Read Medumba Ezékia 27 Bible Online

Ezékia 27 - Medumba bible

Ezékia 27

¹Tshùaben tshob me ndù:

²Wù mén mèn, ma' men njom ni num Tiro,

³ntshob ndù: Wù Tiro z'o tswe nkaṅ dibantse, nke nta ntàn bin benntùn yàm tse bo fete ntùm ba ngô tètntse là, tshù ju ze Tshùaben Nsi tshob li: Wù Tiro lo ke ntshob ndù: Me b'a mba mbwô sitima là, ndù me bwô ntshùate.

⁴Yu dù'ntswe b'a netèt dibantse. Ben bo kom o là lo kom o, ngù o bwô ntshùate.

⁵Bo lo' à ntshwèn (ntù) mi a fe num mbat Sanir là nkom mu ntaba' yi, ndo' à sédra ts'a fe Liban nà nte ntom o yi.

⁶Bo lo' a ntshwèn tù s'a fe Basan nà nkom nkô kanu wù yi. Bo kom yu nko'ntse nsô nsennyàm a ntshwèn sédra z'a fe ba ngô tètntse ts'a Kittim nà.

⁷Nzwe mebwô ts'a fe Egipto ndù bo vèn nà, lo ke mb'a ze netaṅte num tu o bo ze nefim o yi. Nzwe ts'a ghù nto'nto' meba bo nenàfi, mfe à ba ngô tètntse Elisha là ke mb'a nzwe mu nto'ndà.

⁸Ngô Tiro, ba Sidon boa ba Arvad lo ke mb'a tsho ghatshagte sitima, tsho ghazenu be ghasoṅ o.

⁹Ba Gebal tse mbwe boa tshob ghave lo ke nabte dù' tsho ts'a bagte là. Njoṅ nsitima fa lo ke mbe netèl o boa njoṅ ghafa' tshob fa ne ta ntàne.

¹⁰Ba Persia, ba Lud lo ke mfa' mum yu ntshu ntsho. Bo lo ke ngette tshètntsho tshob boa ntshe' tùn mub netèl o. Bo lo ke ngù o be ntùm nkuni.

¹¹Ba Arvad bo ntshu ntsho yub lo ke ntsinte tù mbaṅ tsho kàbngô, ba Gamad tswete tù num tsho dù' netsin bwe mbéb ngô. Bo lo ke ngette tshètntsho tshob mum njoṅ tsho kàbngô fa, ngù ndùlal'o bwô ntshùate.

¹²Bin Tarsis lo ke nta ntàne, a nke ndo' nzenze ntùn njun nzenze tshunkàb yi wù.

¹³Bin Javan, Tubal bo Méshék lo ke nta ntàne. Bo lo ke ndo' ba kuan boa tshundà tùn meba ndo' njun tshujù yi wù.

¹⁴Benntùn tse bo ke ntswe Bet-Togarma là lo ke ntô yub njo à boa nyàmdiaṅ nedù' nà, boa nyàmdiaṅ neko'o, bo nyàm tse nyàmdiaṅ bo kekwèn bèn mbwe là.

¹⁵Bin ba Dedan lo ke nta ntàne; ntàn ngô tètntse nzenze ke ntôg a mum mbu mu. Bo ke ndo' a nsennyàm bo ntshwèn ntù bù njun tshu yi wù.

¹⁶Bin ngô Siria lo ke nta ntàne, a nke ndo' mbwômbwô nzwe nevèn boa ndoṅ tanjoṅ njun tshu wù yi.

¹⁷O lo ke nta ntàn bin ngô Yuda, bo ngô Israél. Bo lo ke ndo' nsa mi a fe Minit là, memo' miag tshu, ṅwa'a, mfèt bo menya njun tshu yi wù.

¹⁸Bin Damas lo ke nta ntàne. A lo ke ntshùa njam tshujù ts'o ghù a yàm, ntshùa njam tshu ntùn ts'o ghù a yàm nà, nke mfà ndu' mi a fe Helbon bo nyiaṅ njùmbwe fôgtab wù.

