Read Medumba Ezékia 24 Bible Online

Ezékia 24 - Medumba bible

Ezékia 24

¹A lo be kum ngu'njù bwe'e, mum lé'njù gham ntùm maṅwù gham, Tshùaben tshob me ndù:

²Mén mèn, kite sen lé'njù li, kua' sen lé'njù li. Be kua' sènni mfen Babilon a' yab mbu num Yérusalém.

³Tshob ta' tànkùt tunndà ghatatu, ntshob bo ndù: Tshù ju ze Tshùaben Nsi tshob li: Te kab num mbwôge, te i naṅ ntse mum bwe.

⁴Yabte nkam mbàb mum bwe, yabte nkam mbàb mebwô bwe, nku mi boa mbu mi; yabte mba mvôg mi ntùm bwe.

⁵Lo' nyàm tse ntùn netèt bwoṅ nyàm, sote ntshwèn tun kab yàme, na kà njoṅ i fa bùnte ntùm kab, mba kua' mvôg bwe.

⁶A ndùlala Tshùaben Nsi tshob ndù: Nge' tu ngô z'a be mfètte lem nà, a b'a mba kab ze bangùa ghom i, ke bèn netsho' là! Sôte nkam mbàb mi a ntùm kab là, mbe sote ke tswitt'a netswitte.

⁷Nummbe lem tse yen ngô là fètte là ke' à be netèl i. A fètte tshen lem n'a num loṅ, a ke' fètt'a num tsha' lo' mbab biagt'é yi.

⁸Me lo fètte tse lem num loṅ ndù kà sàm mèn kabt'é, ndùlala ndù me lo' nda'te tshùagntù àm yi, mba ndù me yagte mba'a.

⁹A ndùlala Tshùaben Nsi tshob ndù: Nge' tu ngô z'a be mfètte lem nà! Mba me yàm nsi kwé'te ta'tse mbwôg ndùb.

¹⁰Tse'te ntshwèn, kwé'te mbwôge, na mbàb kua' mebwô, ma' bon tshusôg nelamte bwe. A bwô ndù mba mvôg kù.

¹¹Te kab z'a na là num (mbwôge) nge'mbwôge. A bwô ndù tùn ba, bangùa z'a be num bwe là tsho'o, bangùa z'a be num bwe là tsho' ngwù nsi.

¹²Là yen kagtùn ni b'a banban, ntsha' bangùa z'a tam num i là ke nsi tsho'o.

¹³Yérusalém, o sagte mum mfa' mu mi ke tsin. Me lo diag nelànt'o, l'a o ke faṅ ndù me lànt'o. Ndonni b'o ke bèn mbe nelàne, tà nkum ndùse tshùagntù àm yab nge' num o là.

¹⁴Me Tshùaben, me tshob ndùlala, yen nu là nsi be mba me tshob là. Me ke nsi tsho' ju num bwe, ke ko ndèn, ke bate sàm ju bwe. Bo nsi tsho't'o num nzin mu, tsho't'o num mfa' mu. Tshùaben Nsi bèn ntshobe.

¹⁵Tshùaben tshob me ndù:

¹⁶Mén mèn, m'a' lo' vù nkwé nshun yôg o z'a be ngù ntù o ṅwate là yi. A ke' bwô ndù o làn wul o, kà kua', kà ntsenyà tum tu o.

¹⁷Tsham zwe ntùm ntshu mi'i, kà te vù, (nabte wul o) kut tu o, so nketo' ku o, kà kom tu o, kà kabte se o, kà jù ntsivù benntùn.

¹⁸Me tshob yen nu là ngô nkebnjù, nzwi àm kwù mfetnjù. A be ndamnjù, me ghù ju ze Tshùaben tshob me là.

¹⁹Ngô tshob me ndù: O ke' tote ntun ju z'o tshwèt ngù là bag ké?

²⁰Me bùnte bo ndù: Tshùaben lo tshob men ntshob li me ndù:

²¹Tshob tunndà Israél ndù: Tshù mba Tshùaben Nsi tshob là li: Tshù, m'a' sagte dù' àm ze nelàne (mbwe' àm) dù' ze ka'te zin neta be mfe là, dù' ze bin be nte miag bwe nke ntsiaṅte là, dù' ze bin be nkô neshu là. Bon tsin tse bandum boa tse bènnzwi tse bin nsi faṅ bwe nèn nà nsi kwùt'a num ntshùag ṅwi.

²²Bin nsi ghù zin a mba me ghù là:

²³Kà bin kom nyiaṅ ntshu tsine, ke jù ntsivù benntùn; kà bin kom tu tsine, ke sô nketo' ku bin; kà bin làn wut tsine; ke kua'. Bin nsi fam num nukebwô tsine, ke tsham zwe bin bin.

²⁴Ezékia nsi be keki bin. Bin nsi ghù ndaṅndaṅ mb'a ghù là. Ndùlala, ndùse yen nu là nsi bumte là, bin nsi lèn ndù me b'a Tshùaben Nsi.

²⁵Wù mén mèn, lé'njù se me nsi lo' ju ze yub neta be mfe bwe, tsiaṅte yub bo ka'te yub, ju ze bo be nte miag mub num bwe, nke nkô i neshu là boa bon tshob tse bandum mba tse bènnzwi là;

²⁶num sen lé'njù là, mèn nsi tum ntshu vù kù se' mbaṅ o soṅ o yen tshô là.

²⁷Num sen lé'njù là, ntshu o nsi gha'a, bin mèn z'a tum ntshu vù là tshobte; o ke nsi bèn be ketshob. O nsi be keki bo, bo lèn ndù me b'a Tshùaben.