Read Medumba Ezékia 30 Bible Online

Ezékia 30 - Medumba bible

Ezékia 30

¹Tshùaben tshob me ndù:

²Mén mèn, tshob ntshob ngatshob ntshob Nsi ndù: Tshùaben tshob ndù: Bin tshag nze zin tù ntshob ndù: Ah! A ke lèn lé'njù li à!

³Nummbe lé'njù ghebte, lé'njù Tshùaben ghebte. Ndot nsi yàm sen lé'njù là. A b'a se lé'njù ngôngô là.

⁴Ṅwi nsi tsho mà Egipto, bwôg nsi se ka mà Etiopia, ndùse fe ben nsi vùte mà Egipto là, ndùse bo nsi lo' tshunkàb ngô tum yi là; bo sate ngô tà nkum tun bwe.

⁵Bon Etiopia, Put, Lud, njoṅ Arabia fa, Kub boa bon ngô tse boa bo tsho shun nà nsi vùte num ntshùag ṅwi.

⁶Tshùaben tshob ndù: Tse ntom Egipto nsi vùte nsi; neta i z'a be ngù a nke nka'te là nsi vù. Bo nsi vù num ntshùag ṅwi neto' Migdol nèn nkum Syene. A b'a ju ze Tshùaben Nsi tshob là.

⁷Ngô Egipto nsi tù' fam netèt ngô tse bo be fam nà. Mi ntusô nsi be netèt ntusô mi bo sate là.

⁸Bo nsi lèn ndù me b'a Tshùaben Nsi ndùse me nsi te mbwôg mum ngô Egipto, njoṅ tse ntom fa be'te ngwù nsi là.

⁹Num sen lé'njù là ghantum nsi lo nsi, lo' sitima nèn kamte Etiopia z'a tswe mum fite là yi num yàm tu. Bwôg nsi ghom i ndùse se lé'njù Egipto nsi se' là; ne mbe be, tshù lé'njù mbil a se' là.

¹⁰Tshù mba Tshùaben Nsi tshob li: Me nsi tshùa mum mbu Nébukanetsar mfen Babilon biagte ba Egipto tse bo yàm neshu là.

¹¹Me nsi tum i, yi mba ben tse boa tshùagkèt benntùn netèt njoṅ nzwit benntùn fa. Me nsi tum yub bo nèn nsate ngô. Bo nsi tsho' ṅwi mum ngô Egipto, ghù fe ben dun mum ngô.

¹²Me nsi ghù Nil tse jumte. Me nsi swèn ngô mum mbu ba fimntshu. Me nsi tshùa mum mbu ba tum sate ngô bo tshu ts'a be ntùm bwe là. A b'a me Tshùaben bèn ntshobe.

¹³Tshù mba Tshùaben Nsi tshob li: Me nsi biagte ba neto. Me nsi sô neto mà Nof. Nkam ke nsi bèn be mà Egipto. Me nsi kag bwôg mum yen ngô là.

¹⁴Me nsi sate Patros. Me nsi te mbwôg Tsoan. Me nsi tsho'te No.

¹⁵Me nsi sô tshùagntù àm num Sin z'a be kàbngô Egipto là. Me nsi biagte ben No ts'a yàm neshu là.

¹⁶Me nsi te mbwôg mum ngô Egipto. Nge' nsi kab mbu num Sin. Bo nsi to kàbngô No. Ghakeban nsi le' ntsho kà lo' Nof nka mbwôgtshù.

¹⁷Nguanmèn z'a be On bo Pi-Bésèt là nsi vùte num ntshùag ṅwi, bo bèn ndo' mub ntusô nèn yi ndà kuan.

¹⁸Lé'njù nsi sènte mà Takbanès ndùse me nsi be' ngù' Egipto, neta i z'a ke ngù a nka'te mi là. Mo' ndot nsi kabte Takbanès, ngonngon tse nèn ndà kuan.

¹⁹Me nsi tsho'te Egipto, a tshùa ndùlala bo lèn ndù me b'a Tshùaben.

²⁰A lo be kum ngu'njù ntshob ntshù' gham, mum lé'njù sammbàa ntùm mbwe maṅwù, Tshùaben tshob me ndù:

²¹Mén mèn, me be' bu Faraon mfen Egipto, sàm mèn ke kut mfaṅ i, ndù a yab mfu bwe nkule, a ke bèn ngù neta, nku'ni netshùb ṅwi mo' yoṅ i.

²²A ndùlala tshù ju ze me Tshùaben Nsi tshob li: Me lo nsi num Faraon, mfen Egipto, m'a' be' mba bu i ze ntùn ndaṅndaṅ mba z'a be' là, ndùlala ndù me ghù ṅwi tum bu i ngwù nsi.

²³Me nsi sate ba Egipto netèt ngôngô, me nsi ghù bo sa nèn ntùm bag ngô nzenze.

²⁴Me nsi so neta mum mbu mfen Babilon, fà ṅwi àm bu i; me nsi be' bu Faraon, a kua' mbwe i mba mèn z'a lem a vùvù là.

²⁵Me nsi so neta mum mbu mfen Babilon. Mbe se' mba mbu Faraon nà, a nsi tshùaṅe, vùù, bo nsi lèn ndù me b'a Tshùaben Nsi ndùse me nsi fà ṅwi àm mum mbu mfen Babilon, a lo yi nsi, nshùm i mum ngô Egipto là.

²⁶Me nsi sate ba Egipto netèt ngôngô, me nsi ghù bo sa nèn ntùm bag ngô nzenze. A nsi tshùa ndùlala bo lèn ndù me b'a Tshùaben.