Read Medumba Yérémia 7 Bible Online

Yérémia 7 - Medumba bible

Yérémia 7

¹Tshùaben tshob Yérémia ntùm ntshob mi ndù:

²Tsin nzendà ndà Tshùaben, mfà nz'o tù ntshob men ntshob li ndù: Njoṅ zin ba Yuda fa tse bin be ntshùa num tshen nzendà li, nke ngwù nsi mbwe Tshùaben nà, bin ju' ju ze Tshùaben tshob là.

³Tshù mba Tshùaben tàndà ntsho, Nsi Israél tshob li: Bin bate manze tsine, mbate mfa' mine, ndù me ghù bin ghô ntùm yen dù' li.

⁴Kà bin ke ngua' wut tsin ntùm nenywinte tse fùte, nke ntshob ndù: Tshù ndà Tshùaben ni, tshù ndà Tshùaben ni! Tshù ndà Tshùaben ni nsen ni.

⁵A be ze bin bate manze tsine, mbate mfa' mine, a be ze bin ghù nunetsin netèt bin,

⁶a be ze bin ke' fétte ngùn, ménntse bo mfôg mènnzwi là, a be ze bin ke' fètte lem mbu' ntùm yen dù' li, mbe ze bin ke' tam njam tsemo' nsi, ndù nge' tsho zin nà,

⁷mba me nsi faṅ zine, bin ghô ntùm yen dù' li, ntùm ngô ze me na' mfà tà tsin matmat là.

⁸Là, bin num ngua' wut tsin ntùm nenywinte tse fùte, ts'a ke' ywimte num sàm ju là.

⁹Ndùlala ké! Neyi, nezwi mèn, neghù màndà, nenu ngu ntatte, nefà ju nelamte Baal, netam njam tsemo' nsi, tse bin ke' lèn yub là!

¹⁰Yen nà be mbe tôge, bin se' ngwù mbwe àm, ntùm yen ba' li ze bo num ntsiaṅ lén sàm bwe là, nke ntshob ndù: Bag yôg tshage! Mbèn nèn nto' neke ngù be tshen tshùaya'nu là.

¹¹Yen ba' là be num miag min à mba ngab ba fimntshu ké? Me ndù à ba' ze bo num ntsiaṅ lén sàm bwe là. Mba kua' tu wul àm yen ndùlala. Tshùaben bèn ntshobe.

¹²Ndùlala, a bwô bin nèn dù' ze me na' ngù Silo là, dù' ze lén sàm na' nke ntswe là. Bin yen mba me na' ngù num i njene. Me na' ngù ndùlal'a num tshùagntù yàm nzwit mèn Israél.

¹³Tshùaben tshob ndù: Ndonni, mba bin ghù lèn tshen tshu là, mba me lo ntshob nu bin fe nkebnjù bin ke kô neju'u, mba me lo ntsiaṅ zin bin ke kô nebùnte là,

¹⁴me nsi ghù num yen ba' là ze bo num ntsiaṅ lén sàm bwe, ba' ze bin num njab min nkwatenu bwe, mba dù' ze me na' mfà bin, bin à tà tsin n'a ndaṅndaṅ mba me na' ngù num Silo là.

¹⁵Me nsi ma' zin ngùanesà num miag màm, ndaṅndaṅ mba me na' ngua' njoṅ fèt tsine, njoṅ nzwit Efraim fa là.

¹⁶Mba wù là, kà mi ma' mbu num tu yen nzwit mèn ni: Kà kua' i, kà le'te num i, kà zin kam mbaṅ àm, nummbe me ke nsi ju' wù!

¹⁷Tu wul o ke' yen ju ze bo tshwèt ngù ntùm ntusô Yuda mba num manze Yérusalém nà ké?

¹⁸Bon tshwèt ntswitte ntshwèn, ba tà nke nkwé'te mbwôge, bènnzwi nke ntshwébte tage, nelo' nabte makela' yi màmfen z'a kamànyam nà, mbèn nke ma' ndu' tsemo' nsi, num nelo' nkag yantù yi ntù àm.

