Read Medumba Ezékia 23 Bible Online

Ezékia 23 - Medumba bible

Ezékia 23

²Mén mèn, tsemo' bènnzwi lo be bwe bàa, mbe ngonngon ta' mènnzwi ntshù'.

³Bo lo kat mà Egipto fe mum lé'njù ngon tshobe. A bwe là ze bo kwag bu ndàntù bo, nyu'te mbùn mub mi a ke' mbùn ngon, ndù mèn ke' yoṅ nkwag là.

⁴Tshù ndèn mub li: Ohola b'a ntshùambwe, Oholiba be ngon màab. Bo na' mb'a ben tshàm, bo bwe nshumnshum boa ngonngon. Ndèn mub bagt'a ndù: Ohola b'a Samaria, Oholiba be Yérusalém.

⁵Tshù, Ohola kat ndùs'a na' mbe yàm mèn nà; ntù i tam num màndà tse, ba Asiria tse bo be ba ndùla' là.

⁶Bo lo ke nket nzwe ndob, mbe ngomna boa fenfen, nke' a bonnshum tse bo tshwèt ndo' ntù mèn nà, mbe kua' kum ghako' nyàmdiaṅe.

⁷Ohola kat boa bo, boa njoṅ tshen kamkam Asiria là fa. A lo sagte wul i boa njoṅ tshen ben nà fa tse bo lo' ntù i là. A lo sagte wul i boa njoṅ neto tshob fa.

⁸A lo gha nekag kat ts'a to'te mà Egipto là nsi. Nummbe bo lo lo' i fe ndùs'a ke' ngon nà, nyu'te mbùn mi mi a ke' mbùn ngon, ndù mèn ke' yoṅ nkwag là. Bo lo so kat yub num i.

⁹A ndùlala ze me ghua' i mum mbu màndà tse, mum mbu bon Asiria tse ntù i ke ntam num bo là.

¹⁰Bo lo te i tù tunntôg, ndo' nshumnshum tse boa ngonngon tse. Bo lo ghù tu wul i kwù num ntshùag ṅwi. Lén se lo ju'ni netèt bènnzwi ndùse bo tsho't'é là.

¹¹Ngon màab Oholiba yen yen nu là, là mbèn ntshàm ntù num kat, kà ze nekat tù' ywi' ntshùa ze ngon màab.

¹²Ntù i tam num bon Asiria; bo mba ba ngomna boa fenfen, mbe ba ndùla' bo, ndù bo ket nzwe mebwô; bo ba ghako' nyàmdiaṅe, ndù njoṅ yub fa b'a nshumnshum, nke ndo' ntù mèn.

¹³Me yen ndù a lo sagte wul i, njen ndù yi ke ngon màab lo zin a num ta' manze ntshù'.

¹⁴A bèn nèn mbwe mum kat ntshùate. A yen netshaṅ benntùn tse bo lo' mbaṅ kàbngô là, boa netshaṅ ba Kaldéa tse bo lo' mbem meba ndo' yi là.

¹⁵Tshen netshaṅ nà lo ghù kob zwe' bo, ndù bo lam tu yub nzwe z'a ghù ntshù mi nzenze là. Njoṅ yub fa lo ghù mfuni fenfen, ngù ntshù ba Babilon tse bo be ko' bon Kaldéa là.

¹⁶A yoṅ mbe yen yub ntù i a tam, a tum ba ntum mà Kaldéa.

¹⁷Ba Babilon nèn mbaṅ i, boa bo nô num kun màndà, bo lo' kat yub nsagt'é yi. Ndùse bo yoṅ nsagt'é là, a yoṅ (nkag yub nsi) ntsho' ntù num bo.

¹⁸A taṅ kal i ntàne, nte wul i tù tunntôg; ntù àm tsho' num i, mb'a na' ntsho' num ngon màab là.

¹⁹A ke ndo' ze kat nèn yi a be mbwe, nke nkwimt'a be lé'njù ngon tse, ngelaṅ z'a na' nke nkat mà Egipto là.

²⁰A lo ke ntshàm ntù num ba Kaldéa tse ngù' yub b'a mba ze nyàm z'a bèt sôg, nke mbwe ba fot là.

²¹O kwimte nukebwô ts'o na' ngù ntùm tsho lé'njù ngon nà. Ba Egipto lo ke nyu'te mbùn mu mi a ke' mbùn ngon nà ndùse.

²²Oholiba, a ndùlala Tshùaben tshob ndù: Me nsi shu'te màndà tsho bo lo nsi num o, nummb'o tsho' ntù o num bo. Me nsi kùmte yub njoṅ dù' fa shu'te yub bo lo nsi num o.

²³Ba Babilon boa njoṅ ba Kaldéa fa, ba Pekod, ba Shoa boa ba Koa, boa njoṅ nguanmèn fa Asiria, ndù bo bwô; njoṅ yub fa ba ngomna, mbe fenfen, mbe kuni ghako' nyàmdiaṅe.

²⁴Njoṅ yub fa lo nsi num o, nke nse' boa tshuntshùag, nkalige, nkalig mi a ghù nku mi là, mba mo' bwoṅ nzwit mèn. Bo ghù tshètntsho tse ndùb boa tse nke'e, boa ntshe' ntsho. Bo tshwèt nke mfe nzenze nse' num o. Me fà tsho'te ntsha bu bo. Bo nsi yi't'a num yub ntshù' kà tsho't'o.

