Read Medumba Ezékia 16 Bible Online

Ezékia 16 - Medumba bible

Ezékia 16

²Mén mèn, ghù Yérusalém lèn nukebwô tse ts'a bag neshu là!

³O nsi tshob ndù: Tshù ju ze Tshùaben Nsi tshob Yérusalém ni: A tshùa ntùm tunndà z'o tum bwe mba num yu nebwe, o b'a ze Kanaan. Tàan na' mb'a ze Amor, màan be ngon Hétia.

⁴A lo be lé'njù se bo bwe o, o se' ntùm njù là, bo ke keb ntô o, ke sôg o ntùm ntse, ke tshwétt'o, ke se' o ngwa (mbeme), ke kutt'o mum kam nzwe.

⁵Sàm mèn lo ke te lag kondèn num o, nefa' sàm lèn men mfa' là num o. Là bo lo ma' o mà béne, nummbe bo lo wag o mum lé'njù se bo bwe o là.

⁶Me lo ke ntshùa mbaṅ o, njen o, o nke ndab wul o ntùm lem (tsho:) Me tshob wù, ndùs'o be ntùm lem tsho là ndù: Yôge,

⁷nku' mba nenà ts'a fèn nà. O lo ku'u, nzi tà nkum ntùm ngu'njù ngon tsho, mbùn mu bèt, nyiaṅtu tsho ku', njàme. Là, o na' nke' a be tunntôg, mb'a kua' tunntôg.

⁸Me lo ke ntshùa mbaṅ o, njen o ntùm tsho ngu'njù ngùa, ngelaṅ ntù o ke ntam num nkôni là. Ndùlala me lo lo' tôg kummbaṅ sàm nkabt'o yi mb'o be tunntôg là. Me lo wat kàn bag wù, nsaṅlaṅ bwe ndù me nsi be mèn nenùn mbwe o. Ndùlala o tù' yàm ju. A b'a Tshùaben Nsi bèn ntshobe.

⁹Me lo sôg o ntùm ntse, nsôg lem ts'a ṅabt'o là, mbé't'o menya (mfèt).

¹⁰Me lo fà nzwe tse bo vèn nà wù, mfà nketo' mi ngub i botte là wù, mfà kuttu bo kummbaṅ silik wù.

¹¹Me lo kwi o tshukwi, nso nkwa bu o, ma' ntshèn tô o.

¹²Me lo so kwa ntselag o, nso mba'ntoṅ toṅ o, nso mo' kuni kétmbùm tu o.

¹³Bo lo lo' gol bo silba nkwi o yi, ma' nzwe mebwô num o, nzwe silik bo nzwe ze bo vèn nà. Jujù o na' mb'a bàn ngefele, ṅwa'a, bo mfèt. O lo ke mbwô nèn a be mbwe, mbwô tsho kua' mbwô fen.

¹⁴Lén so lo ju'ni netèt ngôngô num yu bwô, nummbe yu bwô lo ya' nka', mbe ndùlal'a num nkuni mi me na' ma' num o là. A b'a Tshùaben Nsi bèn ntshob ndùlala.

¹⁵Là, o lo tù' yab yu njoṅ nu fa a nda' num bwô o; o lo tshùa njam lén so s'a ju'ni là nkale; o lo' kat ṅab mba zit ntshùanze lo yi, ntù' swèn tsho wul o yi.

¹⁶O lo' tsemo' nzwe tsho nkut mbwe' yi mfe dù' ṅaṅa, ndo' nzwe tse ntshù mi be neṅaa là ndam i yi, nke nkat tsho ntùm bwe. Mfuni yen lèn nu là lo ke to' be, mbe ndù lèn i zi ke bèn mbe.

¹⁷O lo' tshu kwiwut gol bo silba tse me na' mfà wù là nabte neto benntùn yi, nke nkat num bwe.

¹⁸O lo' nzwe tsho tse bo vèn nà, nkabte yub yi, mfà mfèt màm bo ju àm ze nelamte tshen neto là.

¹⁹Bàn ze me na' mfà wù, mbab bàn, mfèt bo ṅwa'a, tse me ke nkém o yi là, o fà bo mba labinda ze njwèt mi lamte neshu là. Tshù ju z'a be nsi là, Tshùaben Nsi bèn ntshobe.

²⁰O lo' nshumnshum tsho boa ngonngon tsho ts'o bwe me là, ma' bu' yi bo, bo tù' jujù yube. Ndù o ke' be ywèt kat ké?

²¹O lo se tô nshumnshum tshàm, mfà yube, nton yub mbwôg ndo' ngamte yub yi.

