Read Medumba Ezékia 3 Bible Online

Ezékia 3 - Medumba bible

Ezékia 3

¹A tshob me ndù: Mén mèn, jù ju ze bo fà wù là. Fèt yen ṅwa'ni nebote là, nèn ntshob nu tunndà Israél.

²Me gha' ntshu àm, a ghù me fèt yen ṅwa'ni nebote là.

³A tshob me ndù: Mén mèn, kém wul o, njwèt yen ṅwa'ni li ze me fà wù là. Me fèl i, a tswe ntshu àm mba ṅwa' là.

⁴A tshob me ndù: Mén mèn, nèn mbaṅ tunndà Israél, ntshob ntshob màm bo.

⁵Nummbe me tum o mbaṅ tunndà Israél, ke b'a mbaṅ nzwit mèn z'a ghù ntshob ngùme, ntshob mi bo ke' be ju' là.

⁶A ke' b'a mbaṅ nzwit nzenze tse bo ghù ntshob ngùme, ntshob mi bo ke' be ju' ke bèn nju' tshu tse bo tshob là. A be ze me tum o mbaṅ bo là, mba bo nsi ju' ju z'o tshob là.

⁷Là tunndà Israél ke nsi kô neju' ju z'o tshob là, nummbe bo ke' kô neju' ju ze me tshob là; a nummbe tunndà Israél ghù tatu bo ntù z'a sag là.

⁸Tshù, me nsi ghù mba wù tùn tu, ndù o be ngatùn tu mbwe bo, ghù o ghù ntanta, ndù o be ngantanta mbwe bo;

⁹me nsi ghù tu o ta mba tùn ndù a ta neshu mbèn nta neshu (diamanto) s'a ta ntshùa gholoṅ nà. Kà bwôg yube, kà bwôg mbwe bo, nummbe bo b'a nzwit ghatatu.

¹⁰A tshob me ndù: Mén mèn, ju' men ntshob li mi me nsi tshob wù là mum ntoṅ mu, ntshùb i ntù o!

¹¹Nèn mbaṅ bonla' bin; o nsi tshob nu bo, ke bo ju' ke bo ke ju' lo, mb'o nsi tshob bo ndù Tshùaben tshob ndùlala.

¹²Ywèt kel àm, me ju' mo' mà tshu'te ndùb njam àm ndù: Ghamte be nkuni Tshùaben, fe tà ntùm dù'ntswe i!

¹³Me ju' tshu'te mbàb ba nyàm mi mo' ke ndab num mo' là, mba tshu'te nku matua mbaṅ bo bo mo' mà tshu'te ndùb.

¹⁴Ywèt kel àm nèn yi. Me lo ke ndo' yantù bo tshùagntù nèn yi, bu Tshùaben nke mfa' num àm kua' neta.

¹⁵Me kum Tel-Abib mbaṅ ba kuan (ghakùla') tse bo tete mbaṅ ta'ntse Kebar, dù' ze bo be là; me tswe bwe lé'njù sammbàa, netèt bo, ke lèn dù' ze me be là.

¹⁶Lé'njù sammbàa lo be tshùa, Tshùaben tshob ntshob mi me, ntshob ndù:

¹⁷Mén mèn, me lo lo' o mba ngalôte là num tunndà Israél. O nsi ke ju' ntshob mi a tum ntshu àm nà, soṅ yub me.

¹⁸A be ze me tshob ngatshùagntù ndù a nsi kwù, o ke tshob yi, ke ghù ngatshùagntù kag nze kebwô nsi, njôg tu wul i là, mba yen ngatshùagntù là nsi kwù num mfànnu mi, tu wul àm bètt'o lem tse.

¹⁹L'a be z'o soṅ ngatshùagntù, a ke kag ze nze tshùagntù nsi bo nze kebwô, nkwù mum mfànnu mi là, mba tu wul o nsi yôg tu o.

²⁰Ndùse mèn netsin nsi kag ze nunetsin nsi ghù nukebwô là, me nsi bùn nkù mbwe i a kwù; l'a be z'o ke' soṅ i là, mb'a nsi kwù mum nukebwô i, bo lagte mfa' mebwô mi a ke ngù là; tu wul àm me bètt'o lem tse.

²¹L'a be z'o soṅ mèn netsin ndù k'a ghù nukebwô, a ke ghù nukebwô là, mb'a nsi yôge, nummb'a faṅ o soṅ i; yen ngelaṅ nà, tu wul o yôg tu o.

²²Bu Tshùaben bèn mbe num àm nsen nà , Tshùaben tshob me ndù: Lo tù nèn mà tômbo'o, me nsi tshob nu wù bwe.

²³Me lo nsi nèn mà tômbo'o; tshù, nkuni Tshùaben ṅwag bwe, be ndaṅndaṅ mba me yen i mbaṅ ta'ntse Kebar, ngwù nsi kabkab là.

²⁴Ywèt tsho num àm, ngù me lo ntsin num nku màm. Tshùaben tshob nu me, ntshob ndù: Nèn mfùn wul o mum ndà o.

²⁵Mén mèn, bo nsi ma' mvèt num o, mvèt tse bo nsi kul o yi, ndù k'o bèn nse' netèt bo là.

²⁶Me nsi ghù lém so lat num ntag mu, ndù o tù' ketshob, ke ku'ni netshobte yube, nummb'a b'a ta' tunndà ghatatu.

²⁷Là, ndùse me nsi tshob nu wù là, mba me nsi gha' ntshu o, o tshob bo ndù: Tshùaben Nsi tshob ndù: Mèn z'a kô neju' là a ju', mèn z'a ke' kô neju' là k'a ju', nummb'a b'a ta' tunndà ghatatu.