Read Medumba Ezékia 18 Bible Online

Ezékia 18 - Medumba bible

Ezékia 18

¹Tshùaben tshob me ndù:

²Numke bin nke ntshob yen tànkùt li ntùm ngô Israél ndù: Ben ghua tshwèt mfèt netswe, mbam mag nke nta à? (Ke ndù: Ba tà lo fèt netswe, mbam bon nke nta à?)

³Bin ke nsi bèn tshob yen tànkùt là mum ngô Israél. A b'a me Tshùaben Nsi z'a be ntùn nà bèn ntshobe;

⁴zwiag mén mba zwiag tà, njoṅ i fa b'a mum mbu màm. Mèn z'a fàn nu là bèn kwù.

⁵Mèn z'a be mèn netsine, nke ngù nu ndaṅndaṅ bo nunetsine,

⁶ke be fèt nkun mbwe', ke be ghamte nkatu mum ngô Israél, ke be nyiaṅte njam nku nzwi nshun i, ke be lo' mènnzwi ngelaṅ a tshwèt njen ṅwù là.

⁷Mèn netsin ke' be fétte sàm mèn, nke mba' ju ze bo tshwèt nkwé yi là ntùm kondèn, ke be yi. A num mfà jujù mèn z'a ke' ghù là, nke mfà nzwe mèn z'a bwoṅ yi là.

⁸A ke' b'a ngakubte, ke be fo nkwé bin, ke be ba' kam njam ntshù'.

⁹A ke nzin a mb'a be ntùm ntshù' màm nà, nke nze ntag màm mba me kô là. Yen mèn nà b'a kua' mèn netsine, mbe mèn nenùne, a nsi yôge, Tshùaben Nsi bèn ntshob ndùlala.

¹⁰Là mèn netsin ze mén i be ngafètte lem, mbèn nke mfàn nu netèt tshen ni,

¹¹tse tàab ke' fàn sàm ta' i netèt bwe, nke mfèt nkun mbwe', nke ngù màndà bo nzwi nshun i,

¹²nke mfétte mbwoṅ bo ngayennge', nke njé, ke be ba' ju tshwèt, nke ngamte nkatu, nke ngù tshùaya'nu,

¹³mbe ngakubte, nke mfo nkwé bin. Lèn yen mén nà ke nsi yôge, num tshen tshùaya'nu ts'a ghù là. A nsi kwù, lem tse nèn a be tu i.

¹⁴Là, a be ze yen mèn ni ghù mén, mén nke njen njoṅ nukebwô fa ts'a be ngù, ke fi't'é,

¹⁵ke be fèt nkun mbwe', ke be ghamte nkatu, ke be ghù màndà bo nzwi nshun i,

¹⁶ke be fétte sàm mèn, ke be yab tshwèt, ke be yi, nke mfà jujù mèn z'a ke' ghù là, nke mfà nzwe mèn z'a bwoṅ yi là,

¹⁷ke be ba' kam njam ntshù', ke be ngakubte, ke be fo nkwé bin. A ke nzin à mb'a be ntùm ntshù' màm nà, nke nze ntag màm mba me kô là. Yen mén ni ke nsi kwù num nukebwô tàab. A nsi yôge.

¹⁸Mba tàab be ngafétte, mbe ntshô, ke be ghù nu ntùn ntùm ngô là, be kua' yi tàab bèn kwù num ko' tse nukebwô.

¹⁹Bin be mbètte ndù: Ke z'a ghù mén ke be ket ghum i num nukebwô tàab à? Nummbe mén zin num nze ndaṅndaṅ, ngù nunetsine, nzi'te ntshù' màm mbèn nke nze. Ndùlala, a nsi yôge.

²⁰Mèn ghù nukebwô, mba ng'é bèn kwù. Mén ke nsi ket ghum i num nukebwô tàab, tà ke ket ghum i num nukebwô mén i. Nunetsin nsi tô mèn netsine, nukebwô tô mèn kebwô.

²¹A be ze mèn kebwô ghua' nukebwô, nzi'te ntshù' màm, nke nze, nke ngù nunetsin bo nu ndaṅndaṅ nà, mb'a ke nsi kwù, mb'a nsi yôge.

²²Nsi a' lagte njoṅ mfànnu mi fa. A nsi tshùa njam nunetsin z'a be ngù là yôge.

²³Me ke ndiag a ndù mèn kebwô kwù a nekwù ké, ke me ke ndiag a ndù a bate ngùninu mi njôg à? Tshùaben Nsi bèn mbètte ndùlala.

²⁴Mèn netsin ghù neyôg ndùs'a ghua' nunetsine, ngù nukebwô, mfi'te tshùaya'nu tse mèn kebwô ghù là ké? A nsi tshùa njam mfànnu mi bo nukebwô ts'a ghù là kwù. Nummbe bo ke nsi bèn kwimte sàm numebwô z'a na' ngù là.

²⁵Bin be mbèn ntshob ndù: Ze manze Tshùaben ke' be ndaṅndaṅ. Tunndà Israél, a yàm manze bèn mbe ke be ndaṅndaṅ ké? A ke' b'a tsin manze bèn mbe ke be ndaṅndaṅ ké?

²⁶A be ze mèn netsin ghua' nunetsine, ngù nukebwô, nkwù num nukebwô z'a ghù là, mb'a kwù a num nukebwô z'a ghù là.

²⁷A be ze mèn kebwô ghua' tshùagntù, ngù nu ndaṅndaṅ bo nunetsin, mb'a nsi ghù ntù i yôge.

²⁸A be z'a gha' miag mi, ndo' mvèn i ntam mfànnu mi yi là, mb'a ke nsi kwù, mb'a nsi yôge.

²⁹Tunndà Israél be ntshob ndù: Ze manze Tshùaben ke' be ndaṅndaṅ. A yàm manze bèn mbe ke be ndaṅndaṅ ké tunndà Israél? A ke' b'a tsin manze bèn mbe ke be ndaṅndaṅ ké?

³⁰Tshùaben Nsi tshob ndù: Tunndà Israél, me nsi tshùa njam tse manze mba we lo kà tsho't'é. A ndùlala, bin bèn njam, bin lo' mvèn zin ntam mfànnu min yi, ndùlala ndù kà nukebwô zin ghù me biagte zine.

³¹Bin ghua' njoṅ mfànnu min fa tse bin tshùa njam bwe ngù nukebwô là. Bin ghù ntù nswe bo ywèt nswe. Tunndà Israél, numke bin kô nekwù à?

³²Ndùlala Tshùaben Nsi tshob ndù: Bin kaṅ ntù tsin njôge, nummbe me ke' be ṅwate num vù mèn z'a tshwèt nkwù là.