Read Medumba Ezékia 25 Bible Online

Ezékia 25 - Medumba bible

Ezékia 25

¹Tshùaben tshob me ndù:

²Mén mèn, kaṅ se o ndôte bon Ammon, ntshob ntshob ngatshob ntshob Nsi num bo.

³O nsi tshob bon Ammon ndù: Bin ju' ntshob Tshùaben Nsi! Tshùaben Nsi tshob ndù: Mb'o tshob ndù: Ah! Ah! Num dù' àm ze nelàn (mbwe' àm) ze bo sagt'é là, num tsha' Israél tse bo sate bo tunndà Yuda z'a tshwèt nèn ndà kuan nà,

⁴tu wul àm me fà o bon bag ntumnyam mba yub ju là; bo nsi tete ntàb tshob netèl o, tete tshob dù'ntswe bwe; bo nsi jù ntàm tù mu, nu mu mbùn nyàm.

⁵Me nsi lo' Rabba ghù kin ba kamél yi. Yen ngelaṅ nà bin nsi lèn ndù me b'a Tshùaben.

⁶Tshùaben Nsi tshob ndù: Mb'o na' mbu'te mbu, ndabte nku mu, ntsiaṅte, wag dun ntù o num nu ngô Israél là,

⁷ndonni me nyit bu àm num o, me nsi ghù ndù ngôngô lagte ntsha' o, me bèn nsô o netèt ntumntum, mbiagt'o netèt ngôngô. Me nsi biagt'o, o lèn ndù me b'a Tshùaben.

⁸Tshù mba Tshùaben tshob li: Mba Moab bo Seir tshob ndù tunndà Yuda b'a mba njoṅ ngôngô fa là,

⁹tu wul àm nsi biagte ntusô Moab mi a tete mfe num mbat là. Men ntusô là, Bet-Jeshimot, Baal-Meon bo Kirjataim ba nkuni ngô.

¹⁰Me fà yen ngô là bon ntumnyam tse bo be ghakeban ba Ammon nà. Me fà ngô bo mba yub ju là, ndùlala ndù kà bo bèn nsiaṅ bon Ammon netèt ngôngô.

¹¹Tshù mba me nsi tsho'te Moab, bo lèn ndù me b'a Tshùaben nà.

¹²Tshù mba Tshùaben Nsi tshob li: Mba Edom na' ntsho ntùm yagte mba' num tunndà Yuda, mb'a na' ntù' ngavù ntsha, njagte mba' num tunndà Yuda là,

¹³tu wul àm Tshùaben Nsi me tshob ndù: Me nyit bu àm mba num Edom, m'a' biagte nyàm boa benntùn bwe. Me nsi lo' i ghù kônkwa yi. Benntùn nsi vùte num ntshùag ṅwi neto' Téman nèn nkum Dedan.

¹⁴Me nsi tshùa njam bu yàm nzwit mèn Israél, yagte mba' z'a be yàm nà lo nsi num Edom. Israél nsi ghù num Edom ndaṅndaṅ mba yantù àm bo tshùagntù àm be yi là. A nsi tshùa ndùlala bo lèn ju ze yantù àm be yi là. Tshùaben Nsi bèn ntshobe.

¹⁵Tshù mba Tshùaben Nsi tshob li: Mba ba Filistia lo' à yagte mba' ngù nu yi, nsôte njoṅ yub yagte mba' fa, wag dun ntù bo, bo diag nelo' kebàn nsate dù' yi matmat là,

¹⁶ndonni tu wul àm Tshùaben Nsi tshob ndù: Me nyit bu àm num ba Filistia, m'a' biagte ba Kérét, mbiagte mba tshé' benntùn tse bo tù' num ben bo be ntswe nkaṅntse là.

¹⁷Yagte mba' tse me nsi ghù num bo là b'a tse ndùb; me nsi so ntsha tu bo mum tshùagntù àm. Ndùse kua' yàm yagte mba' nsi lo nsi num bo là, bo nsi lèn ndù me b'a Tshùaben.