Read Medumba Yérémia 8 Bible Online

Yérémia 8 - Medumba bible

Yérémia 8

¹Tshùaben tshob ndù: Num yen ngelaṅ nà, bo nsi sô mvôg fenfen Yuda, kamkam tse, ghale'te tse, ghatshob ntshob Nsi tse boa mvôg ben tse bo ke ntswe Yérusalém nà ntùm mfi mube.

²Bo nsi sate men mvôg là mbwe nyam, mbwe maṅwù, mbwe ntshu ntsho kamànyam, ze bo na' nkô i, mfa' yi, ntam njam i, ndiag i, ngwù nsi mbwe i là; bo ke nsi kùmte mvôg là, ke tshoṅ yube; bo nsi b'a mba ju netshab tsha' yi là.

³Vùkob nsi bwô tshùa yôg num tshé' benntùn tse bo nsi tù' num yen nzwit tshùagntù li là. A nsi b'a ndùlala ntùm njoṅ dù' fa me nsi yoṅ yub tshag bwe là. Tshùaben tàndà ntsho bèn ntshobe.

⁴Tshob bo ndù Tshùaben tshob ndù: Mèn ke ngwù nsi à ke bèn nelo ké? Mèn ke nkaṅ mvèn i à ke bèn nebèn njam ké?

⁵Numke kua' yen nzwit mèn ni Yérusalém njèn wul i njù, ntù' ke ndiag be nebi matmal à? A ke ngô à be ntùm tatte, nke nga nekaṅ ntù i.

⁶Me be nkù' ntoṅ, nke nju'u: Bo ke ke ntshob à mb'a lo mbwô ndù bo tshob là. Sàm mèn ke' kaṅ ntù num ze tshùagntù ntshob tu wul i ndù: A ke li ze me ghù à? Njoṅ yub fa so nde mba nyàmdiaṅ z'a so nde tshwèt ntsho là.

⁷Mba ghammàtat be ndèn ze ngelaṅ njù mfe kamànyam; bwoṅsaṅe, nganelét bo màṅwin mbù nke ndèn kua' ngelaṅ bo num nse' là.

⁸Be bin ku'ni netsiaṅ wut tsin ghazenu à ndùke? Be bin tshob mbe bin ghù ntshù' Tshùaben à ndùke? Fe ghakite tse tatte mi nke mfa' ts'a banban.

⁹Tuswe ko ghazenu, ntama' ghom yube, nu sag yube. Yen mbe bo lo wag ntshob Tshùaben. Zenu ze be bo ghù là b'a zil à?

¹⁰A ndùlala me nsi fà zwi tshob tsemo' ben. Nà tshob nsi tù' ze ben nswe. Nummbe njoṅ yub fa num ntshàm num nejù bin, neto' num mônke' tà nkum num ndùb. Neto' num ghatshob ntshob Nsi tà nkum num ngale'te, njoṅ yub fa be ntatte.

¹¹Bo ke' be tshwinte keko' yàm nzwit mèn mb'a ku'ni là. Bo num nke ntshob ndù: la' b'a tshaṅ! La' b'a kua' tshaṅ! Ndù lèn fite ke nsi.

¹²Tuswe nsi ko yube, nummbe bo num ngù tshùaya'nu; tuswe ke' be ko yube, bo ke' lèn tshob tuswe. A ndùlala bo nsi vù boa ben tse bo vù là. Me nsi ma' yub nsi ndùse me nsi so ntsha tu bo là. Tshùaben bèn ntshob ndùlala.

¹³Me kô ndù bag à bo miagte njoṅ i fa, Tshùaben bèn ntshobe. Tù ndu' ke bèn njam ntàme; mbatsi ke bèn njam ntàme. Mfu tù nsi ju naṅ nsi. Ju ze me na' mfà bo là nsi tum mbu bo bi.

¹⁴Ngô bètte ndù: Numke bag bin ntswe nsi à? Bin tse'te, bag bin nèn ntùm ntusô mi bo tsham ntsiag là, nkwùt'a bwe. Nummbe Tshùaben Nsi be fà be vùkob. A ghù bag bin nu ntse mi tsheb be bwe là. A b'a nummbe be ghù nukebwô num Tshùaben.

¹⁵Be na' ke nywinte fite, là, sàm nufen ke se' be; nke nywinte neyate, mbe tshù nge' te nsi.

¹⁶Nkua' nyàmdiaṅ tse tshwèt ntum nze Dan. Njù nsitsha' tshwèt mbe ju' nkua' mub nke mvètte. Bo tshwèt nse'e, nke ndagni ngô boa tshu ts'a bwe là, ndagni tusô boa ben tse bo ntùm bwe là.

¹⁷Nummbe me tum nyu boa mbanyu netèt bin. Be mèn ke lo' tse ka nsi num bo. Bo nsi tshôgte zine. Tshùaben bèn ntshobe.

¹⁸Yérémia bètte ndù: Me yen tswe'tentù à yà ntùm nge' àm à? Me tshwèt njen nge' ntùm ntù àm.

¹⁹Ju' nkua' yàm nzwit mèn n'a tshwèt mfe num tsha' tà ngùanesà nse' là: Tshùaben ke' bèn nebe Sion ké? Ze mfen Sion ke' bèn mbe netèl i ké? Numke bo na' ndo' neto nekom nkamte yantù àm yi, ndo' neto ba tum nkamte yantù àm yi à?

²⁰Ba la' bag tshob ndù: ndù netsho' tshu yà tôge, nkwin njù mi, ke be ndù be yôge.

²¹Nge' yàm nzwit mèn be't'àm fa. Me b'a ntùm nenywine, bwôg ghom àm.

²²La netshùm ke' be Galad ké? Ngaka ke' be bwe ké? Numke bo tshwinte yàm nzwit mèn a ke yat'à?

²³Ho! a fe mbe be ndù ntse dun tu àm, miag màm bèn ndun ntsenyà, mba m'a' ke ndàn bonnkat ngô àm tèttswe' mba mbwôgtshù.