Read Medumba Ezékia 1 Bible Online

Ezékia 1 - Medumba bible

Ezékia 1

¹A lo be mbatte ngu'njù ṅam ntat, mum lé'njù tàn mum ṅwù kuà mba me be netèt kuan tse bo be mbaṅ ta'ntse Kebar là, kamànyam gha' nte nge, me yen njem ts'a fe Nsi là.

²A lo be mbatte lé'njù tàn mum ṅwù - a na' mb'a mbatte ngu'njù tàn mba mfen Yoyakim be ndà kuan nà -

³ntshob Tshùaben se' Ezékia nshum Buzi, ngale'te Nsi, mum ngô Kaldéa, mbaṅ ta'ntse Kebar; a bwe ze bu Tshùaben yab num àm, me Ezékia là.

⁴Me lo ke ndôte, njen njem, mo' tonkèt fetmbaṅ fe tu, mo' tu' ndot bo mo' lambwôg nke nsate nka' neké' bag bag. Mo' ju lo be netèt bwe nke nziag mba tùn meba s'a tum mbwôg là.

⁵Tsemo' nyàm kuà tse ntshù mub fute mi mènntùn nà bèn ntum netèt bwe.

⁶Mba zit lo lo ghù se tse kuà, ngù mbàb mi nkùa.

⁷Nku mub na' tsin ndaṅndaṅ, bam nku mub be mba bam ku mfô là, nke nziag mba tùn se bo kwit'é là.

⁸Bo lo ghù mbu mènntùn bam mbàb mube, num bag wut tshob kuà; njoṅ yub kuà fa lo ghù se tshobe, ngù mbàb mube.

⁹Mbàb mub lo latte. Tshen nyàm nà lo ke mbe zin ke kaṅ wut yub, là mba we lo nke nzine, nèn mbwe be ndaṅndaṅ.

¹⁰Mbe se' mba ntshù se yub là, njoṅ yub kuà fa lo ghù se mènntùn mbwe, njoṅ yub kuà fa lo ghù se ngwayit bag bu zwim, njoṅ yub kuà fa lo ghù se mfô bag bu kwéb, njoṅ yub kuà fa lo ghù se ghammàtat.

¹¹Tshù mba se tshob be là. Mbàb mub lo gha'te mfe tù; memo' mbàb mub mbàa lo latte, memo' mi mbàa nke nkabte wut tshobe.

¹²Mba we lo nke nzine, nèn mbwe be ndaṅndaṅ; bo lo ke nèn mba zit bag lo ze ywèt tèn yub ntshag ndù bo nèn nà; bo lo ke mbe zin ke kaṅ wut yub.

¹³Ntshù tshen nyàm nà lo ke mfute nkekimbwôg mbwôg ndùb, a na' mb'a mba ntshù tswe'nka' là, mbwôg nke nzinte netèt tshen nyàm nà; yen mbwôg là nke nké'é, ntswe mba beba'mbaṅ nà nke ntum bwe.

¹⁴Ba nyàm nke nkù nèn mbèn nse' mba beba'mbaṅ nà.

¹⁵Me lo ke ndôte tshen nyàm nà, mbe tshù njen mo' ku nsi mba ze matua là, mbwe se tshob tse kuà, mbwe tshen nyàm nà.

¹⁶Ntshù men nku matua là bo lèn yub lo b'a loṅ tanjoṅ (Krisôlitô) là, njoṅ nku mbit nkuà fa be mba ntshù'. Ntshù mub bo lèn mba zit ku lo be mb'a b'a netèt mo' là.

¹⁷Men nku là lo ke mbe zine, nke nèn bag tse kuà fa, ke be kaṅ wut tshob ndùse bo tshwèt nzin nà.

¹⁸Men nku là lo diaṅ mbume, ntse tshob sag nèn tù neshu, mba miag yàm ntùm men nku nkuà là ndiaṅ mbume.

¹⁹Ndùse ba nyàm ke nzin nà, nku là nke nzin mbaṅ bo; ndùse ba nyàm ke ndo nefùt num tsha' là, mba nku là fùt yub.

²⁰Tshen nyàm nà nke nèn dù' ze Ywèt tèn yub ntshag ndù bo nèn nà; men nku là nke mfùt nèn boa bo, nummbe ywèt ba nyàm lo be num men nku là.

²¹Ba nyàm lo ke nzin nku là zin; ntsin bo tsin; mfùt bo fùt boa bo, nummbe ywèt ba nyàm lo be num nku là.

²²Mo' ghub (kub) ju lo be num tu ba nyàm nke nziag mba loṅ tanjoṅ (Kristal) là; yen ju là na' mb'a mfe num tu ba nyàm.

²³Mbàb mub lo b'a ndaṅndaṅ bam yen ghub ju là, ndù a gha'te, mo' nke nkwag mo'o. Mba zit lo lo ghù mbàb mbàa mi a ke nkabt'é là, ngù mbàb mbàa mi a ke ndo' nkabte wul i yi là.

²⁴Me lo ju' tshu'te mbàb mub ndùse bo ke nzin nà, a be mba tshu'te ntse ndùbndùb là, ke mba ze tonkèt fetmbaṅ no; a na' mb'a mo' tshu'te ndùb, mba ze ta' ntshu ntsho là; bo lo ke ntsine, nkôgte mbàb mube.

²⁵Mo' tshu'te lo ke ndo num ghub ju z'a be num tu tshob ndùse bo tsin nkôgte mbàb mub là.

²⁶Mo' ju lo be num ghub ju z'a be num tu bo là, ntswe mba loṅ fôgtab (safir) là, ndù a fute diaṅkwa; mo' se tum num diaṅkwa là ndù a fute ze ta' mènntùn; yen se là na' mb'a mfe tu diaṅkwa ke b'a kua' num bwe.

²⁷Me yen mo' ju neziag mba tùn meba s'a tum mbwôg là lo dù' z'a tswe mba zwe' i là nèn tù. Me bèn njen mo' ju mba mbwôg là lo dù' z'a tswe mba zwe' i là nèn nsi. Mo' kuni nka' diaṅ yen se mèn nà mbume.

²⁸Nka' là z'a diaṅ mbum nà lo b'a ndaṅndaṅ mba kôngamnyu s'a be ntum ntùm ndot mfe tù mum lé'njù mbaṅ nà. Tshù mfuni Tshùaben nà. Me lo be yen ndùlala ngwù nsi kabkab, nju' mo' nze mèn nke ntshobe.