Read Medumba Ezékia 14 Bible Online

Ezékia 14 - Medumba bible

Ezékia 14

¹Tsemo' ghakwé mbwe netèt ba Israél se' ntèl àm, ntswete nsi mbwe àm.

²Tshùaben tshob me ndù:

³Mèn mèn, tshen ben nà be nket neto tshob ntù bo, nke nte lag num ju z'a ghù bo vù mum mfànnu là. A be me bam ndù bo bèn mbètt'àm nu ké?

⁴A ndùlala tshobte bin à bo, ntshob bo ndù: Tshù mba Tshùaben tshob li: Mba we lo ntùm tunndà Israél z'a ket tse neto ntù i, nte lag se num ju z'a ghù a vù mum mfànnu mi là, - a be z'a bètte ngatshob ntshob Nsi nu là, - mba me Tshùaben nsi yi'te num neto tse ts'a yàm nà fà mbùn ntshob yi.

⁵A nsi tshùa ndùlala me ghom ntù ben tse bo ntùm tunndà Israél, ndù bo tsin ngùanesà mbaṅ àm boa njoṅ neto tshob fa là.

⁶A ndùlala tshob tunndà Israél ndù: Tshù mba Tshùaben Nsi tshob li: Bin bèn nse'e, bin lo njam njoṅ neto tsin fa, bin tsho' lag num njoṅ bagkèt tshu tsin fa!

⁷Mba we lo ntùm tunndà Israél, mba zit ngùn no z'a te ntùm ngô Israél, a be z'a tsin ngùanesà mbaṅ àm, nket neto tse ntù i, nte lag se num ju z'a ghù a vù mum mfànnu là, a be z'a tshùa njam ngatshob ntshob Nsi nke mbètt'àm nu là, mba me Tshùaben nsi bèn bùnte yi kua' yàm tu.

⁸Me nsi lo' mvèn àm tam yen mèn nà yi, lo' i ghù keki yi; a nsi tù' a ju nelo' ntà nkùt yi. Me nsi sô i netèt yàm nzwit mèn, bin lèn yen ngelaṅ nà ndù me b'a Tshùaben.

⁹A be ze yen ngatshob ntshob Nsi là faṅ bo fùt'é, ntshob nu là, mb'a b'a ndù me Tshùaben lo bam ndù bo fùt'é; me nsi bù' bu àm nsi num i, biagt'é netèt yàm nzwit mèn, Israél.

¹⁰Bo nsi ket nge' mfànnu mube: Ngatshob ntshob Nsi mba mèn z'a bètt'é nu là,

¹¹ndùlala ndù kà tunndà Israél bèn ne tsin ngùanesà mbaṅ àm, ke bèn nesagte wul i num njoṅ mfànnu mi fa. Yen ngelaṅ nà bo nsi be yàm nzwit mèn, me be Nsi yub. Tshùaben Nsi bèn ntshobe.

¹²Tshùaben tshob me ndù:

¹³Mén mèn, a be ze ta' ngô ghù nukebwô me, ngù mo' nu z'a ke' tsin num àm, me bù' bu àm nsi num i, ke bèn mfà ze bàn, ntum nziku' yi, mbiagte benntùn boa nyàm mum bwe là,

¹⁴mb'a be ze tshen ben tat li: Noa, Daniel bo Yob tum ntùm yen ngô là njôg ntù yub là, mb'a tshùa a njam yub nunetsine. Tshùaben Nsi bèn ntshob ndùlala.

¹⁵A be ze me ghù be tshùagntù nyàm zinte mum ngô num nebiagte ngô, a be ze ngô mbit tù' be kônkwa, dù' ze be sàm mènntùn ke tshùa bwe num tshen nyàm nà là,

¹⁶mba kua' tshen benntùn tat là be be ntùm bwe là, mba me Tshùaben Nsi ze me be ntùn nà tshob ndù mb'a be bo ke yôg nshumnshum tshob ke ngonngon tshob lo. Mba nda' tu wut yub bèn yôge, ngô tù' kônkwa.

¹⁷Me lo ndo' ṅwi nse' yi ntùm yen ngô li, ntshob ndù: A bwô ndù ṅwi fe mum ngô! A be ze me zwite benntùn boa nyàm,

¹⁸tshen ben tat là be ntùm ngô là, mba me Tshùaben Nsi ze me be ntùn nà tshob ndù mb'a be bo ke yôg nshumnshum tshob ke ngonngon tshob lo. Mba nda' tu wut yub bèn yôge.

¹⁹A be ze me tum keya' mum yen ngô là, a be ze me tshùa njam vùkob nso tshùagntù àm ntùm ngô, ndo' nzwite benntùn boa nyàm yi,

²⁰Noa, Daniel bo Yob be ntùm ngô là, mba me Tshùaben Nsi ze me be ntùn nà tshob ndù mb'a be bo ke yôg nshumnshum tshob ke ngonngon tshob lo. Là, mba bo nsi tshùa njam yub nunetsin yôg ntù tshobe.

²¹Tshùaben tshob ndù: Mba mba me tum nge' kebwô li, num Yérusalém: Ṅwi, kekua, tshùagkèt nyàm bo keya', num nelo' mbiagte benntùn boa nyàm yi là,

²²mba tà ndùlala metshé'é, nshumnshum boa ngonngon nsi le'e, tum (ntshu vù) Yérusalém. Bo nsi se' mbaṅ bin; bin nsi yen nzin mub bo ngùninu mub, a fite ntù zin mum nge' ze me na' ngù a tsho num Yérusalém nà, njoṅ nge' fa tse me na' ma' tu i là.

²³Ṅ, bo nsi fite ntù zin ndùse bin nsi yen nzin mub bo ngùninu mub là. Yen ngelaṅ nà bin nsi lèn ndù me lo ke ghù nge' tsho yen ngô l'a banban. Tshùaben Nsi bèn ntshobe.