²²Ntùm bagkèt mfa' mu bo kal o, o ke' bèn nkwimte tsho lé'njù ngon, ts'o be tunntôg ntùm bwe, kua' tunntôg, ndù lem tsho ṅab o là.

²³Nge' num wù, nge' num wù ndùs'o nsi miagte mfa' mu mi kebwô là, Tshùaben Nsi bèn ntshobe.

²⁴O kut mba' yôg kebwô, nkut ba mbwe' num njoṅ nsém fa.

²⁵O kut mbwe' mba num zit tôg nze lo, o tam tuswe tu yu bwô, o be mfà wul o num njoṅ ghatshùanze fa, ntshùa ndùlala nkat kà bo la't'o.

²⁶O lo kat bin à ba Egipto, ba ndùla' o tse bo ghù wut neta là, nkat nga' mbu num nelo' ntshùagte ntù àm yi.

²⁷Tshù, me lo bù' bu àm nsi num o, nsébte bag ju ze me yab wù là, nswèn o mum mbu ghakeban tsho, ngonngon Filistia tse tuswe na' nko mba bo num nzin mu là.

²⁸O lo kat bin à ba Asiria, nummb'o lo ke yoṅ njwèle, bin à bo lo kale, o ke' yoṅ njwèt mba tà ndùlala.

²⁹O kat nga' mbu bin à ngô Kanaan, nkat tà nkum ntùm ngô Kaldéa, mba tà ndùlala, o ke' yoṅ njwèle.

³⁰Tshùaben tshob ndù: A ke lèn bot ntù z'o ghù, kà nke ngù njoṅ tshu là fa, tshen tshu là ts'a b'a fa' mà kattù l'à?

³¹Ndùs'o ke nkut mba' kat mu num ntôg nze, ndùs'o ke nabte mbwe' tsho num njoṅ nsém fa là, o lo ke b'a mba kattù z'a be mbètte nkàbfa' là;

³²o na' mb'a mènnzwi màndà, z'a be ndo' ghùn (mfam) ntshùa nelo' à ndu i là.

³³Njoṅ kattù fa be mbètte nkàbfa'; là tu wul o, o fà ba nda' màndà tsho, a ke ndo' à nda' ndo' ntù yub yi, ndùlala ndù o soṅte yub bag bag nso ntùm kal o.

³⁴O ke ngù à be ju ze tsemo' kattù ke' be ghù là, nummbe màndà tsho lo ke be diag o; mb'o ke mfà nkàbfa' ndùs'a lo mbwô ndù o kwé là, o lo ke ngù ju ze tsemo' kattù ke' be ghù là.

³⁵A ndùlala, a bwô ndù wù kattù ju' ntshob Tshùaben!

³⁶Tshù mba Tshùaben Nsi tshob li: Mba tshunkàb tsho sate, bo tèl o tunntôg ntùm kal o bin à màndà tsho boa njoṅ neto fa ts'a bag neshu là, mba num lem bon tsho ts'o fà tshen neto là là,

³⁷tshù, me nsi kùmte njoṅ màndà tsho tse bin à bo ke ngag là, njoṅ benntùn fa ts'o ke nkô yub mba ts'o ke mban yub là. Me nsi kùmte yub njoṅ bag bag fa bo lo nsi num o. Me nsi te o tunntôg mbwe bo, bo nsi tèl o tunntôg.

³⁸Me nsi tsho't'o mba bo be ntsho'te bènnzwi màndà, mba tshen nà tse bo be mfètte lem nà. Me nsi lo' tshùagntù bo lànghe' se' yi num o.

³⁹Me nsi fà o mum mbu mube, bo nsi sate mba' kat mu, sate tsho mbwe'; bo nsi lagte nzwe tsho fa, lo' njoṅ tsho bwôbwô tshukwi wut fa, te o tù nge, faṅ o tunntôg.

⁴⁰Bo nsi kamte bwoṅ benntùn te njam o, bo tamt'o ndoṅ, ndo' bi nsobt'o yi;

⁴¹bo nsi tete mbwôg num mba' mu, tsho't'o mbwe bwoṅ bènnzwi. Tshù mba me nsi biagte so yôg kat là. A nsi tshùa ndùlala o be ke bèn mfà nkàbfa'.

⁴²Yantù àm num o nsi kôgte. Lànghe' sàm ke nsi bèn kamt'a num tu o; ntù àm nsi fite, me ke nsi bèn ya ntù.

⁴³Mb'o be ke bèn nekwimte yu ngelaṅ nshum, ntshùa njam tshen tshu là fa nkamt'àm nà, me nsi ghù nzin mu vù tu o, ndù k'o bèn neyab nge' ntùm ngùninu mu mi a bag ntshùate là. A b'a Tshùaben Nsi bèn ntshob ndùlala.

