Read Medumba Ezékia 20 Bible Online

Ezékia 20 - Medumba bible

Ezékia 20

¹Ntùm ngu'njù sammbàa, mum lé'njù gham mum ṅwù tàn, tsemo' ghakwé mbwe netèt ba Israél se' nebètte Tshùaben nu, ntswe nsi mbwe àm, me Ezékia.

²Ndùlala Tshùaben tshob me ndù:

³Mén mèn, tshob ghakwé mbwe netèt ba Israél ndù me Tshùaben Nsi tshob bo ndù: Ndù bin se' bètt'àm à nu ké? Tshùaben Nsi z'a tswe ntùn nà tshob ndù: Me ke nsi bam bin bètt'àm nu.

⁴Mén mèn, b'o ke tsho'te yub ké, b'o ke tsho'te yub ké? Ghù bo lèn mfànnu tà tshobe.

⁵O a' tshob bo ndù me Tshùaben Nsi tshob ndù: Me lo sobve num nzwit Yakob lé'njù se me na' ntsho Israél là, ngù bo lèn àm mà ntùm ngô Egipto. Me lo sobve num bo, ntshob ndù: Me b'a Tshùaben Nsi zin.

⁶Me lo sobve num bo sen lé'njù là ntshob ndù me nsi ghù bo tum mum ngô Egipto nèn mum ngô ze me tsho' bo là. Yen ngô là bwô ntshùate, ṅwa' bo mbùn num nké ntùm bwe.

⁷Me tshob bo ndù: Mba we lo netèt bin ghua' tshùaya'nu tse miag min be nte num bwe là, ke bèn nke nsagte wut tsin num neto ts'a Egipto là! Nummbe me b'a Tshùaben Nsi zin.

⁸Mba ndùlala bo ta tu me, ke ju' ntshu àm. Sàm mèn netèt bo ke ghua' tshùaya'nu tse miag mi be nte num bwe là, ke ghua' neto ts'a Egipto là. Ndùlala me kwate nelo' tshùagntù àm bo yantù àm ndo yi nsi num bo mum ngô Egipto.

⁹Mba tà ndùlala, me lo tshùa njam lén sàm mbom ndàm mube, ndù kà bo lo' yub mba ju banban nà netèt ntumntum tse bo be ntùm bwe là. Nummbe me lo sô yub mum ngô Egipto num miag tshen ntumntum nà.

¹⁰Tshù, me lo sô yub mum ngô Egipto, ndo' yub nèn yi kônkwa.

¹¹Me lo fà nkàn màm bo, nda'te ntshù' màm mi a bwô bo ke nze, kà njôg là.

¹²Me nsi fà mba Sabbat bo, a be keki netèl àm bag à bo, ndù bo ke ndèn ndù me b'a Tshùaben z'a be ndànte yub là.

¹³Là tunndà Israél lo ta tu me num kônkwa. Bo lo ke ze ntshù' màm, nga neze ntag màm, mi a bwô ndù mènntùn ke nze kà njôg là. Nke ndo' Sabbat mba kua' ju banban nà. Me lo ghù nkwate nelo' tshùagntù àm ndo yi nsi num kônkwa, mbiagte yube.

¹⁴Mba tà ndùlala, me lo tshùa njam lén sàm mbom ndàm mube, ndù kà bo lo' yub mba ju banban nà num miag ngô tse me na' nsô yub Egipto mbwe bo là.

¹⁵Me sobve num bo kônkwa ndù me ke nsi tshagte yub tà kum ntùm ngô ze me bù bo là, ngô ze mbùn bo ṅwa' be nké bwe là. Yen ngô là bwô ntshùate.

¹⁶Me na' ngù ndùlal'a nummbe bo lo ghua' ntshù' màm, ke ze nkàn màm, mba ndù bo lo lo' Sabbat mba ju banban nà, ke lé' ntù yub num ba neto.

¹⁷Là me lo ghù ntù kondèn num bo, ke sate yube, ke biagte yub num kônkwa.

¹⁸Me tshob bon tshob num kônkwa ndù: Kà bin bwe ntag tà tsin, ke ze nkàn mube, ke bèn nke nsagte wut tsin num ba neto tshobe!

¹⁹Me b'a Tshùaben Nsi zin. Bin ze ntshù' màm, nze nkàn màm. Bin tamte njoṅ i fa nze.

²⁰Bin lo' Sabbat mba ju nelàn nà, ndù a tù' keki netèt be, ze bo ghù ntshùa bwe ndèn ndù me b'a Tshùaben Nsi zin nà.

²¹Là, bon ta tu me, ke ze ntshù' màm, ke ze nkàn màm, ke tshùb nkàn màm mi a bwô ndù benntùn ke nze kà njôg là. Nke ndo' Sabbat mba kua' ju banban nà. Ndùlala me kwate nelo' tshùagntù àm bo yantù àm ndo yi nsi num bo num kônkwa.

²²Mba tà ndùlala, me lo tshùa njam lén sàm mbom ndàm mube, ndù kà bo lo' yub mba ju banban nà num miag ngô tse me na' nsô yub Egipto mbwe bo là.

