Read Medumba Ezékia 31 Bible Online

Ezékia 31 - Medumba bible

Ezékia 31

¹A lo be kum ngu'njù ntshob ntshù' gham, num mbwe lé'njù mum maṅwù tat, Tshùaben tshob me ndù:

²Mén mèn, tshob Faraon, mfen Egipto bo ze nzwit mèn z'a yàm nà ndù: O ke mfut'à we ntùm yu nezi à?

³Tshù, o ke mfut'a sédra z'a Liban nà. Nkaṅ mi lo be mebwô, mfu mi tam tswe' se, wul i sag neshu, tshaṅ i nèn tà mfe tù ntùm ndot.

⁴Ntse lo ghù a ku' ghem lo ghù a sag nèn tù; nta'ntse lo ke nswe' num dù' ze bo na' mbwe i bwe là. Men ntse là lo ke mfag nta'nta' naṅ tun ntù mi a tshwèt là.

⁵A ndùlala ze wut tù là sag nèn tù ntshùa memo' ntù mi a tshwèt là. Nkaṅ mi lo yàme, mfag mbu mi bag bag. A be ndùlala ntshùa à njam ntse yàm mi a ke ngù a nku' là.

⁶Nsaṅ lo ke mba' nkàn tshob mum nkaṅ mi, nyàm tshwèt nke ntswete bam netshaṅ i.

⁷Sen tù là lo bwô mb'a sag là, mbwô mba nkaṅ mi sag là. Nummbe nga tse lo féb mum ntse yàme.

⁸Ba sédra mi a be ntùm nka' Nsi là lo ke tshùa i. Ba nga'lon lo ke ku'ni nebe njoṅ nkaṅ mi, ntù tô lo ke be mba nkaṅ mi là. Sàm tù s'a ntùm nka' Nsi là lo ke fut'é num bwô.

⁹Me lo tshùa njam nkaṅ mi mi a yàm neshu là nso ghamte num i. Njoṅ ntù fa mi a be Edèn, ntùm nka' Nsi là lo ghù lànghe' num i.

¹⁰A ndùlala Tshùaben Nsi tshob ndù: Mb'a be nka'te mb'a sag nèn tù, mba tshaṅ i nèn tù mfe ntùm ndot, a bèn nke nko'te wul i mb'a sag nèn tù là,

¹¹ndùlala me swèn i mum mbu mo' neta mfen netèt fenfen ntumntum. A nsi ghù num i a ndaṅndaṅ mba nukebwô i be yi là. A nsi sat'é.

¹²Ba tum, tse bo be ghayab nge' ntshùate netèt ntumntum nà ke' sen tù là, ngua' i num mbale. Nkaṅ mi be'te ngwùte num ba mbat boa ntômbo'o. Ntshùa mi be'te ngwùte ntùm ba bu'to' mum ngô. Njoṅ nzwit benntùn fa num nsitsha' tum bam netshaṅ i, ngua' i.

¹³Njoṅ nsaṅ fa be nse' nke njabte num kam tun i. Njoṅ nyàm tshwèt fa be ngù dù'ntswe yub bam ntshùa mi.

¹⁴A ndùlala, a ke' bwô ndù njoṅ ntù fa mi a kaṅntse ke nsôte wut tshob tù, ke bèn nke ntshag tshaṅ yub tù mfe mum ndot, ndùlala ndù kà sàm tù se ntse be nzwi' i là sôte wul i bo mum ka'te. Nummbe njoṅ yub fa nsi kwù nèn bam tsha'a, netèt benntùn banban boa ben tshen nà bo be nkwù mba mba we lo là.

¹⁵Tshùaben Nsi tshob ndù: Me lo làn vù lé'njù se bo tshoṅ sédra là, a lo tshùa num tu i me kabte gheme. Me lo tshèt mi nta'ntse, ntse ndùbndùb lo jumte; me lo tshùa num tu i ngù Liban ket nzwe vù, ngù njoṅ ntù tshwèt fa jum.

¹⁶Ngôngô lo vètte ndùse me ghù a vù, ndùse me tshoṅ i nsi boa ben tse bo be nkwù mba mba we lo là. Bo lo fite ntù njoṅ ntù Edèn fa mà bam tsha'a. Njoṅ ntù ntùn boa mi mebwô mi a Liban, mi ntse be nzwi' yub là, bo lo fite ntù tshobe.

¹⁷Bo tshoṅ mba bo yub boa bo num fi, mbaṅ ben tse bo kwù num ntshùag ṅwi là. Bo na' mb'a ze bu neta, nke ntswe bam netshaṅ i netèt ngôngô.

¹⁸We z'a ke maṅt'o ntùm nkuni bo nezi netèt ntù mi a be Edèn, kà bo ma' o bin à ntù mi a be Edèn ntùm ngô ts'a bam tsha' ndù à? Tshù wù là netèt ba kesiket ndù o nô bwe bin ben tse bo kwù num ntshùag ṅwi là. Tshù Faraon nà boa ghafa' tse tse bo yàm nà. Tshùaben Nsi bèn ntshob ndùlala.