Read Medumba Ezékia 29 Bible Online

Ezékia 29 - Medumba bible

Ezékia 29

¹A lo be kum ngu'njù gham, mum lé'njù ntshob bàa gham mum ṅwù gham, Tshùaben tshob me ndù:

²Mén mèn, te lag num Faraon, mfen Egipto, ntshob ntshob ngatshob ntshob Nsi num i bo ngô Egipto fa ntshob ndù:

³Tshù ju ze Tshùaben Nsi tshob li: Wù Faraon, mfen Egipto, wù ngànyàm ndùb z'o nô netèt mu nta'ntse là, me lo nsi num o. O be ntshob ndù: Ta'ntse b'a yàm. A b'a me bèn nabt'é.

⁴Me nsi taṅ ghub num ngagntshu o, nabte ngontse ts'a ntùm tsho Nil là num nga' mu. Me nsi soṅ o tum yi netèt tsho Nil bin à ngontse ts'a ṅabte num nga' mu là.

⁵Me nsi ma' o num kônkwa, wù bin à ngontse tsho Nil. O nsi vù num tsha'a, sàm mèn ke nsi bù' o nsi, sàm mèn ke nsi tshoṅ o. Me nsi fà o nyàm boa nsaṅ ndù bo lo' o ngù jujù yub yi.

⁶A nsi tshùa ndùlala ba Egipto lèn ndù me b'a Tshùaben. Nummbe bo na' mbe tunndà Israél a mba ntom nka'nesoṅ nà.

⁷Bo lo ghom o, o be' mum mbu mube, nsô ghem nkembe' sobe. Bo lo yi'te num o, o tshet, ngù zwe' yub fiag.

⁸A ndùlala Tshùaben Nsi tshob ndù: Me nsi ghù ṅwi se' num o, me zwite benntùn boa nyàm netèl o.

⁹Ngô Egipto nsi tù' fam, be kônkwa, bo lèn ndù me b'a Tshùaben. Tshù, o be ntshob ndù: Nil b'a màm, me bèn ntswe' i (nabt'é).

¹⁰A ndùlala, me lo nsi num o, mba num tsho Nil. Me nsi ghù ngô Egipto tù' fam, mbe kônkwa, nto' Migdol nèn nkum Syene tà nèn nkum mba ndùnsi Etiopia.

¹¹Ku mènntùn ke nsi bèn te bwe, nku nyàm ke nsi bèn te bwe. A nsi tù' fam, mènntùn be ke bèn netswe bwe num ngu'njù ṅam nkuà.

¹²Me nsi ghù ngô Egipto tù' kônkwa netèt nkônkwa. Ntusô mi nsi tù' fam netèt ntusô mi a be fam nà num ngu'njù ṅam nkuà. Me nsi sate ba Egipto netèt ngôngô, ngù bo sate nèn netèt ntumntum.

¹³Tshù mba Tshùaben Nsi tshob li: A nsi tshùa ngu'njù ṅam nkuà me tse'te ba Egipto ntùm ngôngô dù' bo sate nèn nà.

¹⁴Me nsi lo' kuan, bon Egipto bèn yi njam, tete yub ntùm ngô Patros, z'a be bag ngô ze bo bwe yub bwe là. Bo nsi te mo' meju (nufen bwe s'a ke' féb nga nsi là) fikèt nufen bwe.

¹⁵Egipto nsi be fikèt nufen netèt tsemo' nufen. A ke nsi bèn ke tô ngôngô. Me nsi kôgt'é, ndùlala ndù k'a bèn nsa' ngôngô.

¹⁶Israél ke nsi bèn yi'te num Egipto. A ke mb'a nkwénta mfànnu Israél, nummb'a be nte lag num i. A nsi tshùa ndùlala bo lèn ndù me b'a Tshùaben.

¹⁷A lo be kum ngu'njù ntshob sammbàa ṅam mbàa, mum mbwe lé'njù ntùm maṅwù, Tshùaben tshob me ndù:

¹⁸Mén mèn, Nébukanetsar, mfen Babilon, yab ze ntshu ntsho njam Tiro, num mo' kuni ntsho ndùb. Tshù, tu njoṅ benntùn fa kom tshwèt ntsho, nkembe' njoṅ benntùn fa tsho'te tshwèt ntsho. Là, ke yi ke ntshu ntsho i lo ke' sô sàm ju num njoṅ tshu fa tse bo ghù num Tiro là.

¹⁹A ndùlala Tshùaben Nsi tshob ndù: Me nsi swèn Egipto mum mbu Nébukanetsar mfen Babilon. A nsi tswitte tshunkàb tse, lo' tse ntsha', lo' ze ntsha' ntsho nèn yi. Yen nà nsi b'a ze nkàbfa' ntshu ntsho i.

²⁰Me nsi fà ngô Egipto yi lo' tsho' fa' s'a fa' num Tiro là. Nummb'a fa' sen fa' l'a me. A b'a ju ze Tshùaben Nsi tshob là.

²¹Num sen lé'njù là me nsi ghù ta' ndô bit mum tunndà Israél, me bam wù ndù o gha' ntshu o netèt bo ntshob nu. Bo nsi lèn ndù me b'a Tshùaben.