²³Me lo sobve ndù me nsi sate yub netèt ngôngô, ntshag yub mum ngô nzenze,

²⁴nummbe bo ke' ze ntshù' màm, ngua' nkàn màm, ndo' Sabbat mba ju banban nà, nke nte lag num neto tà tshobe.

²⁵Me lo bèn mfà mba ntshù' mi a be mi kebwô là bo, mfà nkàn mi b'a ke yôg yub là bo.

²⁶Me lo tshùa njam tshule'te tshob nsagte yub ngelaṅ bo ke nton tuswe tshob mum mbwôg là. Me lo kô neso ntsha tu bo ndù bo lèn ndù me b'a Tshùaben.

²⁷Mén mèn, a ndùlala tshob tunndà Israél ndù: Tshù mba Tshùaben Nsi tshob li: Tà tsin lo bèn ntut'àm, nta tu mbwe àm.

²⁸Me lo lo' yub nèn yi mum ngô ze me na' nsaṅlaṅ nefà bo là. Ndùlala bo tsho bwe nte lag sob num nkônga nebù'te bo ntù mi a te' là, mfà tshule'te bo, ma' bu' bo. Bo lo ton bon tshu nelamte bwe, ma' ndu' bwe.

²⁹Me lo tshob bo ndù: Mbwe' ze bin num nèn bwe là ywimt'a ke? Tà nse' nkum ndonni Israél be nke' ntsiaṅ yen dù' là mbwe'.

³⁰Ndùlala, tshob tunndà Israél ndù: Tshù mba Tshùaben Nsi tshob li: A nenùn ndù bin tshwèt nsagte wut tsine, nke ngù mba tà tsin nà, nke mfa' neto tshobe,

³¹bin lo fà tshule'te, nton bon tsin mum mbwôge, nsagte wut tsin njam neto tsin tà nse' nkum sènni. Tu wul àm nsi bam ndù bin bètt'àm nu ké? Tunndà Israél? Nga, me ke nsi bam bin bètt'àm nu! Tshùaben Nsi z'a tswe ntùn nà bèn ntshobe.

³²Bin be ntshob ndù: Bag nsi be mba ngôngô là, be mba nzwit tsemo' ntumntum nà, ke ghamte tù bo loṅ. Be yen njem nà ke zi mbumte.

³³Tshùaben Nsi z'a tswe ntùn nà saṅlaṅ bwe ntshob ndù: Me nsi tshùa njam tshùagntù àm lo' neta tô zin yi.

³⁴Me nsi tshùa njam tshùagntù àm lo' neta kùmte zin yi netèt ngôngô tse bin sate mum bwe là sô zine.

³⁵Me nsi lo' zin nèn yi kônkwa tsho'te zin bwe se se.

³⁶Tshùaben tshob ndù: Me nsi tsho'te zin ndaṅndaṅ mba me na' ntsho'te tà tsin num kônkwa Egipto là.

³⁷Me nsi ghù bin be tôg ntshufe', me ke nsiaṅ zine.

³⁸Me nsi sô ghatatu netèt bin, tshen nà tse bo ke' be ju' ntshu àm nà. Me nsi sôte yub ntùm dù' ze bo be ghùn bwe là, là bo ke nsi tsho mum ngô Israél. A nsi tshùa ndùlala bin lèn mbe me b'a Tshùaben.

³⁹Wù tunndà Israél, Tshùaben Nsi tshob wù ndù: Mba we lo nèn ngamte tse neto, là me saṅlaṅ bwe ntshob bin ndù bin nsi be miagte ju' ntshu àm. Bin ke nsi tshùa njam tshule'te boa neto tsin lo' lén sàm se nelàn mba ju banban nà.

⁴⁰Tshùaben Nsi tshob ndù: Njoṅ tunndà Israél fa z'a be ntùm ngô là nsi tamte ghamt'àm num mbal àm ze nelàne, num nesà mbat Israél. A bwe là ze me nsi lo' zin mebwô là; a bwe là ze me nsi bèn kwé tsin tshule'te, kwé tsin mbwe tshu boa njoṅ tsin nda' fafa là.

⁴¹Ngelaṅ me nsi sôte zin ntùm ngô tse bin na' nsate bwe là, mba bin nsi ghù lén sàm be nelàn num miag ngôngô. Yen ngelaṅ nà me nsi lo' zin mba jule'te ze nelamte là.

⁴²Yen ngelaṅ nà bin nsi lèn ndù me b'a Tshùaben ndùse me nsi lo' zin bèn yi num tsha' Israél, ngô ze me na' nsaṅlaṅ bwe nefà tà tsin nà.

⁴³A bwe là ze bin nsi kwimte mat zin boa njoṅ mfa' min mi kebwô, mi bin na' nsagte wut tsin mum bwe là. Yen nu là nsi toṅ zin num njoṅ nukebwô fa tse bin ghù là.

⁴⁴Bin nsi lèn ndù me b'a Tshùaben ndùse me nsi tshùa njam lén sàm bom ndàm mine, ke ghù a ndaṅndaṅ mba mat zin ze kebwô boa ngùninu min mi nebag be yi là, me tunndà Israél. Tshùaben Nsi bèn ntshob ndùlala.