Read Medumba Yérémia 6 Bible Online

Yérémia 6 - Medumba bible

Yérémia 6

¹Bon Benjamin, bin kù ntum netèt Yérusalém. Bin tô nta Tékoa. Bin te keki mà Bét-Akérém! Nummbe tshù nge' là z'a tshwèt mfe tu nse' là. A b'a mo' nesate ze ndùb.

²Me nsi sat'é, me nsi sate ngon Sion, z'a bwô, z'a be bott'é là.

³Ghabéb nyàm tshwèt nèn num i boa bwoṅ nyàm, bo tshwèt ntaṅte ntàb tshob ndiaṅ i yi mbume, mba we lo nke mfèt ze bag i.

⁴Ghakeban tshob ndù: Bin nabte wut nto' i. Bin se' be ko' njagnyam, nko' nène. Tshù nu l'a ghù be là! Njù à ke mbole, njù à ke nkabte, nke nsène.

⁵Be nène, be tsho' ngwù num i tèttswe', nsate mba' mi.

⁶Nummbe tshù mba Tshùaben tàndà ntsho tshob li: Bin ke' ntù, nkut dù' ndam Yérusalém yi mbume. A b'a tusô se bo nsi so ntsha tu i là. Yérusalém dun nefètte lem.

⁷Ndaṅndaṅ mba ntse be ntum ntùm tumnsi ntse là, be ndaṅndaṅ mfànnu Yérusalém be ntume. Bo ke ntshob à nda' nu nefètte lem bo nesate netèl i. Bo ke njen à be nkeko' boa mfaṅ netèl i.

⁸Yérusalém, a bwô ndù o nèn tsham wul o, mbwôg ndù kà ntù àm tsho' num o, me lo' o nkaṅ kônkwa yi, ngô ze benntùn ke bwe là.

⁹Tshù mba Tshùaben tàndà ntsho tshob me Yérémia li: Bo nsi tswitte tshé' Israél à mba bo num ntswitte tshé' ntàm ntùm nà ntù ndu' là. Yab bu o bwe mo' yoṅ i, mba ngakàb ntàm ntù ndu' là.

¹⁰Be me tshob à we, be me lo' à we mba mba' nkuan kà bo ju' à? Bo ke' ku'ni tshob nekù' ntoṅ. Ntshob Tshùaben be bo à ju newage. Bo ke' be ghù sàm ṅwate bwe.

¹¹Tshùagntù Tshùaben dun num àm, be me ke fènt'é nze. Sa yen tshùagntù là num mèn z'a be num manze là, num mbumte nguanmèn. Nummbe bo nsi lo' mandum bo mènnzwi, lo' njwèn mèn bo mèn ze ngu'njù tse yàm nà.

¹²Tshùaben tshob ndù: Mba' mub nsi be mi tsemo' ben, nà tshob boa zwi tshobe, ndùse me nsi nyit bu àm num ba la' là.

¹³Nummbe njoṅ yub fa num ntshàm ntù num nejù bin, neto' num mônke' tà nkum num ndùb. Neto' num ghatshob ntshob Nsi tà nkum num ngale'te, njoṅ yub fa be ntatte.

¹⁴Bo ke' be tshwinte keko' ngon yàm nzwit mèn mb'a ku'ni là. Bo num nke ntshob ndù: la' b'a tshaṅ! La' b'a kua' tshaṅ! ndù fite ke nsi.

¹⁵Tuswe nsi ko yube, nummbe bo num ngù tshùaya'nu; tuswe ke' be ko yube, bo ke' lèn tshob tuswe. A ndùlala bo nsi vù boa ben tse bo vù là. Me nsi ma' yub nsi ndùse me so ntsha tu bo là. Tshùaben bèn ntshob ndùlala.

¹⁶Tshù mba Tshùaben tshob li: Bin tsin num ba manze, ndôte. Bin bètte njwèn ntshagnze; bin yen manze ntùn z'a bwe là, ntam num yen nà, bin nsi fon fite bwe mum ntù tsine. Là, bo bùnte ndù: Bag ke nsi zin num yen manze là.

¹⁷Me lo yab ghalôte dù' mbaṅ bin ntshob ndù: Bin kù' ntoṅ num nze nta! Là, bo bùnte ndù: Bag ke nsi kù' ntoṅ num bwe.

¹⁸Ngôngô, bin ju'u, a bwô ndù mbumte ntumntum lèn nu z'a nsi se' là.

¹⁹Nsitsha' ju'u! Tshù, me ghù nge' tsho num yen nzwit mèn ni. A b'a ntàm fa' nkwatenu mi; nummbe bo lo ke ju' ntshob màm, mbèn ngwag tshob ntshù' màm.

²⁰Me lo' ju nelamte z'a fe Saba là ghù à ke yi à? Me lo' kub tù nelamte s'a fe ngô z'a ngùanesà là ghù à ke yi à? Nyàm tse bin tshwèt nton me là ke' bwô àm. Tshule'te tsin ke' lamt'àm.

²¹A ndùlala, tshù mba Tshùaben tshob li: M'a' yab ndoṅ fa'te mbwe yen nzwit mèn ni, ndoṅ mi tà boa nshumnshum tshob nsi tamte fa'te bwe là. Ba ndùla' boa shun tshob nsi kwùt'a num bwe.

²²Tshù mba Tshùaben tshob li: Tshù ta' ngô là z'a tshwèt mfe tu nse' là. Mo' ngô ndùb lo num ntôgnjù nke nse'e.

²³Bo tshùb ngoṅkét, ntshùb kô. Bo be njab nge', ke ke nko ndèn. Nze yub ke ntshu' à mba ze dibantse là. Bo b'a num nyàmdiaṅe, ndù bo nabte wut nele' ntsho à mba ta' mènntùn ntshù' là. Bo ma' à wù ntsho me Sion.

²⁴Ba Yérusalém tshob ndù: Tshu'te yub be njoṅ mbe ghebte mbu mag yub, nge' tsho yage, mba lèn ya ze mènnzwi be ngù ndùs'a tshwèt mbwe là.

²⁵Kà bin tum tshwèt, kà bin se' num manze; nummbe ṅwi ngakeban num bwe, mbe ndù bwôg se ka mbaṅ bwe.

²⁶Yàm nzwit mèn, a bwô ndù o tôg nke'bàm, njaṅte wul o ntùm bwembwôge. Ghù lèn nsivù z'a be mbe ndùse nkwi nshum mènntùn kwù là. Fètte ntsenyà, kua' ntsenyà zwe! Nummbe ngasate tshwèt nse' num bin à be kua' ndende.

²⁷Wù Yérémia, me lo yab o netèt yàm nzwit mèn mba neta ba' là, ndù o zwi'te yube, ndèn yube, ntshob nu num nzin mube.

²⁸Bo b'a ghatatu netèt ghatatu, mbe ghaghù ndàm, bo taa, nta mba tùn meba bo tùn nà, njoṅ yub fa bag nja' nka'.

²⁹Nsôg lam tone, tùn fôgtab kù mbwôge. Bo ke nton tùn mbwôg mbèn nton à banban. Be bangùa ke tsho' num bwe.

³⁰Bo ke ntsiaṅ tshen ben n'a silba newage, nummbe Tshùaben ghua' yube.