Read Medumba Nsindàvù 2 Bible Online

Nsindàvù 2 - Medumba bible

Nsindàvù 2

¹A ndùke! Tshùaben lo' ba ndot nkabte ngon Sion yi ntùm lé'njù yantù se! A tsin mfe kamànyam mba' nkuni Israél ma' nsi num nsitsha'a!

²Tshùaben sate njoṅ tse dù'ntswe Yakob fa ke ko ndèn. A kôg kàbngô ngon Yuda fa ntùm tshùagntù i naṅ nsi. A naṅ yub num tsha'a; a lo' tse nufen fenfen tse mba ju banban nà.

³A be' njoṅ neta Israél fa ntùm tonte yantù i. A lo' bu i ze zwim ndo yi mbwe ngakeban. A tete ba lambwôg netèt Yakob, a nke nkù njoṅ bag tse fa.

⁴A dù' ngoṅkél i mba ngakeban nà. Bu i ze zwim bù' tù mba ta' ngamaṅte là. A biagte mba ke lo z'a ke mbwô num miag là. A sa yantù i num ntàb ngon Sion mba mbwôg là.

⁵Tshùaben na' tù' b'a mba ngakeban nà. A lo biagte Israél, mbiagte njoṅ mba' mi fa. A sate kàbngô tse fa. A ghù ya boa netsham zwe dun netèt ngon Yuda.

⁶A sa ntàb i mba ta' nka' là. A sate dù' mbumt'é. Tshùaben ghù bo lag ba jùa bo Sabbat mà Sion. Tonte yantù i ghù a ghua' mfen bo ngale'te.

⁷Nu tômbwôg Tshùaben bo dù' i ze nelàn bag i, a ghua' yube. A swèn nkummba' Sion mum mbu ngakeban. Ba tshu'te ko' ntùm ndà Tshùaben mb'a be mbe num ta' lé'njù jùa là.

⁸Tshùaben lo jù' nesate nkummba' ngon Sion. A bùn nkù, a ke' sô bu i ke be ndù a biagte yube. A ma' kàb boa kàbngô ntùm vù; bo tù' b'a ta' fam num yen ngelaṅ ni.

⁹Nzendà tse kôg ntsho ntùm tsha'a. A bagte tsemo'o, mbe' fùn tsemo' num bwe. Ze mfen boa tse kamkam b'a netèt ngôngô; ntshù' ke' bèn mbe. Mba ba ghatshob ntshob Nsi ke tshwèt mbèn nzi sàm njem z'a fe Tshùaben nà.

¹⁰Tse ghakwé mbwe ngon Sion tswete nsi, ntù' b'a ntshu mi'i. Bo yo' tu yub bwembwôge, ntôg nke' mbàm tun bo. Ngonngon Yérusalém tse bo ke' tabte yub là tshwèt mben tu tshob nsi.

¹¹Ntsenyà tshwèt nswe' tu àm, nto màm nke nkaṅte, ndù nke ntum naṅ num tsha'a. A be ndùlal'a nummbe ngon yàm nzwit mèn tù' à fam. Bon boa bonfi tshwèt ngwùte num manze tusô.

¹²Bo lo ke mbètte mà tshob ndù: Nsa bo ndu' b'a yà? Nke ngwùte num manze tusô mba ben bo ket mfaṅ nà, nke nkwùte num ndàntù mà tshobe.

¹³Be me tshob wù à ndùke? Ngon Yérusalém, be me lo' à ke mfà mfi' o yi à? Be me yen mfuni mu à yà, be me fite ntù o à ndùke ngon Sion ze bo ke' tabt'é à? Nummbe keko' so zi à mba dibantse là: We z'a ku'ni neyat'o à?

¹⁴Tsho ghatshob ntshob Nsi lo zi à njem banban, njem tatte wù. Bo lo ke bù' fu num mfànnu mu, ndù bo sô o ntùm nu kuan. Bo na' ntshob à ntshob tatte boa mi fùte wù.

¹⁵Njoṅ ghatshùagntù fa tshwèt mbu'te mbu num o, nke ntôte fin, nke nyi'te tu num ngon Yérusalém, nke ntshob ndù: A kua' tusô se bo ke ntsiaṅ i bwônja' li ké? Z'a b'a tsiaṅte nsitsha' fa li là ké?

¹⁶Njoṅ ghakeban tsho fa gha' ntshu yub num o, bo tshwèt ntôte fin, nke mfèt nsô, nke ntshob ndù: Bag mi i koṅkoṅ. Tshù kua' lé'njù bag ke mbéb li, bag zin tà nkum num i, bag yen i!

¹⁷Tshùaben ghù ju z'a na' njù' là, a zwiagte ntshob mi a na' ntshob tà ndùke lo là, nsate dù' ke ghù kondèn: A lo' o ngù ju tsiaṅte yi mbwe ngakeban, a bù'te ze neta ghafétt'o.

¹⁸Ntù yub tshwèt nkua' ntsiaṅ Tshùaben nke ntshob ndù: Kumba' ngon Sion, faṅ koṅ ntsenyà swe' tu mbwôgtshù bo tèttswe'. Kà bam nefite, kà bam ndù nyilag o fite.

¹⁹Lo nsi, tsham zwe mba num sit laṅ njù lo tèttswe'. Sate ntù o mba ntse be nsa là mbwe Tshùaben. Tshag mbu mu tù, nde't'é num tu bon tsho, tse bo tshwèt nkwù nziku' num ntôg njoṅ manze fa là.

²⁰Tshùaben, lôte njen mèn z'o ghù yi ndùlili là! A lo bwô ndù bènnzwi fèt bon ts'a tum bam bo là ké? Tshen bon nà b'a ju ze bo num nkwe'te là. A lo bwô ndù bo zwite ghale'te boa ghatshob ntshob Nsi ntùm dù' Tshùaben ze nelàn ké?

²¹Bônke' boa ywèn benntùn nôte nsi num manze. Ngonngon tshàm boa bonnshum vùte num ntshùag ṅwi. O lo zwi neshu num lé'njù yantù su, o lo watt'a ke ko ndèn.

²²O lo tsiaṅ fétwut ma' num àm bag bag, mb'a be mbe lé'njù jùa là. Sàm mèn lo ke tum, sàm mèn lo ke tù' ntùn num lé'njù yantù Tshùaben. Ngakeban àm lo biagte ben tse me na' ntshwinte yube, ben tse me na' nkwiagte yub là.