo' fetmbaṅ z'a sate dù' là num Babilon, mba num ben tse bo be ntswe Kaldéa là.

²M'a' tshag ghake'te ju Babilon. Bo nsi ke'te Babilon, kà sôte ngô a tù' à ngenge. Bo nsi tsho' fe num i njoṅ bag fa mum lé'njù nge'.

³A bwô nedù' ngoṅkét num mèn z'a tshwèt ndù' ze ngoṅkét là, num mèn z'a tshwèt nka'te ntùm tùn nà. Kà bin faṅ tse ghuan benntùn tse bo b'a soyé là. Bin biagte ze ntshu ntsho fa.

⁴Bo vùte nsi, nket mfaṅ à vùvù ntùm ngô ba Kaldéa. Mfaṅ bete num bo à mbam mbam num manze ts'a Babilon nà.

⁵Nummbe Tshùaben tàndà ntsho, Nsi Israél bo Yuda ke' ghua' yube. Ngô ba Kaldéa dun nukebwô tse bo tshwèt ngù num Mèn Nelàn Israél là.

⁶Bin tum Babilon nkù, mba we lo yôg tu i, ntag ndùlala mba bin nsi tsiag ntùm fam bi. Tshù, a b'a ngelaṅ yagte mba' li Tshùaben; a nsi ghù num Babilon ndaṅndaṅ mba mfa' mi be yi là.

⁷Babilon na' mbe ntùm mbu Tshùaben à mba ntu' gol là. Yen ntu' là lo ke ngù nsitsha' bum ndu'. Ngôngô lo nu ndu' mi. A ndùlala ze ngôngô tù' mbabun nà.

⁸Babilon yoṅ ngwù be ndende, mbe'e! Bin tsham zwe num i, bin diag fu num keko' se: Be mo' ndù a yate.

⁹Mba ba ghùn lo kô neyate Babilon, nda' ndù a ke' yate. Be ghua' i, mba we lo netèt be nèn ntùm ze be ngô. Nummbe ze nevù ntsha nèn tà nkum mfe kamànyam, a ko' tà nèn nkum mfe ntùm ndot.

¹⁰Ba Israél tshob ndù: Tshùaben tshètte ze be njam, nda'te nunetsine. Bin se' be soṅ tshô mà Sion, be soṅ fa' Tshùaben Nsi be.

¹¹Bin kùa nkét, bin tshùb ba ntshètntsho. Tshùaben kamte tu fenfen Media. Nummb'a kô nesate Babilon. A b'a yagte mba' Tshùaben, yagte mba' num nu ba' i.

¹²Bin te keki num nkummba' Babilon. Bin kwi'te ghabéb dù', bin yab ba ntom, bin kù' ndemte benntùn, nummbe Tshùaben tshwèt nzwiagte ju z'a kwate là. Nke nzwiagte ju z'a tàmte num ba Babilon nà.

¹³Wù Babilon z'o tswe mbaṅ ntse ndùbndùb, ngù tshunkàb yàm nà, yu ngelaṅ te nsi, ngelaṅ tshô mi wù ndonni.

¹⁴Tshùaben tàndà ntsho tshob nsaṅlaṅ ntshob ndù: me nsi ghù benntùn dun netèl o mba ngamntàn nà; bo nsi bu' ngoṅ ntsho tun o.

¹⁵A na' ndo' à neta i nabte nsitsha' yi, ndo' à zenu i nte njù yi nsi, ndo' à ze nesiaṅte nyitte kamànyam yi.

¹⁶Ntse be nju' nz'é, nkùmte dù' ntshù' mfe kamànyam. A be ngù ba ndot lo tun njù nko' nèn tù; a be ngù mbeba'mbaṅ bo mbaṅ be. A be nsô fetmbaṅ ntùm nta tse.

