Read Medumba Ezékia 17 Bible Online

Ezékia 17 - Medumba bible

Ezékia 17

¹Tshùaben tshob me ndù:

²Mén mèn, o nsi tshob ntshob ngùme, fà tànkùt tunndà Israél,

³tshob ndù: Tshù mba Tshùaben Nsi tshob li: Mo' mà ghammàtat ndùb, ndù a ghù mbàb mi mi nesà, ndù a nyitte (gha'te) mbàb mi, mfe mi tshù tshaṅtshaṅe (kankane), se' Liban, ntsho' tshaṅ tù sédra.

⁴A fag kaṅ se s'a nèn tù tàtà là, nèn yi mum ngô ntàne, njab i ntùm taṅla' ghatantàne.

⁵A lo' metob tù mum ngô, nte num dù' tsha' ntùn; a te i mbaṅ ntse mi a yàm nà, mbwe i mba tsinkém nà.

⁶Sen metob tù là ku', ntù' ta' tù ndu' ndùb, là ke sag neshu, nkaṅ mi kaṅ nshù bag dù' ghammàtat be là, nga tse be tun bwe; a tù' ta' tù ndu', ngù nkaṅ mi boa mbu ntù bwe.

⁷Mo' ghammàtat ndùb lo bèn mbe, ndù a ghù mbàb mi mi a sag là, mfe mi tam ntsha' i. Tshù, sen tù ndu' là tshag nga tse mbaṅ i, nyitte nkaṅ mi ntshag num i ndù a zwi' i fe num dù' tsha' ze bo bwe i bwe là.

⁸Bo lo bwe i mum nà ntùn, mbaṅ ta'ntse ze ntse yàm bwe là, ndù nkaṅ mi bèle, a yam ntàme, mba ndù a tù' tù ndu' nku'ni.

⁹Tshob ndù: Tshù mba Tshùaben Nsi tshob li: Tù ndu' nsi zin tshùa kum à? Mbwe ghammàtat ke nsi be' nga tse, (tsho' fag) kàb ntàm mi kà njoṅ mfu mi fa mi nswe mi a tob là jum ké? A ke tshwèt mbètte mo' nkum neta ke mo' nzwit mèn yàm no kà tsho' nga tse.

¹⁰Tshù i là bo bwe i là, a nsi zin tshùa kum à? Fetmbaṅ bag ntumnyam ke nsi ghù a jum ké? A nsi jum num dù' tsha' ze bo ywil i bwe là.

¹¹Tshùaben tshob me ndù:

¹²Bètte tunndà ghatatu ndù: Bin ke' lèn mba yen nu là bagte ké? Tshob bo ndù mfen Babilon lo nèn mà Yérusalém, ndo' mfen boa kamkame, boa bo nèn Babilon.

¹³A lo tsho' mo' mèn netèt nzwit fen, ngwat kàn bo yi, ngù a (nu ngu) kàn mfe. A lo lo' ben ndùbndùb nèn yi,

¹⁴ndùlala ndù nufen kab tu i nsi, ke bù' tu i tù, mba ndù a lé' kàn se, mbe mèn nenùn ntùm bwe.

¹⁵Là, yen mén mfen nà lo ta tu mfen Babilon, ntum ntum mà Egipto (nelon) ndù mfen Egipto fà ba nyàmdiaṅ boa bon bandum yàm yi num ntsho. Mèn z'a ghù tshen tshu li là nsi tum bwe à? A nsi tum ntshu ntsha à? A tam kàn s'a wat là ku, a ke nsi tum bwe!

¹⁶Me Tshùaben Nsi tshob nsaṅlaṅ bwe ndù a nsi kwù a netèt ngô Babilon, ngô mfen z'a te i num diaṅkwa, mfen z'a wag i, ntam kàn se ku là.

¹⁷Faraon ke nsi tum bwoṅ soyé boa bwoṅ benntùn num neywimt'é ngelaṅ ntsho, ndùse bo nsi kut ba kàbngô, tswe' ba nsam num nebiagte mà bwoṅ benntùn yàm yi là.

¹⁸A wag ngu, ntam kàn ku; ndù a lo fà bu i; mb'a ghù ndùlala là, a ke nsi tum bwe.

¹⁹A ndùlala Tshùaben Nsi tshob ndù: Me b'a ntùn! A ngu z'a nu num lén sàm nà z'a wag là. A kàn sàm nà s'a tam ku là. Me nsi ghù njoṅ i fa vù tu i.

²⁰Me nsi bùn i nkù, a nsi vù mum fot sàm. Me lo' i nèn yi Babilon. Me nsi tsho't'é bwe mb'a be ngamfùm num miag màm nà.

²¹Njoṅ benntùn fa tse bo nsi tum netèt soyé tse kù là nsi vù num ntshùag ṅwi, me sate tse bo tù' num njoṅ bag njù fa. Yen ngelaṅ na bin nsi lèn ndù me Tshùaben lo tshobe.

²²Tshù mba Tshùaben Nsi tshob li: Tu wul àm, me nsi tsho' ju num tshaṅ sédra ndùb. Me nsi tsho' mo' metob kaṅ se num ntshùa nkaṅ mi, ywil i kua' yàm tu wut num mo' mbat z'a sage, ṅate là.

²³Me nsi ywil i num mo' mbat Israél z'a sag là; a nsi bèt nkaṅe, yam ntàme. A nsi tù' sédra s'a (gham) zi neshu là. Njoṅ nzenze nsaṅ fa nsi fite bam bwe, njoṅ nsaṅ fa mi a ghù mbàb là nsi fite bam netshaṅ nkaṅ mi.

²⁴Njoṅ ntù fèn fa nsi lèn ndù me Tshùaben lo biagte tù s'a ke nka'te là, mbù'te tù s'a ke mben tu i nsi là, mba ndù me lo ghù tù fi jum, ngù tù njum tob. Me Tshùaben, me lo tshobe, me nsi ghù ndùlala.