²⁵Me so yantù àm num o. Bo nsi lo' a tshùagntù yab nge' yi num o. Bo nsi keb ntselag o, kebte ntoṅ mu. Ju z'a nsi tù' num o là nsi vù num ntshùag ṅwi. Bo nsi lo' bon tsho tse bandum boa tse bènnzwi, ju z'a tù' num o là mbwôg kù i.

²⁶Bo nsi lagte nzwe tsho fa ts'o ghù là; bo nsi lo' njoṅ tsho tshu kwiwut fa.

²⁷Me nsi ghù o tsin bin nukebwô tsho, boa kat z'o to'te fe mà Egipto là. O ke nsi bèn te lag so num bwe, ke bèn nekwimte Egipto.

²⁸Nummbe Tshùaben tshob ndù: Me swèn o mum mbu ghakeban tsho, nswèn o mum mbu ben ts'o tsho' ntù num bo là.

²⁹Bo nsi lo' ntù nkembàn ma'ni o yi, sô njoṅ tshunkàb tsho fa. Bo nsi te o tù tunntôg, o tù' kua' tunntôg. Tuswe nsi ko o num mfa' mu mi kebwô, nu nefètte lem bo kat.

³⁰Tshen tshu là nsi se' num o, nummb'o lo ke nkat njam ngôngô, nummb'o lo sagte wul o num neto tshobe.

³¹O lo zin num manze ngon màan; me nsi fà ze nge' mum bu o.

³²Tshù mba Tshùaben Nsi tshob li: O nsi yen nge' ngon màan. O nsi yen i fafa k'a mi. A nsi lo' o ghù ju komzwi bo ju tshabte yi. Ju a tum ntùm yen nge' là là yàm neshu.

³³O nsi bum nge', ya dun num o. A b'a nge' ngùtni bo nge' nesate dù', nge' ngon màan Samaria.

³⁴O nsi yen i kà miagte, o nsi kwimt'é; o nsi tshôg nge' nsô mu, a to bam so. Nummbe me Tshùaben Nsi bèn ntshobe.

³⁵A ndùlala Tshùaben Nsi tshob ndù: Mb'o tshag àm njam, ntam àm mvèn o là, mba wù yu nsi ket nge' nukebwô tsho bo kal o.

³⁶Tshùaben tshob me ndù: Mén mèn, o ke nsi tsho'te Ohola bo Oholiba ké? Soṅ yub njoṅ tshùaya' mfa' mub fa.

³⁷Bo lo ghù màndà, mbu mub dun lem, bo lo ghù màndà boa neto tshobe. Mbe se' mba bon tse bo bwe me là, bo lo ma' yub ntùm mbwôge, ndù bo kù ntùm mbwôge.

³⁸Tshù ju ze bo bèn ngù me li: Bo sagte mbwe' àm (dù' àm ze nelàne) num sen lé'njù li, ndo' Sabbat tshàm mba ju banban nà.

³⁹Bo lo se tô bon tshob num neghamte neto tshob yi. Bo lo nèn ntùm mbwe' (dù' àm ze nelàn) àm be sen lé'njù là, num nelo' i mba ju banban nà. Tshù ju ze bo ghù ntùm ndà àm nà.

⁴⁰Bo lo tsiaṅ mba bandum tse bo be ngùanesà là, bo lo tum ntum bo, tshù bo li tse bo se' là. O lo sôg wul o, nse' tun miag mu, nkwi wul o njoṅ tshu kwiwut fa, nummbe bo se'e.

⁴¹O tswe num mbwô kunndà; ndù bo te téblé se bo nabte là mbwe bwe. O te ju àm ze nelamte bo mfèt màm bwe.

⁴²Bo nke nju' tshu'te bwoṅ benntùn tse bo tshwèt ṅwate là; ba Sabéa tse bo fe kônkwa là lo be netèt yen bwoṅ benntùn nà. Tshen ba Sabéa nà lo so nkwa bu tshen ben nà tse bènnzwi li, nte ntshe' mebwô tu bo.

⁴³Ndùlala me tshob num mènnzwi z'a ywèn ntùm nu màndà là ndù: Mba ndonni a ke' nkale!

⁴⁴Bo be nèn mbaṅ i mba bo be nèn mbaṅ kattù mènnzwi là. A b'a mba bo ke nèn mbaṅ Ohola bo Oholiba là. Tshen bènnzwi là tse bo be ghafètte lem nà.

⁴⁵Là ben netsin nsi tsho'te yube, mba bo be ntsho'te bènnzwi tse bo be ngù màndà là, mba bo be ntsho'te bènnzwi tse bo be mfètte lem nà; bo b'a ghaghù màndà, ndù lem num mum mbu mube.

⁴⁶Tshù, Tshùaben Nsi tshob ndù: Me nsi ghù bwoṅ benntùn lo nsi num bo, me bèn nswèn yub nge', bo lagte yub kà ke faṅ sàm ju.

⁴⁷Yen bwoṅ benntùn nà nsi tamte yub ndoṅ, lo' ṅwi zwite yub yi; bo nsi zwite bon tshob tse bandum mba tse bènnzwi, ton mba' mub mbwôge.

⁴⁸Me nsi ghù nefètte lem mi ntùm ngô. Njoṅ bènnzwi fa nsi zi'te, be ke bèn nefètte lem mba bin nà.

⁴⁹Bo nsi ghù nukebwô zin tsho tu bin. Bin nsi ket nukebwô neto tsine, tshùa ndùlala lèn ndù me b'a Tshùaben Nsi.