¹⁷Mba zit mènntùn no be ntù' nkagni njam nesiaṅte. Tuswe ko ngana tùn num neto z'a nabte là; nummbe neto tse b'a nda' tatte, ndù bo ke' ghù zwiag num bo.

¹⁸Tshen neto là b'a fa' s'a ke' ywimte là, mb'a fa' tatte. Tshen neto là nsi bi fa ngelaṅ ze nevù ntsha nsi ku' là.

¹⁹Là Tshùaben z'a be ntom nzwit Yakob là ke' b'a mba tshen neto là là. Nummb'a na' mbèn nabte mba ke lo. Israél bèn mbe nzwit mèn z'a be mi ntsi' là. Tshùaben tàndà ntsho b'a lén se.

²⁰Wù Babilon na' mbe m'a ta' hama ta' ju ntsho. Me lo lo' o nsate ba nufen yi.

²¹Me lo lo' o mbe' nyàmdiaṅ yi bo ngako' nyàm. Me lo lo' o ntshét kalig yi bo mèn z'a be num bwe là.

²²Me lo lo' o mbe' mandum bo mènnzwi yi, ndo' o mbe' njwèn mèn bo mônke' yi, ndo' o mbe' ménnshum bo ménngon yi.

²³Me lo lo' o mbe' ngabéb mbwe yi bo bwoṅ nyàm, ndo' o mbe' ngadù' nà yi mba nyàmna' tse. Me lo lo' o mbe' ba ngomna boa kamkam yi.

²⁴Tshùaben tshob ndù: Me nsi ghù num Babilon boa njoṅ ba Kaldéa fa be ndaṅndaṅ; m'a' ba' nukebwô fa ze bo na' ngù Sion nà num miag min ba Israél.

²⁵Tshùaben tshob ndù: Mbat dù' nesate dù' ke mfe là, me tam bu àm num o. Wù Babilon z'o ke nsate njoṅ njù nsitsha' fa là, me tshag bu àm num o. Me nsi bùn o mfe num ngondoṅ ma' nsi. Me nsi ghù o tù' mbat ze mbwôg kù i là.

²⁶Bo ke nsi sô ndoṅ ntôg mba' ke ndoṅ tun ba' lo num o; nummb'o nsi tù' fam à matmat. Tshùaben bèn ntshobe.

²⁷Bin te keki tù ntùm ngô, ntô nta ntsho netèt ngôngô! bin nabte ngôngô bo lo nsi num Babilon. Bin tsiaṅ ba nufen Ararat, Minni bo ze Ashkenaz num i. Bin te kamkam num i. Bin ghù ba nyàmdiaṅ se' num i mba ngamntàn tse nekuni là.

²⁸Bin nabte ngôngô, fenfen Media num i, ngomna tse boa njoṅ tse kamkam fa, mba njoṅ ngô fa z'a be ntô là.

²⁹Tsha' tshwèt mvètte, nke nyi'te; nummbe ntàmtenu Tshùaben num Babilon tshwèt mbumte. A nsi lo' ngô Babilon ghù kônkwa yi, benntùn be ke bèn netswe bwe.

³⁰Tse soyé Babilon ke' bèn nema' ntsho; bo tù' tsin à dù' tse bo kut ntsham ntsiag là; neta yub kôge, bo tù' b'a mba bènnzwi là. Bo tshwèt mbwôg num mba' mube, bo tshwèt mbe'te nzendà ts'a ntusô là.

³¹Ba ṅwa'ni tshwèt mbumte manze, ghatswi nkùn nke mbén manze, num nenèn nsoṅ mfen Babilon ndù bo lo' se tusô njoṅ bag tse fa.

³²Nesoṅ ndù bo lo' njoṅ manze fa, mbwôg kù ba dù' ntshe' fa, nesoṅ ndù mbu ba soyé yub, tuswe ghom yube.