¹⁹Dan bo Javan lo ke ntsin tà Uzal ndo' tùn se bo tswe, kab bo kubtù njun ju wù yi.

²⁰Bin ngô Dedan lo ke nta ntàne, bin yi ke nta nzwe boa tshu neko' nyàmdiaṅ yi.

²¹Bin ngô Arabia boa kamkam Kédar lo ke nta ntàn njùmbwe, nkomnjù, boa mfot mbwe.

²²Bin à ghatantàn tse bo fe Séba bo Rama là lo ke nta ntàne. Bo lo ke ndo' njoṅ la nelamte fa, ndo' njoṅ nzenze ndoṅ tanjoṅ fa bo gol njun ju wù yi.

²³Bin à ngô Karan, Kané bo Edèn, ghatantàn tse bo fe Séba, Asiria, Kilmad lo ke nta ntàne.

²⁴Bo lo ke ndo' mbwômbwô nzwe, nkummbaṅ ṅwa'ṅwa' meba mba nto'nto', nzwe ṅwa'ṅwa', mfèt neba'a, nke njun ju yi wù.

²⁵Mi nsitima Tarsis lo ke nzinte nta ntàn mu. Yu nebe lo ghù fu' bo nkuni netèt dibantse dù' z'o be là.

²⁶Ghatshagt'o lo ke ndo' o nzinte yi tà netèt dibantse, fetmbaṅ z'a fe bag ntumnyam nà be't'o netèt dibantse.

²⁷Njoṅ tshunkàb tsho fa, njoṅ tshujù tsho fa, njoṅ tshu fa ts'o ghù là, njoṅ ghafa' fa bo ke mfa' num o là, njoṅ ghasoṅ o fa, njoṅ ghanabt'o fa boa tsho ghatantàn fa, njoṅ tsho ghama' ntsho fa ts'o ghù netèl o là boa njoṅ bwoṅ benntùn ts'o ghù num o là, bin à bo lo tamte nèn tun ntse mum lé'njù s'o vù mum dibantse là.

²⁸Njoṅ ghatswe kaṅntse fa lo vètte ndùse ghafa' num o kua' là.

²⁹Ndùlala, njoṅ ghatshagte nsitima fa nsi swe' tù nsitima mube. Njoṅ ghafa' tù sitima fa boa ben tse bo be ntswe num dibantse là nsi swe' tswe num tsha'a.

³⁰Bo nsi tshag nze yub tù, làn o, bo nsi kua' neshu. Bo nsi yaṅte wut yub num mbabe, yaṅte wut yub mum bwembwôge.

³¹Bo nsi kom tu yub num tu o, taṅ nkùvù, bo tshwèt nkua' o, zwe dun ntù bo, bo tshwèt nkua' o neshu!

³²Bo nsi tôte vù mum zwentù yub mum nge' o, ke tshob ndù: Wù z'a na' mbe mba Tiro l'à? Yen ngô là z'a be netèt dibantse là.

³³O lo ke nsô tshuntàn tsho ntùm nsitima ndo' nkém ngôngô yi. Tshunkàb tsho boa tshujù tsho ts'a yàm nà lo ke ngù fenfen nsitsha' tù' ghafu' (ghankàb.)

³⁴Ndonni o vù mum dibantse, ntu'ntse boa fetntse biagt'o, mbagt'o. Bin à nsitima mu mba ben tsho tsiag tun ntse.

³⁵Bwôg ghom njoṅ benntùn tse bo be ntswe ntùm ba ngô tètntse là num nu a tum wù là. Bwôg ghom fenfen tshobe, bo ṅu'te se yube.

³⁶Ghatantàn ntumntum tshwèt ntôte fin ndùse bo yen o là; nummb'o tù' ju fétwut, nummbe bo biagt'o matmat.