Read Medumba Ezékia 13 Bible Online

Ezékia 13 - Medumba bible

Ezékia 13

¹Tshùaben tshob me ndù:

²Mén mèn, tshob ntshob Nsi num tse ghatshob ntshob Nsi Israél. Tshob ben tse bo be ndo' wut tshob mba ngatshob ntshob Nsi là ndù bo ju' ntshob màm!

³Tshù mba Tshùaben Nsi tshob li: Nge' tu ghatshob ntshob Nsi tse bo ke' ghù nkwate là. Bo ke njôg a mba zenu yub tshwèt ntshagte yub là, ke ke njen sàm ju!

⁴Israél, tsho ghatshob ntshob Nsi b'a mba tswenyàm tse bo be netèt fam nà.

⁵Bin ke' ko' nèn ntshètte ngô, bin ke' kut kàbngô ndam tunndà Israél yi mbume, ndùlala ndù a tswe ntùm tànntù ntùm ntsho, mum lé'njù Tshùaben.

⁶Tshob njem b'a tse banban, ntshob mub be mi tatte; bo be ntshob ndù: Tshùaben tshob mbe! Ke be ndù Tshùaben tum yube. Bo be ngù benntùn nywinte ndù ntshob mub nsi bumte.

⁷Njem tse bin yen nà ke b'a tse banban ké? Ntshob mi bin be ntshob là ke b'a mi tatte ké? Bin be ntshob ndù: Tshùaben tshob mbe! Ke be ndù me tshob.

⁸A ndùlala, Tshùaben Nsi tshob ndù: Mba bin be ntshob tshen tshu banban nà là, mba tsin njem b'a tse tatte là, tshù me lo nsi num bin. Tshùaben Nsi bèn ntshobe.

⁹Bu àm lo nsi num ghatshob ntshob Nsi tse tshob njem b'a tse banban, ntshob mub be be mi tatte là; bo ke nsi be netèt mbumte yàm nzwit mèn. Bo ke nsi kite lén sob mum ṅwa'ni tunndà Israél. Bo ke nsi tsho mum ngô Israél. Yen ngelaṅ nà bin nsi lèn ndù me b'a Tshùaben Nsi.

¹⁰Nummbe bo be nzwiaṅte yàm nzwit mèn, nke ntshob ndù: La' b'a tshaṅ (Nu ke nsi!) Ndù la' ke' b'a tshaṅ. Bo be njoṅ mbe kut kàbngô, bo yoṅ mbe njam nke nsaṅe.

¹¹Tshob ben tse bo tshwèt nsaṅ nà ndù: Mo' neta mbaṅ nsi be, nywinmbaṅ vù, mo' tonkèt fetmbaṅ nsi shùme,

¹²bin be yen kàbngô vù. Bo ke nsi tshob bin ndù: Zin ze bin lo' nsaṅ yi là yà ké?

¹³Tshù, Tshùaben Nsi tshob ndù: Me nsi kam mo' tonkèt fetmbaṅ mum tshùagntù àm, mo' neta mbaṅ tshùa num yantù àm ndo; nywinmbaṅ nsi tshùa njam yantù àm z'a bagte dù' là vù.

¹⁴Me nsi lab kàbngô a kôg naṅ nsi boa zin se bin lo' nsaṅ yi là; bo nsi yen tun tse njù, a be nge. A nsi vù, bin bite bam bwe, ndèn yen ngelaṅ nà ndù me b'a Tshùaben.

¹⁵Ndùse me nsi kôgte (botte) yantù àm num kàbngô bo ben tse bo lo' zin nsaṅ i yi là, bo nsi tshob bin ndù: Kàbngô ke' bèn mbe, mba ben tse bo saṅ i là.

¹⁶Tse ghatshob ntshob Nsi Israél tse bo ke ntshob ntshob Nsi num Yérusalém, nke nzi njem num i ndù la' b'a tshaṅ, ndù la' ke' b'a tshaṅ nà, ke' bèn mbe. Tshùaben Nsi bèn ntshobe.

¹⁷Wù mén mèn, te lag so num ngonngon yu nzwit mèn tse bo tshwèt nke ntshob ntshob Nsi mb'a ko' ntù bo là; tshob ntshob Nsi num bo.

¹⁸O nsi tshob ndù: Tshùaben Nsi tshob ndù: Nge' tu bènnzwi tse bo be nkin njoṅ ndaṅmbu fa, nke mba' nzwe nema' tu mèn num njoṅ ntsewut benntùn fa là. Bo be ngù ndùlala ndo' ntù yub yi. Bin kwate ndù be bin lo' ntù yàm nzwit mèn, ndem ko' tsin ntù ké?

¹⁹Bin be ntam mbèt mvèn àm mbaṅ yàm nzwit mèn, num nu bu kena bo mbe' bàn. Bin be nzwi ntù ts'a lo mb'a ke kwù là, ngù ntù ts'a lo mb'a kwù là yôg. Ntshùa ndùlala nke ntatte yàm nzwit mèn z'a be nju' tatte là.

²⁰A ndùlala Tshùaben Nsi tshob ndù: Me lo nsi num nkin tsine. Bin be ntshùa njam bwe ndo' ntù benntùn. Me nsi kwé yub mum mbu mine, me nsi tshu' ntù benntùn tse bin ke ndiag nelo' là.

²¹Me nsi lé' nzwe tse bin ma' tu bin nà. Me nsi tshu' yàm nzwit mèn mum mbu mine, ndù k'a vù ntùm ywi' mum mbu mine. Yen ngelaṅ nà bin nsi lèn ndù me b'a Tshùaben.

²²Bin be ntshùa njam tatte tsin nkag ngùtni (sobni) ntù mèn netsine, ndù tu wul àm ke' kag nywin ntù i. Bin be nso neta mum mbu ngatshùagntù, nelo' ntshètt'é yi ndù k'a kag manze kebwô ngù nse' njôge.

²³Mb'a be ndùlala là, bin ke bèn ne yen njem banban, ke bèn netshob ntshobe; me nsi tshu' yàm nzwit mèn mum mbu mine. Yen ngelaṅ nà bin nsi lèn ndù me b'a Tshùaben.