³³Nummbe tshù mba Tshùaben tàndà ntsho, Nsi Israél tshob li: Tusô Babilon b'a mba dù' netsham nsa, ndùse bo tshwèt ntsham nsa là. A tù' mén nda'nda' ngelaṅ netsho' tshu ṅwag num i.

³⁴Yérusalém tshob ndù: Nébukanetsar mfen Babilon lo fél àm nsat'àm. A lo lo' àm ngù kab ze ju ke ntùm bwe là yi. A lo mi àm mba ta' ngamnyu là a lo ghù ju tanjoṅ ze me ghù là dun bam i. A lo ta' àm.

³⁵Yérusalém z'a b'a Sion nà tshob ndù: Nefètte lem bo mbàb àm ze Babilon fagte là nsi vù be kua' tu i. A bwô ndù lem tshàm tsho tu ba Kaldéa, Yérusalém bèn ntshobe.

³⁶A ndùlala Tshùaben tshob ndù: Tshù me nsi tshètte yu njam, me nsi yagte yu mba'a. M'a' ghù ze dibantse Babilon jumte, me ghù se tôntse zwimte.

³⁷Babilon nsi tù' b'a ta' fèt fam be dù'ntswe ba mbù tshwèt. A nsi be ju netshàme, ju tshabte; sàm mènntùn ke nsi bèn be bwe.

³⁸Bo nsi tamte tshu' mba ba ngwayit là. Bo nsi kua' mba bon ngwayit là.

³⁹Ngelaṅ wut tshob nsi dum nà, me ghù bo nu; me nsi ghù bo bum ndu', mfà wut tshob ntùm ṅwate. Yen nà nsi be tôg bo tam miaglo matmat, nzi ke bèn nzi ndo. Tshùaben bèn ntshobe.

⁴⁰Me nsi ghù bo swe' nèn dù' newat mbàb mba ba njùmbwe là. mba ba nkomnjù là, mba ba mfot mbwe là.

⁴¹Bo ghù à ndùke kà ndo' Shéshak, kà nkab mbu num i à? A na' mb'a nkuni njù nsitsha'a. A tù' nu fétwut ndù à ndùke? Bo sate Babilon netèt ngôngô.

⁴²Dibantse ko' num Babilon. Ntu' dibantse mi yàm neshu, nkabte Babilon.

⁴³Bo sate ntusô mi fa, tsha' jum, ntù' kônkwa. A b'a ngô ndù mènntùn ke' be tswe bwe. Sàm mènntùn ke' be tshùa bwe.

⁴⁴Me nsi so ntsha tu bebun Bel mà Babilon, me nsi sô ju z'a mi là ntshu i; ngôngô ke nsi bèn nèn mbaṅ i. Mba kua' kàbngô Babilon vù nsi.

⁴⁵Yàm nzwit mèn, bin tum netèl i, mba we lo yôg tu i. A bwô ndù bin tum ntshu tonte yantù Tshùaben!

⁴⁶Kà ntù zin tam, kà bin bwôg num ba tshu'te ts'a tshwèt ndàm ntùm ngô là; nummbe mo' tshu'te nsi ṅwag yen ngu' li, mo' bèn mbe ngu' z'a tshwèt nse' là. Nefètte lem nsi se ka ntùm ngô. Mo' ngatô nsi bù' tu i nsi num mo' ngatô.

⁴⁷A ndùlala, lé'njù tshwèt nse'e, ze me nsi so ntsha tu ze neto Babilon nà; tuswe nsi ghom njoṅ ze ngô fa; njoṅ tse fe ben fa nsi vùte netèl i.

⁴⁸Tshu'te tsiaṅte nsi be mfe kamànyam mba num nsitsha' num Babilon mba num tshu ts'a ntùm bwe là; nummbe ghasate dù' nsi fe tu tsho' vù num i. Tshùaben bèn ntshobe.

⁴⁹Mba Babilon ze nsi vù me tse fe ben Israél, nummb'a lo ghù tse fe ben njoṅ ngô fa vùte nsi.

