Read Medumba Ezékia 28 Bible Online

Ezékia 28 - Medumba bible

Ezékia 28

¹Tshùaben tshob me ndù:

²Mén mèn, tshob mfen Tiro ndù: Tshù ju ze Tshùaben Nsi tshob li: O be nko'te wut nke ntshob ndù: “Me b'a nsi, me tswe num diaṅkwa nsi netèt dibantse.” Tshù, o b'a mènntùn, ke b'a Nsi, o tshwèt ndo' ntù o mba ze Nsi là.

³Mo' ndù o ze nu ntshùa Daniel. Mo' tsham ke bwe z'a lem num miag mu là.

⁴O tshùa njam yu zenu bo yu nesiaṅte kà ngù tshunkàb yàme. O tse'te gol boa silba (nkàb) ntùm tsho nta.

⁵Yu zete b'a ze ndùb ntùm ntàne. O ghù tshunkàb ts'a yàm nà, a tshùa ndùlal'o ghù ko'tewut ntù o num tshu ts'o ghù là.

⁶A ndùlala Tshùaben Nsi tshob ndù: Mb'o tshwèt ndo' ntù o mba ze Nsi là,

⁷me nsi ghù ba mfàm lo nsi num o, ghù bagkèt ngô netèt ngôngô lo nsi num o. Bo nsi sô ṅwi mbàn num zenu o, sagte yu ghamte;

⁸bo nsi tèn o ma' mum tô, o kwù mbagmbag vù netèt dibantse.

⁹O ke nsi bèn tshob ndù o b'a Nsi mbwe ngazwi o. Là, o b'a mènntùn, ke b'a Nsi mum mbu ngazwi o.

¹⁰O nsi kwù vù ba kesiket bu mfàm. A b'a me Tshùaben Nsi bèn ntshobe.

¹¹Tshùaben tshob me ndù:

¹²Mén mèn, tôte vù num mfen Tiro, ntshob yi ndù: O lo b'a mènntùn z'a dun zenu, mbwô ntshùate là.

¹³O lo be Edèn, mum nka' Nsi. Kum so lo ghù nzenze mfé ndoṅ tanjoṅ num bwe: Loṅ sardoine, topaze, diamanto, krisôlitô, onyx, jaspé, safir, eskarbukle, emerode bo gol. Tsho bon ndam boa mandô lo be nelo' mfa' wù yi fe mum lé'njù se bo bwe o là.

¹⁴O na' mb'a kérubim ngakabte. Me lo te o, o tswe num mbat Nsi ze nelàne. O lo ke nzinte netèt ndoṅ mi a tshwèt nziag là.

¹⁵O lo be kelo' mum nzin mu, fe mum lé'njù se bo bwe o là, tà nèn nkum lé'njù se bo yen mfànnu num o là.

¹⁶O lo be ghù ndù ntàn mu zine, ndun nu nefètte lem, ngù nukebwô. A ndùlala me nsi tèn o num mbat Nsi ze nelàn ma' nsi, mbiagt'o, wù kérubim ngakabte z'o be netèt ndoṅ mi a tshwèt nziag là.

¹⁷O lo tshùa njam bwô o ngù ko'tewut ntù o. O lo tshùa njam so fu' mbagte yu zenu. A ndùlala me nsi ma' o num tsha'a, ghù o tù' ju komzwi num miag fenfen.

¹⁸O lo tshùa njam mfànnu mu mi a gha' mbu là, ntshùa njam mfùm z'a be mum mu ntàn nà, ndo' tsho mbwe' ngù tshu banban yi. M'a' ghù mbwôg tum be num o nkù o, m'a' lo' o nkaṅ bwembwôg yi num nsitsha'a, num miag njoṅ benntùn fa tse bo tshwèt ndôt'o là.

¹⁹A tshùa num tu o bwôg ghom njoṅ benntùn fa tse bo lèn o netèt ntumntum nà. Bo lo' o ngù ju banban yi, mbe ndù o ke bèn nzi mbe.

²⁰Tshùaben tshob me ndù:

²¹Mén mèn, te lag num Sidon, ntshob ntshob ngatshob ntshob Nsi ndù:

²²Tshù ju ze Tshùaben Nsi tshob li: Sidon, tshù me li me lo nsi num o là. Bo nsi ghamt'àm netèl o, bo lèn ndù me b'a Tshùaben. Me nsi tshùa njam yàm netsho'te la'te ndù me b'a Nsi z'a làn nà.

²³Me nsi tum keya' netèl o. Me nsi ghù lem fètte num tsho manze. Fe ben nsi vùte netèl o. Bo nsi lèn ndù me b'a Tshùaben ndùse ṅwi nsi fete nzenze watte yub là.

²⁴Fe ndonni njô mi a be nsobte tunndà Israél boa kwékwénàndô ts'a be nkua i nke nja i là ke nsi bèn fe ntumntum mi a diaṅ i mbume, nke ngwag i là. A nsi tshùa ndùlala bo lèn ndù me b'a Tshùaben Nsi.

²⁵Tshù ju ze Tshùaben Nsi tshob li: Ndùse me nsi tse'te tunndà Israél, sôte yub netèt ngôngô dù' bo sate là, me nsi la'te ntumntum ndù me b'a Nsi z'a làn nà. Yen ngelaṅ nà Israél nsi tswe mum ngô yub ze me na' mfà ngafa' àm Yakob là.

²⁶Bo nsi tswe ntùm fite, kut mba' bèn bwe nkùa. Bo nsi tswe fite bwe ndùse me nsi tsho'te ben tse bo diaṅ yub mbume, nke ngwag yub là. Yen ngelaṅ nà bo nsi lèn ndù me b'a Tshùaben Nsi yub.