Read Medumba Ezékia 22 Bible Online

Ezékia 22 - Medumba bible

Ezékia 22

¹Tshùaben tshob me ndù:

²Wù mén mèn, o nsi tsho'te yen ngô li z'a be mfètte lem nà ké? O nsi tsho't'é ké? Ghù ndù a lèn njoṅ tshùagntù fa ts'a be ngù là!

³Tshob yi ndù: Tshù mba Tshùaben Nsi tshob li: O b'a ngô z'a be mfètte lem netèl o, nelo' nsoṅte so lé'njù nge' ndù a se' là. O bèn ntete ba neto netèl o neke nsagte wul o yi.

⁴O tshùa njam lem ts'o fètte là ntù' ngavù ntsha, ntshùa njam neto ts'o kom nà nsagte wul o. O tshùa ndùlala ngù lé'njù nge' tsho se' ndende, o bèn ṅwag mum tsho miagte ngu'njù ndende. Ndùlala me ghù o tù' nu tuswe bo tshabte mbwe njoṅ ngôngô fa.

⁵Ben tse bo be nesà mba tse bo ghebte là nsi tshabt'o, wù ngô nesagte, ze ntùm la' so ke' tswe fite là.

⁶Kamkam Israél tse bo be netèl o là ke ndo' a neta yub nke mfètte lem yi.

⁷Bo be ngwag mà bo tà netèl o, nke ngùtni ngùn, nke ma'ni ménntse bo mfôg mènnzwi.

⁸O be ngwag dù' tshàm tse nelàne, nke ndo' Sabbat tshàm mba ju banban nà.

⁹Benntùn num netèl o ndù bo be nso ntshu nsi num nefètte lem. Bo be ma' nkun mbwe' netèl o, nke ngù nukebwô netèl o.

¹⁰Mén be njen tàab tunntôg netèl o, nke ndo' mènnzwi z'a tshwèt njen ṅwù là tùntùn.

¹¹Mba we lo netèl o be nyiaṅte njam nku nzwi nshun i, mba we lo nke ndo' nzwi mén i, mba we lo nke ndo' ngon tàab.

¹²Bo be nkwé nda' netèl o num nefètte lem. O be mbètte bin, nke ndiag kubte, nke ndo' neta ndagte tshu mfèl o yi, nke ndag tu wul àm. Tshùaben Nsi bèn ntshobe.

¹³Tshù, me tam bu àm num o mb'o be fimntshu là, ntam bu àm num o num lem ts'o tshwèt mfètte netèl o là.

¹⁴O nsi ghù tànntù, mbu mu nsi ta mum lé'njù se me nsi lo nsi num o là ké? Me Tshùaben m'a tshobe, me nsi ghù ndùlala.

¹⁵Me nsi sat'o netèt ngôngô, sat'o netèt ntumntum nzenze. Me nsi biagte nukebwô ts'a be netèl o là.

¹⁶O nsi sagte wul o be kua' yu tu num miag ngôngô, o nsi lèn ndù me b'a Tshùaben.

¹⁷Tshùaben tshob ndù:

¹⁸Mén mèn, tunndà Israél be m'a mba tùn s'a sagte là: A b'a mba tùn meba, tùn nefùage, tùne, tùn fôgtab là ntùm kab ze bo tshwèt ndette tùn bo na k'a tù' ntsentse ntùm bwe là. Bo b'a tùn s'a sagte là.

¹⁹A ndùlala Tshùaben Nsi tshob ndù: Mba bin b'a tùn s'a sagte là, me nsi tse'te zin netèt Yérusalém.

²⁰Ndaṅndaṅ mba bo be ntse'te silba, tùn meba, tùne, tùn fôgtab bo tùn nefùag ntùm kab, nkwé'te mbwôg tun bwe ndù a yag là, be ndaṅndaṅ me nsi tse'te zin mum yantù àm bo tshùagntù àm, naṅ zin ntùm kab ghù bin yage.

²¹Me nsi tse'te zin fùag mbwôg tshùagntù àm num bin, bin yag netèt Yérusalém.

²²Ndaṅndaṅ mba bo be nton tùn silba a yag ntùm kab ze bo ton i bwe là, be ndaṅndaṅ bin nsi yag netèt Yérusalém. Bin nsi lèn ndù me Tshùaben lo sa tshùagntù àm num bin.

²³Tshùaben tshob me ndù:

²⁴Mén mèn, tshob Yérusalém ndù a b'a tsha' ts'a ke' làn, tse mbaṅ ke' zwi' i mum lé'njù yantù là.

²⁵Tse ghatshob ntshob Nsi tshwèt ntsin tsham netèl i; bo b'a mba ngwayit z'a tshwèt ntshu'u, nke nsé'te nyàm z'a ghome, nke ngom benntùn nà. Bo be ndo' tshunkàb tùntùn boa tshu ntùn. Bo be ngù fôg bènnzwi nke njàm à be neyàm netèt Yérusalém.

²⁶Tsho ghale'te be mbagte ntshù' àm, nke ndo' yàm mbwe' mba ju banban nà. Bo ke' ghù fagte netèt ju nelàn bo ju banban. Bo ke' bèn nete lag num Sabbat tshàm, newag àm bèn ntaṅ nga netèt bo.

²⁷Fenfen tshob b'a mba ba mbù tshwèt tse bo tshwèt nsé'te nyàm bo ghom nà. Bo be mfètte lem, nke mbiagte benntùn, num nelo' tshu tshobe.

²⁸Ghatshob ntshob Nsi tshob be ndo' tsha' ntam nu tshob yi, nke nzi ba njem banban, nke ntshob ntshob tatte, ntshob ndù: Tshùaben tshob ndù, ke be ndù Tshùaben tshob sàm nu bo.

²⁹Ba ntùm ngô te njam nefètte lem, nke nj'é, nke ngùtni njennge' bo mbwoṅ, nke ma'ni ngùn ke kwimte ntshù'; bo ke ngù ndùlal'a ke ntun mi.

³⁰Me diag ta' mènntùn netèt bin z'a b'a kut kàbngô, ntsin mbwe ngô ntshètt'é ndù kà me biagte ngô là. Nda' ndù mènntùn ke' tum.

³¹Ndùlala me nsi naṅ tshùagntù àm num bo, me nsi lo' mbwôg yantù àm kù yub yi. Me nsi ghù ngùninu mub tsho tu bo. Tshùaben Nsi bèn ntshobe.