⁵⁰A bwô ndù bin ba Israél tse bin tum ntshu ṅwi là nèn ke ghubte. Bin kwimte Tshùaben num dù' tsha' bin be bwe ngùanesà là. A ke' bwô ndù lén Yérusalém mi ntù bin.

⁵¹Tuswe lo ko yag ndùse bag ke nju' tute là, tuswe lo ke mfim se tshag ndùse ba tum se' ntsho dù' nelàn ntùm ndà Tshùaben nà.

⁵²A ndùlala tsemo' lé'njù bwe nse'e, tse me nsi so ntsha tu neto tse là; ghaket mfaṅ nsi kua' ntùm ze ngô fa. Tshùaben bèn ntshobe.

⁵³Tshùaben tshob ndù: A be ze Babilon ko' nkum be tà mfe kamànyam nà, a be z'a kut dù' ntsham ntsiage, mb'a be mèn ke tsho bwe là, mba me nsi tum ghasate dù' num i.

⁵⁴Nkua' yàm tshwèt ntum Babilon, nesate dù' b'a ze ndùb ntùm ngô ba Kaldéa.

⁵⁵Nummbe Tshùaben sate Babilon, ngù nkua' mi a tshwèt ntsho' ntoṅ mèn nà mi bwe; tshu'te ghasate dù' tse bo tshwèt ntèn nse' là, b'a mba ntshu' ntse ndùbndùb là. Yen tshu'te là tshwèt nèn tà.

⁵⁶Ṅ, ngasate dù' tsho' ngwù num i, num Babilon; bo kab mbu num tse soyé Babilon, ngoṅkét tshob be'te. Nummbe Tshùaben b'a ta' Nsi z'a be mba' mba we lo à ndaṅndaṅ mba mfa' mi be yi là. A be mfà ze nkàbfa' mba we lo bu i.

⁵⁷Me nsi ghù tse bon mfen boa tse ghazenu bum ndu', tse ngomna, tse kamkam boa tse soyé; bo nsi tam miaglo matmat, nzi ke bèn ndo. Mfen ze lén se be Tshùaben tàndà ntsho là bèn ntshobe.

⁵⁸Tshù mba Tshùaben tàndà ntsho tshob li: Ba zizi kàbngô ts'a Babilon nà nsi kôg vù nsi, mbwôg nsi kù nsànsà nzendà tse; yen nà b'a ndù ngô na' mfa' à banban, ndù ngôngô ke njen nge' à num mbwôge.

⁵⁹Nu ze ngatshob ntshob Nsi Yérémia na' ntshob Séraja nshum Mashséja, ndùs'a ke nèn Babilon bo Sédékia mfen Yuda là. A lo be be ndù Sédékia ghù num fen ngu'njù kuà. Tshù Séraja na' mb'a mbwe Shambellan ze ndùb.

⁶⁰Yérémia kite njoṅ nge' fa ts'a nsi tsho num Babilon nà ntùm ta' ṅwa'ni. Bo kite njoṅ men ntshob là fa num Babilon.

⁶¹Yérémia tshob Séraja ndù: Ndùs'o nsi kum Babilon nà, o nsi siaṅ men ntshob li fa,

⁶²tshob ndù: Tshùaben, a b'a wù bèn ntshob ndù bo nsi sate yen dù' li, ndù benntùn ke ba nyàm no, ke nsi bèn tswe bwe, là ndù yen dù' li nsi tù' kônkwa matmat.

⁶³Ndùs'o nsi miagte nesiaṅ yen ṅwa'ni li là, o nsi taṅ loṅ bwe ma' ntùm ntse Efrat,

⁶⁴tshob ndù: Babilon nsi bi lam mba yen ṅwa'ni li là; a ke nsi lo num nge' tse me nsi se' yi num i là. Bo nsi vùte nsi fame. Tshù dù' ze ntshob Yérémia kum bwe li.