Read Medumba Ezékia 19 Bible Online

Ezékia 19 - Medumba bible

Ezékia 19

¹Mén mèn, tshag nz'o tù njob nsivù num fenfen Israél,

²Ntshob ndù: Màan na' mb'a ke? A na' mb'a nzwi ngwayit netèt ba ngwayit. A lo ke nô nsi netèt bon ngwayit, nke nkém tse bon.

³A lo kwiagte mo' mén i, a tù' metshab ngwayit, nzi'te neke ngom ze mbàb, nke ngom mba benntùn.

⁴Ntumntum ju' tshô i, ndo nsi num i, a vù ntùm tàm sob yoṅ ntshù'. Bo ma' mvèt tô, ndo' i nèn yi mum ngô Egipto.

⁵Ngelaṅ nzwi ngwayit béb i ke yen nà, nu tshùa i. A bèn ndo' mo' mén i, nkwiagt'é, a tù' metshab ngwayit.

⁶Yen metshab ngwayit li nke njôg shun boa ngwayit, ntù' ngwayit ndùb, nzi'te neke ngom ze mbàb, nke ngom mba benntùn.

⁷A sate ntshwèt tshobe, nsate ngô tshobe. La' tù' fam ndùse bo ju' tshu't'é là.

⁸Ntumntum tamte ma' i ntsho boa ngô tse bo diaṅ i mbum nà;

⁹bo bùn i nkù, ngom i, ma' mvèt tô i, nso bu' ntshu i, ndo' i nèn yi mbaṅ mfen mà Babilon. Bo tsho bwe ma' i ndàtsha ndù kà bo bèn nju' nz'é num mbat Israél.

¹⁰Màan na' mb'a mba tù ndu' se bo bwe mbaṅ ntse là. A lo ghame, nte'e, nummbe ntse lo yàm dù' i.

¹¹Nkaṅ mi lo ta mb'a be bo lo' nabte nkôg fenfen yi là. Tshaṅ i lo sag ntôg nkaṅ mi nèn tù, ntshùa ndùlala miag benntùn yàm nke nte num i, mba num nkaṅ mi mi a yàm nà.

¹²Là, mo' neta fetmbaṅ tshùa ntsho' i ma' nsi, nyam tum bwe, ntàm mi jum. Neta nkaṅ mi be'te, njume, mbwôg kù njoṅ i fa.

¹³Ndonni bo bwe sen tù ndu' là kônkwa, num tsha' njum, tsha' ts'a ghag là.

¹⁴Mbwôg tum mum nkaṅ mi, nkù ntàm mi. A ke' bèn ngù kaṅ se s'a ta num nekom kôg mfen yi là. Yen ni b'a nsivù ze bo lo' yob nsivù yi là.