Read Medumba Ezékia 26 Bible Online

Ezékia 26 - Medumba bible

Ezékia 26

¹A lo be kum ngu'njù ntshob ntshù' gham, num mbwe lé'njù ntùm ṅwù, Tshùaben tshob me ndù:

²Mén mèn, Tiro tshwèt ntshob num Yérusalém ndù: Ah! Ah! Bo be'te, bo be'te nzendà ntumntum! Tiro tshob ndù: Ndonni bo nsi kaṅ lag te à num àm. Me nsi tshote yàm ndonni. Yérusalém tù' a kônkwa.

³Tiro, ndonni tu wul àm Tshùaben Nsi tshob wù ndù me lo nsi num o. Me nsi ghù ngôngô yàm lo nsi num o, nke mbùn mba ntu'ntse ndùse dibantse tshwèt nko' là.

⁴Ngôngô nsi sate tse kàbngô Tiro, sate tse dù' netsin bwe mbéb ngô. Me nsi bé'te mbab bwe, Me nsi lo' dù' i ghù gholoṅ yi.

⁵A nsi b'a dù' neyag mbunjà bwe netèt dibantse. Nummb'a b'a me Tshùaben Nsi bèn ntshobe. Ngôngô nsi sé't'é.

⁶Mbe se' mba ntusô mi a be te num tsha' njum mum ngô là, bo nsi sate yube, bo lèn ndù me b'a Tshùaben.

⁷Tshù ju ze Tshùaben Nsi tshob li: Tshù Nébukanetsar mfen Babilon, mfen fenfen nà ze me nsi lo' i tu tshag num Tiro là. A ghù ba nyàmdiaṅe, ngù nkalige, ngù ghako' nyàm, mba mo' bwoṅ benntùn yàme.

⁸A nsi sate ntusô mu mi a bete num tsha' njum mum ngô là. A nsi tswe' nsam num o, a nsi jag kàbya' num o, a nsi te ta' tshètntsho num o.

⁹A nsi lo' ntshu màngàn mi be'te tsho kàbngô yi, lo' tse masin ntsho sate tsho dù' netsin bwe mbéb dù' yi.

¹⁰Nyàmdiaṅ tse ts'a yàm nà nsi lo' mbab nku mub kabt'o yi. Tsho kàbngô nsi nyi'te ndùse tshu'te ghako' nyàm nsi ṅwag bo tshu'te nkalig, tshu'te nku nkalige, tsho ntùm yu nsém mba bo be ntsho ntùm ngô ze bo le' i ntsho tà ndo' i là.

¹¹A nsi lo' nyàmdiaṅ tse nyiaṅte tsho manze yi, lo' ṅwi zwite ben tsho yi, njoṅ ntom nekuni fa ts'a ke ngù o nka'te là nsi vù nsi.

¹²Bo nsi lo' tshunkàb tsho, lagte tshuntàn tsho; bo nsi sate tsho kàbngô boa mu mba' mi mebwô. Bo nsi tswitte ndoṅ mu, ntshwèn o boa bwe tsho tamte naṅ ntùm dibantse.

¹³Me nsi biagte nze mu nkwi, ndù kà bo bèn nju' là ndoṅ mu.

¹⁴Me nsi lo' o ghù gholoṅ yi. O nsi tù' dù' neyag mbunjà bwe. Bo ke nsi bèn kul o. A ju ze me Tshùaben Nsi tshob là.

¹⁵Tshù mba Tshùaben Nsi tshob num Tiro li: Ba ngô tètntse nsi vètte ndùse tshu'te yu nevù nsi be, ben tse bo ket mfaṅ ke nkua'a, nezwite benntùn se ka netèl o là.

¹⁶Fenfen tse bo be num dibantse là nsi swe' num ndiaṅkwa mube, sô kummbaṅ num bo, sô nzwe nevèn num bo. Bwôg nsi kut yube, bo tamte tun yub nsi; fétwut nsi ke ghom yub njoṅ ndù. Nu nsi tshùa yub num o.

¹⁷Bo nsi fi njom num o tshob ndù: Ṅ, ndù mba wù vù ké? Wù ze ghazinte num dibantse ke ntswete la' o là, wù ze lén so ke nju'ni, kuni ngô neta o be nkuni ngô num dibantse là. Bo sat'o bin à ben tsho tse bo ke nkag bwôg num ben tse bo diaṅ yub mbum nà.

¹⁸Ndonni ba ngô tètntse tshwèt mvètte mum lé'njù s'o vù là; yu nevù kag fétwut num ba ngô tètntse.

¹⁹Nummbe tshù ju ze Tshùaben Nsi tshob li: Me nsi ghù o tù' kônkwa, be mba ngô ze mèn ke' be tswe bwe là. Me nsi ghù ghem lam o mbume, ntse ndùbndùb kabt'o.

²⁰Me nsi tamt'o num tsemo' ben ma' ntùm tàm, mbaṅ ba mbwe'. Me nsi ma' o tà mà bam tsha'a, dù' z'o nsi ghô bwe tù' wù matmat là. Me nsi yab o mbaṅ ben tse bo na' njà be mum tàm nà, ndùlala ndù kà sàm mèn tswe netèl o. Ghamte z'a tù' là, me yab ben tse bo be ntùn nà.

²¹Tshùaben Nsi tshob ndù: Me nsi ghù o tù' ju banban, ke bèn mbe (sàm ju). Bo nsi diag o, là ke bèn neyen o.