¹⁹Tshùaben tshob ndù: Bo ke nkag yantù à ntù àm ké? Bo ke' ke ngù à be num tu wut tshobe, tuswe bèn nko à be kua' yub tu wut ké?

²⁰A ndùlala, Tshùaben Nsi tshob ndù: Tshù, yantù àm bo tshùagntù àm sa num yen dù' là, num benntùn boa nyàm, num ntù tshwèt boa ntàm mi a be nsitsha' là. A nsi ke kù à be nekù, ke zi mbi.

²¹Tshù mba Tshùaben tàndà ntsho, Nsi Israél tshob li: Bin tamte tsin nyàm neton num tshule'te tsine, mfèt mbàb i.

²²Nummbe me lo ke tshob nu tà tsin mba ntshù' mfà num nyàm neton boa tshule'te, mum lé'njù se me na' nsô yub mà Egipto là.

²³Là, tshù nu ze me na' ntshob bo li: Bin ju' nz'àm mba me nsi be Nsi zin, tu wut tsin be yàm nzwit mèn. Bin zin num tshàm manze tse me na' ntshob bin nà, ndùlala ndù bin be ghafen.

²⁴Bo lo ke ju', bo lo ke kù' ntoṅ; bo lo ju' à ntag mi nze ntù yub ze kebwô fà bo là. Bo lo tsin à njam, ke b'a mbwe.

²⁵Fe lé'njù ze tà tsin na' ntum Egipto tà nse' nkum sènni là, me lo tum njoṅ ghafa' tshàm ba ghatshob ntshob Nsi bin. Me lo ke ntum yub mba sit lé'njù lo kua' nkebnjù.

²⁶Là, bo lo ke ju' ntshu àm, ke kù' ntoṅ. Bo lo ghù sagntù ntù bo. Bo lo ghù nukebwô ntshùa tà tshobe.

²⁷A be z'o tshob tshen tshu là bo là, mba bo ke nsi ju' wù. A be z'o kua' ntsiaṅ yub là, mba bo ke nsi bùnte wù.

²⁸Ndùlala tshob bo ndù: Yen ni b'a ngô z'a ke' be ju' nze Tshùaben Nsi i, ke be kô netshùb ze nezi'te là. Nunenùn bi nsi, a tum ntshu bo.

²⁹Tshùaben tshob ba Yérusalém ndù: Bin kom tu zine, ngua' nyiaṅ tse ngùanesà. Ko' num dù' ts'a ṅate là, njob nsivù. Nummbe Tshùaben ghua', ntam zin ze nzwit mèn ze bin kamte yantù i là ku.

³⁰Nummbe bon Yuda ghù ju z'a ke' bwô là num miag màm. Bo lo' tshùaya'nu tshob nse' njab ntùm ba' ze bo be ntsiaṅ lén sàm ntùm bwe là, ndo' nsagt'é yi.

³¹Bo kut mbwe' Tofét, ntùm tômbo' Ben-Hinnom, nke nton bon tshob tse bandum boa tse bènnzwi bwe. A ke me na' ntshob yen nu là bo, mbe ndù yen nkwate là ke' to' se' tu àm.

³²A ndùlala, Tshùaben tshob ndù: Tshù, tsemo' lé'njù tshwèt nse'e, tse bo ke nsi bèn tshob ndù Tofét b'a tômbo' Ben-Hinnom nà. Là bo nsi tù' tshob à ndù tômbo' nezwite benntùn. Dù' nsi bwoṅ kà bo tshoṅ fe ben Tofét.

³³Fe ben yen nzwit mèn ni nsi be jujù nsaṅ mi a mfe kamànyam nà, be jujù nyàm ts'a nsitsha' là. Sàm mèn ke nsi kamte yub bwe.

³⁴Me nsi ghù tshu'te tsiaṅte bo tshu'te ṅwate mi ntùm ntusô Yuda mba num tse manze Yérusalém. Ménnshum z'a ka mènnzwi là ke nsi bèn yob kwi, ménngon ze bo ka i là ke yob kwi. Nummbe ngô nsi tù' b'a ta' kônkwa.