⁴⁴Tshù, ghatankùt nsi tà yen nkùt li num o tshob ndù: Tshu' fu ngùt.

⁴⁵O b'a ngon màan z'a na' ngwag ndu i boa bon tse là. O b'a ngon mà fèt tsho tse bènnzwi, tse bo na' ngwag du tshob boa bon tshob là. Mà zin na' mb'a ngon Hétia, tà zin be ze Amor.

⁴⁶Ngon màan ze ndùb z'a be num bag bu o ze kwéb là b'a Samaria boa ngonngon tse; ngon màan ze nke' z'a be num bag bu o ze zwim nà b'a Sodom boa ngonngon tse.

⁴⁷O ke' zin a nda' num tshob manze, ke ghù a nda' ngùninu mi a bag ntshùate mba bo là. A lo mb'a ndùlala mba yen nà kag. Là, o lo bèn mbag num tsho manze tà nga' mbu.

⁴⁸Tshùaben Nsi tshob ndù: Me ze me be ntùn nà tshob wù ndù Sodom, ngon màan boa ngonngon tse ke' ghù ju z'o ghù bin à ngonngon tsho là.

⁴⁹Tshù ngùninu ngon màan Sodom ni: A lo ghù ko'te wut, nke njôg ntùm fu', ke ke ntshàm sàm ju boa ngonngon tse. A lo ke be tomte njennge' bo mbwoṅ.

⁵⁰Bo lo tù' ghaka'te, ngù tshu ts'a bag ntshùate là mbwe àm. Me lo biagte yub ndùse lag sàm tam num yen nu là là.

⁵¹Mbe se' mba Samaria là, nukebwô tse ke' be mba nda' kam tsho nukebwô. Ngùninu mu mi a bag ntshùate là yàm ntshùa mi; o lo tshùa njam men ngùninu là nda'te mbe ngon mà tsho ke' fàn tshob nu.

⁵²Wù z'o ke naṅ ntsha tu ngon mà tsho là, fènte tuswe z'a tsho tu o là. O tshùa num tshen nukebwô là, mbag ntshùa yube, ngù bo tù' ben netsin ntshùa o. A bwô ndù tuswe ko o, o bèn mfènte yen tuswe là, nummb'o la'te mbe bo ke' fàn tshob nu.

⁵³Me nsi bèn te yube. Me nsi bèn te Sodom boa ngonngon tse. Me nsi bèn te Samaria boa ngonngon tse, yen nà be tôg me bèn nte o netèt bo,

⁵⁴ndùlala ndù o ket ko' yu tuswe, tuswe ko o num njoṅ tshu fa ts'o ghù là, yen nu là fite ntù yube.

⁵⁵Ngon màan Sodom boa ngonngon tse nsi bèn tet'a be mba bo be mbwembwe là. Ngon màan Samaria nsi bèn tet'a be mba o be mbwembwe là. Wù bin à ngonngon tsho, bin nsi tet'a be mba bin be mbwembwe là.

⁵⁶O lo ke ke ntshob nu num ngon màan Sodom num yu ngelaṅ ko'te wut,

⁵⁷kà bo nzi ntèl o tunntôg, ndùse ngonngon Siria boa tse ngô tse bo lam yub mbum ke ntshabt'o, ngonngon Filistia nke ntut'o là ké?

⁵⁸Tshùaben tshob ndù: O ke nkel à nukebwô tsho boa ngùninu mu mi a bag ntshùate là.

⁵⁹Tshùaben Nsi tshob ndù: Me nsi ghù num o mb'o na' ngù là, nummb'o wag nka'ni, ntum mum kàn s'o wat là.

⁶⁰Là tu wul àm, me nsi kwimte kàn se bag wù wat ngelaṅ nshum nà, me nsi ghù bag wù wat kàn s'a tswe matmat là.

⁶¹O nsi kwimte nzin mu, tuswe ko o num bwe, ndùs'o nsi lo' ngon mà tsho tse ndùbndùb mba tse nke'nke' là; me nsi fà yub wù mba ngonngon tsho là, là ke b'a num kàn se be wat là.

⁶²Me nsi bèn wat kàn bag wù, o lèn ndù me b'a Tshùaben,

⁶³ndùlala ndù o kwimte ju z'a tôg là tuswe ko o, mba ndù k'o bèn nga' ntshu o, tuswe ko o, ndùse me nsi lagte njoṅ mba ke lo z'o ghù là. Tshùaben Nsi bèn ntshobe.